Ubuzima

Mabukwe: Agace ka 2

Murabizi muri Afurika muri rusange usanga abakazana na ba nyirabukwe badakunze gucana uwaka. Iyo umukazana atabaye ingare, usanga nyirabukwe amuhoza ku nkeke, cyangwa ugasanga umugabo na we ameze nk’ubateranya. Ndetse mu nkuru nyinshi usanga bivugwa ku buryo ahubwo kubona umukazana na nyirabukwe bahuza imyumvire ari byo biba bitangaje. Nyamara kandi bakabaye bumvikana bagahuza muri byose kuko umukazana aba ari nk’umukobwa wawe, nkuko nyokobukwe yakakubereye nka nyoko dore ko ari we uba waraje usanga. Icyakora bigenda bigabanyuka kubera kenshi gutura ahategeranye, nko ku baba bakorera kure y’aho bavuka bakaba ari ho batura ugasanga umukazana na nyirabukwe babonana bakumburanye.

 

Nibuka ko igihe cyose nabaga ndi kureba filimi na Willy bakagera ahantu umukazana afatwa nabi na nyirabukwe yahitaga ambwira kuyikuramo. Sinzi impamvu ariko ubanza yarabyangaga kubibona kuko biba bigaragaza rimwe mu mahohoterwa abera mu ngo

Erega no guhozwa ku nkeke na nyokobukwe ni ihohoterwa mu yandi.

 

Urusaku muri salon rwarakomeje. Nahisemo gusohoka mu cyumba negera hafi ngo nkurikirane neza ibyari kubera mu rugo rwanjye. Ni byo koko Willy yari yatashye yari ari gutongana na nyina, ibintu bitari byarigeze bibaho mbere hose.

 

Maze imyaka irenga itanu nziranye na we ariko nari ntaramubona yarakaye aka kageni. Na mbere yuko twinjira mu rukundo sinari narabimubonyeho, na cyane ko yubahaga nyina kurenza byose

 

Ibyamberaga imbere byose numvaga ari amakosa yanjye kuko iyo ntamuhamagara ntibyari kuba. Gusa nakomeje gukurikirana ibyavugirwaga muri salon byose

 

-Ni jye ubwira gutyo Willy? Ndakwihanije ntukambwire gutyo sindi umwana wawe. Iriya ngirwamugore ni yo yakugize umusazi ku buryo utinyuka kuvuga ibyo?

 

Nasubiye inyuma gato ngo bataza kumbona. Byari bimaze gufata indi ntera. Ubu se Willy ari bumusubize gute? Gusa numvaga ntashaka ko anshyigikira. Numvaga adakwiye kuvugana nabi na nyina hejuru yanjye, numvaga ari ukwikururira imivumo.  Ikindi numvaga ntifuza kuba natandukanya umwana na nyina

 

Inkoko yarabitse nkebutse mpita mbona Anita. Anita wari uvuye aho ntazi, ngo aje kuba mukeba wanjye, antwarire umugabo nkunda. Ubwo ntashoboye gusubizanya na mabukwe ariko sindi akagoryi ku buryo nareka uyu mukobwa akanyangiriza urukundo maze imyaka myinshi nduhira. Yagize Imana azana na mabukwe naho ubundi nari kumwereka uko intama zambarwa.

Wenda iyo aba undi mugore yari kuba yahise arwana cyangwa agashwana ariko jyewe nahisemo guceceka no gutuza. Sinshaka kuba intandaro yo kuba ruvumwa mu muryango ngo hejuru yo gushinjwa kuba ingumba hiyongereho kuba ingare n’indwanyi. Anita yankubise amaso ahita yongera yubika umutwe areba hasi.

Nuko nkomeza kumva ikiganiro kibera muri salon:

 

-Mama ndakwihanije n’ikindi gihe ntuzangarukire mu rugo utanteguje.

 

Bahise bose baceceka

 

Numvise umugabo wanjye anshyigikiye, nuko kuko bose batari bambonye nisubirira inyuma ariko ngeze mu kirongozi ndahagarara. Ese amagambo Willy abwiye nyina, uyu mubyeyi arayihanganira cyangwa aragira icyo akora?

 

Numvise nyina akubise igitwenge ariko kimwe cy’uburyarya buvanzemo akababaro, nuko aramubwira:

 

-Wasubiramo neza ibyo umaze kuvuga?

 

-Nshaka ko umvira mu rugo mama kandi ntuzagaruke hano kugeza igihe nzabonera ko ari ngombwa. Ese ucyeka ko ibyawe ntabizi? Witwaje kutabyara ngo ubone uko wirukanisha Jasmin. Ariko niba ucyeka ko nazagushimisha nkamwirukana aho wibeshye ahubwo uri kwikora mu jisho ubwawe. Tuzatandukanywa n’urupfu nk’uko nabisezeranye.

 

Narabyumvise igitengo kiramfata. Ese ko avuze urupfu, ubu aramutse apfuye uyu muryango ntiwanyirukana shishi itabona bakampambiriza riva? Nuko nyina ahita amusubiza

 

-Uzi ko yakuroze simbimenye. Ntabwo nzongera kubishidikanyaho wararozwe. Uriya muryango ndawuzi ntiboroshye bakugize inganzwa imbere y’umukobwa wabo.

 

-Mama ndakwiyamye

 

-Ntabwo byarangira gutya. Ugomba gushaka Anita. Uzi impamvu? Ndi nyoko kandi ugomba kunyumvira

 

-Amategeko yawe yajyanire umugabo wawe, wiyanzanira mu rugo

 

Nahise numva urushyi rwirangira. Nubwo ntabibonye ariko ni Lise warukubise umuhungu we Willy. Uyu mubyeyi ukubise umuhungu we ubu jyewe nzamukira? Yahise akomeza

 

-Iryo jambo na rimwe ntuzongere kurimbwira. Ese ubundi uri nde? Umwana wanjye natwise si wowe pee. Willy wanjye yagiye hehe ko mbona bampinduriye?

 

Willy nta kintu yavuze. Will ndamuzi bihagije ntagira amahane, aritonda bihagije. Ikindi kandi yubahaga nyina bishoboka. Nuko nyuma numva aramubwiye

 

-Mama mbabarira uve hano. Itahire ndakwinginze. Niba udashobora kwakira umugore nkunda witwaje impamvu ntazi, sinshaka ko unzagarukira mu rugo

-Ese ibyo uri kuvuga ubwo urabizi?

 

-Ahubwo mbonye ko utaramenya umuhungu wabyaye ukarera. Niba udashobora gukunda umuntu w’agaciro mu buzima bwanjye, ubwo nanjye ntunkunda

 

-Umuntu w’agaciro mu buzima bwawe yari Lea. Ntukongere kumbwira inkundo kandi utaruzi. Warongoye uriya muhirimbiri kuko washakaga icyakugeza kuri se ngo mufatanye ubushabitsi. Niba mbeshya nyomoza. Ubu se nyobewe ko Lea yabyaye umwana upfuye buri bucye ugakora ubukwe n’iriya nshinzi ngo ni Jasmin? Nyobewe se ko iyo nda yari iyawe? Nyobewe se ko…

 

Numvaga ntakomeza kumva ayo mabanga ntari nzi. Nahise nihuta nsubira mu cyumba cyanjye. Umubiri wose naratitiraga. Ibyo numvise byose uyu munsi birantunguye. Reka nshake uko nduhuka mbanze ntuze naho ubundi narwara umutima

 

Izina mabukwe avuze ntirintunguye. Lea yahoze akundana na Willy kandi urukundo rwabo rurazwi cyane. Abagabo ariko bagira amabanga. Umuntu tumaze imyaka itandatu tumenyanye ntiyigeze anahingutsa ko yigeze atera umuntu inda? Noneho menye impamvu mabukwe anyita ingumba, ni uko azi ko umuhungu we abyara.

 

Ubu se iyo mabukwe atabivuga mba mbimenye? Icyakora nubwo yamushinje kunshaka akurikiye ubutunzi bwa data, umugabo wanjye arankunda pee. Aha ho namuvuganira rwose.

 

Numvise urugi rufunguka rurongera rurafungwa, mpita nigira nk’uwari usinziriye ngo atinjira mu cyumba akamenya ko nabumvaga.

 

 

Biracyaza…

5 comments

  1. Cyakoze uyu mubyeyi nigito ameneye umuhungu we amabanga ngo umugore we ayumve yiyirukane,afate umugabo we uko Atari,ababyeyi baragwira

    Like

  2. Njye twaba twasekuranye kereka ntarasezeranye numuhungu we, yambasha akankubita, namubasha nkamukubita nange inkuru igahita irangirira aho😄😄😄😄😄😄😄😄😄🤣🤣

    Like

  3. mbega umubyeyi mubi aratinyuka akaza kuyobora urugo rwumuhungu we ariko disi nuyu mukazana aritonda arundi barikurwana

    Like

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s