Ubuzima

Hawa: Agace ka 35

Akayaga keza ko mu cyaro twese uko turi batatu katuguye neza.

Wari nk’umwiherero kandi cyari igihe cyiza ngo buri wese abashe kongera kwisubiraho ku makosa yakoze mu buzima bwe.

Jyewe nagombaga kwisubiraho ku bugome n’ubugambanyi no kwikunda. Assia yagombaga kwisubiraho ku kudashishoza no kunyurwa manuma no kudaha agaciro ubusugi bwe, nubwo butari kugaruka ariko yagombaga kumenya kutagurisha umubiri we ngo aragura urukundo. Housna nubwo yari yagizweho ingaruka n’amakosa yanjye ariko nawe ntiyabaye masongo akurikirane imyitwarire y’umukunzi we hakiri kare

Ubwo twari yo, Housna yaboneyeho akanya ko kuvuga ku makosa namukoreye

-Urazi Hawa, kwakira ibyo wankoreye byabanje kunanira ariko ubwo nabitekerezagaho naje gusanga mu gupanga ibi byose warangiriye neza utabizi. Nubwo ari wowe wasabye Fatuma kwitongoza kuri John, iyo John aba aha agaciro urukundo rwacu ntibiba byarageze aho anamwishyurira inzu yo kubamo. Ikiboneka cyo ni umuhehesi kandi sinari kuzabyihanganira. Hariya warandokoye rwose. Ikindi wapanze ngo Paul antere inda, nyamara we akoresha agakingirizo birarenga ndasama. Iyo Imana iba itabyemeye sinari gutwita. Ikindi watumye Paul ankunda kandi nanjye ndamukunda ndetse cyane. Rero ibyo byose byatumye mpitamo kureka ahahise nkareba ahazaza dore ko nawe wahanwe bihagije. Habuze gato ngo upfe, kandi dore n’umuco ntukwemerera kubana na Ibrahim. Rero ndakwinginze ntuzongere gutuma ngutakariza icyizere. Kandi humura nahisemo kutazabibwira papa na tantine Fatina

-Urakoze Housna. Amahirwe ya kabiri umpaye sinzayapfusha ubusa kandi nzirinda ko wakicuza

-Wari uzi ko papa yasabye Ibrahim gusezera akazi akaza akamufasha kwita ku bucuruzi bwe.

-Oya ntabyo yambwiye. Ari kugenda angendera kure

-Hawa na we araremerewe erega. Gusa ndumva natandukana na paul, wowe ukabana na Ibrahim

-Uravuga ibiki Housna? Ibyo se waba ubikoreye iki?

-Kuko wowe na Ibrahim mumaranye igihe kandi sinifuza kubakira ku byago by’abandi

-Oya Housna. Niba ukunda Paul koko wikora ibyo. Kandi byose ni amakosa yanjye ni jye ngomba kugerwaho n’ingaruka zayo

-Nabajije papa niba bitashoboka ko ubana na Ibrahim ambwira ko ibyo mu muryango wacu bitashoboka

-Ariko burya nta tegeko ritagira irengayobora. Ahubwo papa wawe nakore uko ashoboye jye na Ibrahim tubane, nubwo byaba binyuranye n’amahame y’umuryango. Nta n’ubwo Ibrahim afite izina ry’umuryango wanyu

-Icyo ni cyo ngukundira Hawa. Icyo ushaka uragiharanira. Gusa wabinyujije mu nzira mbi. Ubutaha koresha ubwo buhanga bwawe ku bintu byiza bizakugirira akamaro

Buhoro buhoro nagiye niyunga na Housna. Yaje kumbwira ko Ibrahim azaza iwabo vuba mu minsi mikuru y’umuryango

Iryo joro naraye ntekereza amagambo ya Housna. Nibyo koko reka nkoreshe ubwenge mfite mu bintu bizima binyuze mu mucyo. Na Paul yambwiye ko ubwenge mfite nabubyaza umusaruro. Ubu rero reka ndwanirire urukundo rwanjye ntazicuza ko ntagerageje.

Niba nararwaniye ubukire bikaba byari bigiye gukunda narabinyujije mu nzira mbi, kuki ntarwanira urukundo nyuze mu nzira nziza noneho?

Nahise mfata umwanzuro wo gusoma inyandiko za leta n’iz’idini ryacu nkareba icyo zivuga.

Mu gitabo cy’idini handitsemo ngo: “umugabo ntazashakane na nyina, umukobwa we, mushiki we, nyinawabo, nyirasenge, mwishya we, nyirakuru cyangwa abuzukuru be”

Abandi basigaye, nka babyara be cyangwa abandi bafitanye amasano ya kure, arabemerewe

Naho mu mategeko mbonezamubano nasanze handitse ko ishyingirwa ritemewe iyo ribaye hagati y’umugabo n’abamukomokaho cyangwa abo akomokaho (umugore n’umuhungu we, umugabo n’umukobwa we, sogokuru cyangwa nyogokuru n’abuzukuru), hagati y’abavukana, abavuka kwa nyokorume no kwa nyogosenge cyangwa umwana wareze ukamugira uwawe.

Hose nta na hamwe havugaga ko kuba musaza wanjye yarashatse mu muryango ntemerewe kuwushakamo umugabo. Ubwo se uwo muco ngo wo mu muryango, umbuza kubana n’uwo nkunda kandi idini na leta bibinyemerera, uvuze iki?

Nahise mfata terefoni mpamagara Ibrahim musaba kudusanga mu cyaro byibuze iminsi ibiri mbere yuko ajya mu minsi mikuru. Nagombaga kumumenyesha ibi byose. Hanyuma iminsi mikuru yarangira agasaba se gukoranya abakuru b’umuryango kandi nanjye nkazaba mpari tukabasaba niba batareka tukabana. Kuko papa wa Ibrahim ari umukire, nabasaba guterana ntibazabyanga

Hanyuma nibaterana tuzakoresha ubu bumenyi nungutse, tubasabe kutureka. Nabo ni abantu nizeye ko bazabyumva, kandi erega nta mahano arimo. Ubundi se mpfana iki na Ibrahim koko?

Igitekerezo cyanjye Ibrahim, Assia na Housna baragishyigikiye nuko Housna arambwira ati:

-Burya waba avoka mwiza pe. Sinakubwiye nti ubwenge bwawe ubukoresheje neza bwakubyarira umusaruro

Nkuko twabipanze ubwo inama yateranaga, Ibrahim avuga ku cyo asaba abakuru b’umuryango. Abanza kuvuga ku muco, kandi avuga ko awubaha rwose ariko yongeraho ko ankunda bikomeye ku buryo kundeka kandi amategeko n’idini bimwemerera kubana na njye ari ikibazo kimuremereye cyane.

Asobanura ko kumenya umuryango w’uwamubyaye bitakabaye isoko y’umubabaro we ahubwo ko gushyingirwa kwacu byakongera ubumwe mu muryango bikanongera ibyishimo n’umunezero mu mitima yacu

Yabisobanuye neza yifashishije za ngingo namuhaye, abari aho bose babura icyo barenzaho.

Noneho icyarushijeho kubikomeza ni uko nahagurutse ngapfukama imbere yabo bose mbasaba kuduha ayo mahirwe, kandi ko nta mahano turi bube dukoze, kuko twakundanye kuva kera ndetse amategeko abitwemerera

Byahise bose bibarenga. Burya mu buzima icyawe uzashake inzira zose nziza wanyuramo ariko ugitsindire. Kuri jyewe Hawa ubusanzwe ijambo NTIBISHOBOKA sinjya mpfa kuryemera ntabanje kugerageza umwanya uhagije.

Abasaza bahise basoza inama batubwira ko bagiye kubyigaho bakazadusubiza nyuma.

Ese koko bazabyemera cyangwa bazahagarara ku mategeko y’umuryango?

Ntuzacikwe…

4 comments

  1. ariko amategeko yimiryango Yiki? iyumuntu Atari musaza wawe cyangwa mushiki wawe cyangwa mubyara wawe mwabuzwa Niki kubana kandi mukundana hawa kanira ukomere kukuri kwawe nuburenganzirabwawe rwose ntuhombe umukunzi wawe gutyo nsigaye rwose ngukunda wagarutse ibumuntu niyo mpamvu kuriyisaha nanjye nkurinyuma kuko uri mukuri

    Like

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s