Ubuzima

Hawa: Agace ka 32

Charles na Assia bamaze kugenda, mama na Paul basigaranye nanjye. Isaha yo gutaha yari iri kwegereza ariko Ibrahim ntiyari yahagera. Ndambiwe kumutegereza, nafashe terefoni ngo muhamagare ariko nsanga iye irazimije. Nyuma yo kugerageza kenshi idacamo, nahisemo guhamagara nyina, ariko we icamo, gusa ntiyayitaba.

Mama abonye meze nk’uhangayitse, arambaza

-Hawa, wabaye iki?

-Ibrahim yanyijeje ko ari buze none ntiyaje na terefoni ye irafunze

-Hamagara nyina wumve

-Namuhamagaye ariko ntari kwitaba

-Umva mukobwa wanjye, uri koroherwa, wikibabaza umutima. Ashobora kuba yagize ikimubuza cyangwa indi mpamvu utaramenya

 

Tukiri kuvuga ibyo terefoni yanjye yarasonnye ndebye mbona ni ubutumwa Ibrahim anyandikiye bugira buti: “Uraho Hawa. Sinkibonetse. Nzagusobanurira ejo, ntuhangayike. Ijoro ryiza”

 

Naribajije. Ibrahim yagombaga guhura na se umubyara yavayo akambwira uko byagenze none ahisemo kunyoherereza ubutumwa. Ubu koko byagenze gute? Nabibwiye mama

-Wikibabaza umutima Hawa. Nitugera mu rugo nubwo buri bube bwije ndabwira Paul ajye iwabo arebe icyabaye. Hagati aho nizere ko wowe utabaye nka mukuru wawe. Nizere ko ukiri isugi

 

-Humura mama. Ndacyameze neza neza uko wambyaye

-Ushaka kumbwira ko nta na kimwe uzi Hawa? N’ukuntu uri agacakura

-Mama nawe. Uri kuntera isoni nawe. Ushaka se jye na Ibrahim tujye twicara turebane mu maso gusaaaa? Gusa tuzi aho kugarukira humura

-Uko byamera kose nukomeza kuba isugi uzabona uko umugabo wawe azabyishimira. Abagabo bakunda kuba aba mbere bakanakomeza kuba bonyine imbere y’umugore.

-Mama aho ndaguhakanyije. Ubu se Darius si we wambuye ubusugi Assia. Ntiyamutaye se akigendera

-Wanyumvise nabi. Navuze umugabo wawe sinavugaga uwo mukundana. Ndi mama wawe urabizi. Shaka aho wandika. Darius azagaruka gusaba imbabazi Assia ndabivuze. Yikanze udufaranga yumva abaye ikirenga

 

Tukivugana Charles na Assia bahise bagaruka

-Uriteguye Hawa?

-Yego ubu twagenda nimwe twari dutegereje

-Ibrahim se ari hehe?

-Ntari buboneke

 

Nari nishimiye gusubira mu rugo. Narongeye nshimira Imana ko ntaguye mu maboko ya Fatuma. Ubu nari gupfa ntihannye ariko Imana yanyongereye indi minsi yo kubaho. Ndizera ko Imana izishimira Hawa mushya kuko narahindutse.

 

Tugeze mu rugo, Assia yamfashije kwinjira mu nzu kuko nari maze igihe ntagenda. Nahise ntungurwa n’ibipurizo by’amabara atandukanye byari bitatse muri salon. Igitambaro kinini cyari cyanditseho aya magambo:

 

IKAZE MU RUGO HAWA. TWARI TUGUKUMBUYE KANDI TWISHIMIYE KO UGARUTSE MU RUGO

 

Aya magambo yankoze ku mutima cyane. Nahise niyumvisha ko ari igitekerezo cya Assia. Burya cya gihe bagenda we na Charles ni ibi bari baje gutunganya.

 

Nkiri kwibaza neza ibiri aho ngaho, nahise numva umuntu ateye indirimbo yo gutanga ikaze mu rurimi rwacu.

 

Yari Ibrahim wahise asohoka ntazi aho aturutse. Yari ari kumwe na nyina, se wamureze, mushiki we n’abaturanyi bacye. Byari byiza cyane rwose ku buryo amarira yatembaga mu maso kubera ibyishimo. Nakiriwe nk’umwamikazi

 

Sinari nzi ko Ibrahim afite impano yo kuririmba. Nahise nishimira uko abantu bangaragarije urukundo. Ndetse na Sekou yari yatumiwe

 

Mama wa Charles nawe yari yaje. Nahise menya impamvu Ibrahim ataje kwa muganga, bari mu gutegura kuza kuntungura.

 

Iryo joro ryambereye ryiza. Gusa narebaga Ibrahim nkabona ameze nk’uri kwiyumanganya ariko yabonekaga nk’utishimye cyane. Sinabashije kumuvugisha ngo menye ikibazo afite kugeza ubwo batashye. Gusa yambwiye ko aza kundeba ku bucyeye mbere yo gusubira mu majyepfo ku kazi

 

Mu maso he hari huzuye agahinda ariko akabihisha ngo atatubihiriza ikirori. Ntacyo ubwo azagaruka ejo, nzamubaza neza

 

Abashyitsi bamaze gutaha ninjiye mu cyumba. Nahise ntungurwa no gusanga ka matola kacu twarambikaga ku musambi kasimbuwe n’igitanda cyiza na matola nshya.

Imwe mu mafoto yanjye nkunda bari bayishyize muri cadre bayimanika hejuru y’aho ndyama. Icyumba bari bagisize irangi rishyashya, byari byiza cyane

Imbere y’igitanda bari bahashyize akameza, mbese byari byiza cyane

 

-Assia, ni nde wakoze ibi?

-Ni Ibrahim na Charles

-Bakoze pee. Imana ibahembe

Naboherereje ubutumwa bwo kubashimira, nuko agatotsi karantwara ndasinzira

 

Biracyaza…

1 comment

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s