Ubuzima

Mabukwe: Agace ka 1

“UKU NI KO NKUNDA, KUKO NTA BUNDI BURYO BWO GUKUNDA NZI”

 

Ibibazo byanjye byatangiye nyuma y’igihe kitari kinini nshyingiwe.

 

Mu kwizihiza isabukuru y’imyaka nari maze mvutse, umugabo wanjye yambwiye ko tuzajya mu kwezi kwa buki ahantu atigeze ambwira, kandi hari hasigaye iminsi itatu ngo tugende. Numvaga nishimiye kugira andi mahirwe yo kongera kumwiharira. Nimvuga kumwiharira ntiwumve ko mfite mukeba ahubwo abyuka ajya mu kazi, ku manywa cyangwa nimugoroba akavuyeho aba ananiwe cyangwa hakaba haje abashyitsi, bene wabo se, mbese umwanya tumarana munini tuwumara dusinziriye nijoro turyamye.

Sinavuga ko ntishimye mu rugo rwanjye kuko niyemeje kubaho nishimiye urugo rwanjye kandi nshimira umugabo wanjye Willy ko abimfashamo. Gusa nk’uko n’undi wese yabyifuza, nifuzaga igihe niyo cyaba gito cyo kwirirwana na we twenyine, tukongera tukiyibutsa bya bihe.

 

Igitondo kimwe ubwo Willy yari yagiye ku kazi, nanjye nari ndyamye, numva ijwi rihamagara izina rye

 

-Willy!!!!!

 

Nateze amatwi. Ni umuntu wahamagaraga umugabo wanjye kandi yahamagaraga mu ijwi rirenga cyane asakuza. Iryo jwi nta rindi ryari irya mabukwe. Byarantunguye kuko hari hafi saa tatu za mu gitondo kandi ubusanzwe ntiyajyaga adusura izo saha cyangwa ngo aze adutunguye gutyo. Yakomeje kwivugisha

 

-Ariko se muri uru rugo habamo ibipfamatwi, cyangwa barimutse batambwiye? Willy!!!

 

Nahise nambara ipantalo nabonye hafi yanjye nambara n’ishati ya Willy nuko ndasohoka ngana muri salo.

 

Mvugishije ukuri, hagati yanjye na mabukwe ntibigenda neza cyane gusa jyewe ndamwubaha nkanamukunda ariko we aranyihunza kenshi ndetse arabinyereka. Nk’iyo habaye iminsi mikuru mu muryango, cyangwa  se hari umuntu wo mu muryango ukoze ubukwe, mba meze nka rubanda rwose, muri macye mba ndi nk’umuvumbyi kuko ntaba yifuza ko mbigiramo uruhare. Muri macye nabonaga ko Lise, ari we mabukwe atigeze yishimira ko mbana n’umuhungu we.

 

Nasanze ahagaze imbere y’umuryango. Nuko ndamusekera

 

-Ni karibu mama

 

Yarabanje arandeba kuva hasi kugera hejuru, nuko yitotomba mu ndimi ntazi dore ko yari yaravukiye mu kindi gihugu akaza mu cyacu akuze, yari azi rero indimi zimwe jyewe ntazi. Atananshubije yahise ambaza:

 

-Umuhungu wanjye ari hehe?

-Yagiye ku kazi mama. Hari ikintu mukeneye se?

-Yagiye ku kazi iki gitondo? Si we muyobozi aho akorera ra?

 

Urebye byari saa tatu z’igitondo kandi Willy rwose asanzwe yizindura, na nyina arabizi ahubwo yabyirengagije

 

-Yego ni we muyobozi ariko,..

-Yahise anca mu ijambo arakomeza

 

-Umwana wanjye atunuka agatuza akobokera gushaka ibitunga urugo naho wowe ibyawe ni ukuryama gusaaaaa, utamikwa wicaye nk’aho ufite ubumuga!

 

 

Naguye mu kantu. Bwari ubwa mbere mabukwe ambwiye ayo magambo nubwo kuva nashaka muri uru rugo atigeze andeba neza. Gusa iyi nshuro ho ibyo mabukwe yavugaga narabyumvaga. Nta kazi nagiraga, rero kugeza izi saha nkiryamye wa mugani ntibyumvikana. Ariko Willy ubwe yari yaranyibwiriye ko azashaka umukozi wo mu rugo, uyu munsi kandi ni we wambwiye ngo ngume mu buriri kugeza avuye ku kazi kuko ejo nari niriwe mu myiteguro ya rwa rugendo twari kujyamo, ku bwe nari naniwe ngomba kuruhuka. Nicujije icyatumye mwumvira

 

-Ese urumva nta soni ufite?

Ayo magambo mabukwe yayambwiraga yifashe mu mayunguyungu kandi bigaragara ko yandakariye cyane.

 

Umutima wanjye wakomeje kudihagura cyane ariko sinanyeganyega. Nari mpagaze mu muryango ku ngazi yo hejuru na we ahagaze ku yo hasi

 

-Wananiwe no kumubyarira akana ariko wamutegetse ngo mujye kwizihiza amasabukuru muri Afurika y’epfo?

 

Akivuga gutyo umutima wanjye habuze gato ngo uhagarare. Willy we yampishe aho tuzajya abibwira nyina, kandi azi ko mabukwe asanzwe atankunda? Numvise birenze ubwenge bwanjye

 

Yahise ahindukira areba mu marembo nuko arahamagara:

 

-Anita! Anita injira!

 

Narebye aho yarebaga ahamagara nuko mbona hinjiye umukobwa ukiri muto, wirabura, waba afite imyaka nk’iya murumuna wanjye, iyo aba akiriho

 

Anita uwo yinjiye n’isoni nyinshi, yikoreye ivarisi ku mutwe

 

Mabukwe aramubwira:

 

-Ngwino wigira ubwoba. Shyira ivarisi yawe mu nzu. Ubu wageze iwawe humura kandi ndasiga byose mbitunganyije

 

Nakomeje guceceka ndeba ibiri kubera hano. Gusa sinasobanukiwe uwo mukobwa ndetse n’amagambo mabukwe yamubwiye ati, ubu wageze iwawe. Nuko mabukwe arahindukira arambaza:

 

-Umugabo wawe arataha ryari?

-Hafi saa kumi n’ebyiri.

-Ntacyo ndamutegereza. Niyo azataha nyuma y’imyaka icumi azansanga hano mutegereje. Ndarambiwe. Uyu munsi ngomba kubohora umuhungu wanjye mu ngoyi zawe dore aho wahereye.

 

Kugeza ubu sinari nagasobanukiwe ibyo mabukwe arimo nuko ndamubaza

 

-Ese mama habaye iki? Hari ikintu kibi naba nakoze?

 

-Jasmin uri ingumba. Nari mbizi ariko kubera kubaha iwanyu naricecekeye. Gusa aho bigeze nananiwe kwihangana. Uyu Anita ni we ugiye kuba umukazana wanjye ubundi babyare abana wowe udateze kuzabyara

 

Nahise numva ikintu kinyituye hejuru. Numvaga meze nk’uri kurota. Sinumvaga ko nabyukira ku kintu kibi nk’icyo. Nakomeje guhumbaguza ngo menye niba ntari kurota ariko byari byo. Mabukwe yari azanye mukeba wanjye ngo ansimbure

 

Nahise nibaza amezi yose ashize, imyaka ishize itari myinshi ariko nkaba ntarasama. Ariko Willy we ahora ambwira ko isaha y’Imana nigera nzabyara. Ese izi gahunda za nyina hari icyo aziziho?

 

Nagerageje kuvuga ariko ikiniga kiramfata mbura icyo navuga. Mu mutima ijwi rikambwira riti erega muri Afurika niko bimeze iyo utabyaye uba igicibwa mu muryango!

Natangiye kubura icyo gukora

 

Narahindukiye ndeba uwo bazanye ngo abe mukeba wanjye. Kuko na we yari azi ko ari mu makosa, yubitse umutwe atinya kundeba. Gusa uko namubonaga Willy ntiyamwemera. Willy umugabo wanjye ndamuzi akunda abagore basirimutse kandi bacyeye. Ubu koko aka kanyacyaro kambaye nabi, gafite ibisuko byagasaziyeho uyu mukecuru arabona Willy yakemera? Gusa nubwo kari akanyacyaro, kari gafite mu maso heza

 

Ngicecetse mabukwe yafashe Anita akaboko amujyana mu gikoni

 

-Mwana wa, umugabo wawe nimugoroba atashye agomba kurya ibyo wamutekeye. Ngwino rero nkwereke byose

 

Nabakurikije amaso kugeza binjiye. Nibwo nahise nirekura noneho ndarira. Nahise niruka njya mu cyumba ndakinga nuko amarira arisuka. Gusa byari vuba pee. Numvaga ari nka film. Nahise mfata terefoni yanjye mpamagara Willy nawe yitaba vuba

 

-Wakangutse neza rurabo rwanjye?

 

Ijwi rye aho gutuma nduhuka ryatumye amarira yiyongera. Naketse ko yanabimenye ko ndi kurira kubera gutsikimba

-Allo. Jasmin cherie umeze neza?

-nsha… nsha…nshaka ko.. ko..ko… utaha vuba

 

Nakomeje gutsikimba. Ndira gacye ariko iyo ndize sinceceka vuba. Ijwi rya Willy ryahise rihinduka numva nawe agize ikiniga

-banza utuze rukundo rwanjye. Mbabarira tuza

 

Sinashakaga kumutera ubwoba ariko nashakaga ko aza vuba agahosha ibyaberaga hano ntariruka ku musozi

 

-Erega mabukwe, ..

-Mama?

 

Terefoni yanjye yahise izima nari nibagiwe kuyiraza ku muriro. Nakomeje kurira kugeza ubwo agatotsi kantwaye sinanamenye igihe Willy yatahiye

Ubwo nakangukaga, numvise abantu bari gutonganira muri salon. Mu majwi yabo namenyemo irya Willy. Kuki se ari gutongana na nyina? Mana we ubu sinteje ibindi bibazo?

 

Biracyaza

 

 

Bakunzi bacu kandi bakunzi b’inkuru ndende, dutangiye indi nkuru ndende aho umukazana na nyirabukwe bafitanye ibibazo bishingiye ku kuba umukazana atarabyara. Ese umugabo w’uyu mugore azabyitwaramo ate? Ese azumvira nyina aharike umugore yashatse akunda cyangwa azagumana umugore we ntiyite ku cyifuzo cya nyina?

4 comments

  1. Mana weee, ibigeragezo biragwira. ababyeyi bacu nabo Hari ubwo batugora p. Courage turahabaye cyaneeeew. nkunda inkuru zanyu p. muri abarimu beza

    Like

  2. Ubu koko uyu mubyeyi ntari kurengera?Yego kubaha ababyeyi n'ingenzi ariko aha naweza nikavua adhabu

    Like

  3. Mwaramutse murakoze cyane kubwiyi nkuru amasomo yanyu turacyayakurikira chapter shya turahabaye kubwanyu murakoze

    Like

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s