Ubuzima

Hawa: Agace ka 29

Numvaga navugisha Housna na John buri umwe ku ruhande rwe batari kumwe ariko Assia na Charles bifuje ko nabibabwira bari kumwe. Mama we yanifuzaga ko na Ibrahim azaba ahari

-Hawa, ni byiza ko na Ibrahim umubwira. Kuko ashobora kuzabimenya abibwiwe n’abandi nka Fatuma cyangwa John ugasanga bibaye bibi kurutaho. Wakoze amakosa usabwa gutangira kwakira ingaruka zayo. Gusa Ibrahim uzabimubwire ari ukwe si ngombwa ko ubimubwirira hamwe n’abandi

 

Nasabye Assia kumfasha guhura na John. Yagiye iwe nuko agezeyo asanga nta Fatuma nta John. Charles yashakishije amakuru bamubwira ko bagiye gutura mu Bubirigi. Nahise numva ko uko byamera kose ari Fatuma wamugiriye inama yo kwimuka ngo atazavumbura ukuri nyuma yo kundoga simpfe. Gusa ni hahandi isi irazenguruka hari igihe twazahura. Nongeye kwibuka uko Sekou yambwiye ko yankuye mu gihuru. Ubundi buriya Fatuma yabashije ate kungeza aho hose wenyine? Gusa nanone ngera aho nkamwumva. Byose yabyinjiyemo ari jye mbimushyizemo.

 

Ubwo John adahari, ubwo nzabanza mbwire Housna nzabwira Ibrahim nyuma.

Namutumyeho kwa muganga nuko araza. Yakinguye urugi nuko umutima wanjye utangira kudihagura. Nari mbizi ko bishobora gushyira iherezo ku rukundo rwacu gusa singomba gucika intege. Sinabaho ntatuje mu mutima cyangwa ngo mpunge nka Fatuma. Assia, Paul na Charles bari bahari. Nuko Charles afata ijambo:

 

-Housa, Hawa na Paul hari ibyo bashaka kukubwira. Gusa mbere yuko bavuga nashakaga kukubwira ko burya abantu twese dukosa kandi tukanababaza abo dukunda cyangwa badukunda banadufitiye akamaro. Icya ngombwa ni ukwemera amakosa, kuyihana no kutayasubira

 

Assia yungamo:

-Housna, nifuzaga kukwibutsa ko Hawa atarakira neza kandi urabona ko akiri mu bitaro. Ndakwinginze umwihanganire. Hawa ngaho mubwire

 

Ntaravuga Housna ahita avuga:

-None se ni iki cyihutirwa agiye kumbwira atazambwira yakize neza?

Paul yahise amusubiza ko ibyiza ari ukubivuga aka kanya

 

-Hawa noneho ndakumva. Gusa niba wumva icyo ugiye kumbwira utaracyitegura neza wategereza ugakira ubuzima bwawe ni bwo bwa ngombwa ubu

 

-Oya Housna reka mbivuge ubu

 

Nahise nongera nsubiramo uko byagenze nta na kimwe nshigaje

-Housna, nakuruwe no gushaka gukira ntavunitse bintera gukora amakosa. Gusa ndagusaba umbabarire.

 

Amarira azenga mu maso yahise ahaguruka andeba akanya, arahindukira yitegereza umugabo we Paul, ahita afata isakoshi ye ashaka gusohoka ariko Charles na Assia bamufata akaboko. Assia yahise apfukama

 

-Ndakwinginze Housna, mbere yo gufata umwanzuro banza utekereze. Nanjye nka mukuru we byarandenze ibyo bakoze ariko ibuka ko twese dukosa mu buryo bumwe cyangwa ubundi. Uyu ni umugambi wa Sekibi ishaka kubatandukanya burundu mugatandukana mushywanye.

 

-Ntacyo mfite cyo kuvuga ubu Assia. Nibwo mpise menya impamvu tantine Fatina yahoraga ambwira kwitondera Hawa. Icyakora ndumiwe. Nawe koko Paul? Icyakora wakinnye neza.

Yahise aturika ararira cyane, Paul ashatse kumuhoza aramwiyama

 

-Ni ukuri Housna mbere byari ukugendera muri gahunda ariko uko twatindanye naje kugwa mu rukundo kandi ndagukunda pee

-Sawa. Mumbabarire ngende nshaka kuba ndi jyenyine

 

Charles yaramuherekeje kuko yari yanze kujyana na Paul nuko agiye Assia ahita abaza Paul

 

-Ese urabona azasaba gatanya?

-Simbizi nanjye. Gusa ndasaba Imana ko bitamukomeretsa cyane kuko aratwite. Ahubwo reka ntahe

-Hawa humura Housna ni umuntu mwiza. Igihe nikigera azakubabarira gusa ntiwitege ko umubano wanyu uzakomeza nka mbere. Kandi kuba adutwitiye nabyo ni indi mpamvu izatuma twiyunga

 

Nubwo byari binkomereye ariko byibuze numvise mbohotse muri jye. Housna nahitamo ko dutandukana nzabyakira. Byibuze nzabaho ntuje mu mutima. Muri macye umwanzuro wose azafata, niteguye kuwakira. Nanjye ubwanjye nagendanaga isoni ariko ubu ndumva ntakiremerewe

 

Igisigaye ni ukubibwira Ibrahim. Aha ho ndabitekereza ubwoba bukantaha. Gusa Imana imfashe azambabarire kuko kubaho ntari kumwe na we byangora. Nagombaga kubikora vuba atarasubira mu majyepfo kuko konji yasabye yari iri hafi kurangira.

 

Namutumyeho araza ndabimubwira. Kandi nanone Charles na Assia bari hafi aho bantera akanyabugabo. Maze kubimubwira igisubizo cye cyarantunguye cyane

 

-Ntibintunguye Hawa. Nari mbizi ko ikunda ryawe ry’amafaranga bizagukoresha amahano amaherezo. Icyiza ni uko wigaruye hakiri kare. Ku rwanjye ruhande nzakomeza kugukunda kandi nzihatira kugushyira mu nzira nziza.

 

Yooo. Iyi ni yo nshuti nyayo rwose. Abari aho bose byarabanejeje. Nari mbizi ko Ibrahim ankunda ariko ibyo ambwiye birushijeho kunyereka ko ari inshuti nyanshuti. Urukundo nyarwo ni igitangaza. Rutuma hari byinshi wirengagiza ndetse ukanabyibagirwa. Urukundo nyarwo ubundi ntacyo rushingiraho haba uburanga, ubutunzi, amashuri n’ibindi. Nirwo ruri hagati yanjye na Ibrahim. Nirwo rutuma narakomeje kumunambaho nubwo ari umukene.

 

Yasabye Assia na Charles kudusiga twenyine akanganiriza nuko barasohoka

 

-None se Housna umaze kubimubwira yabyitwayemo ate?

-Yarakaye cyane. Gusa ndiyumvamo ko azambabarira

-Warikunze urakabya. Ntuzabyongere na rimwe Hawa. Iyo mba ntagukunda simba nkubabariye. Ubinyemereye nzajya kwa Housna mukwingingire. Ni umwana mwiza kandi ntukwiye guhomba inshuti nka we

-Urakoze cheri. Nubundi musanzwe mwumvikana wenda arakumva

-Nanjye biransetsa ukuntu mukunda kandi nkumva ntifuza ko mwatandukana

-Njya mbibona nanjye

-Hawa ndifuza ko nukira nzahita nza gufata tugatangira kwitegura ubukwe. Hari amafaranga namaze kwizigama azadutunga

 

Narishimye cyane kubera iryo jambo yari ambwiye

-Ndabyemeye Ibra. Ahubwo sinzarota uwo munsi ugera

-Hari indi kuru ngufitiye rero

-Ndakumva Ibra

-Namaze kumenya data wa nyawe

-Eeeh. Mbwira neza

-Urebye sindamubona. Ariko mama ngo yarimo atembera mu mugi baba barakubitanye

-None se yamusobanuriye impamvu yari yarabuze?

-Yewe ni inkuru ndende nzayikubwira nitonze. Gusa ntiyari anazi ko yagiye yaramuteye inda, ntabwo byari ukumuhunga cyangwa gutoroka. Nawe rero yamenye ko mpari ngo arishima cyane kuko nta mwana w’umuhungu yabyaye kandi umukobwa umwe rukumbi afite ngo abona ubucuruzi bwe atabwitayeho cyane. Ashaka ko duhura vuba ariko akabanza akabimenyesha umuryango we. Rero ejo nzabonana na we. Nzajyana na mama na data wandeze. Ubwo andi makuru nzayamenya ejo. Nimvayo nzaza kukureba

-Afite umukobwa, kandi ntiyitaye ku bucuruzi bwe. Uwo mugabo ubanza ari umukire

-Hawa ugaruye ayo makuru y’ubukire koko?

-Oya cheri. None se koko sinemerewe kuvuga ibyo ntekereza? Gusa ndushijeho kunezerwa. Urumva nzagira ba databukwe babiri, ngire na muramukazi wanjye wundi. Umuryango urumva utari kwaguka cyane se?

 

Twahise duseka twese nuko tukiri muri ibyo umushyitsi utunguranye ahita yinjira aho nari ndi

 

Ese uyu mushyitsi ni nde? Uyu se wabyaye Ibrahim kandi wari waraburanye na nyina we ni nde?

 

Ni ah’ubutaha.

5 comments

  1. Yoooo ibrahim avukana Housna disi mbega inkuru igiye kurangira neza. Icyo nabonyemo disi kugira inshuti nziza ntako bisa byatumye hawa asubira mu murongo shenge

    Like

  2. Mbega episode igoye kubyumva nageho birandenga kd byose nzi ibirikuba mbega mubuzima bwaburimunsi duhura nabantu nkaba abeza nbabi ishuti we

    Like

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s