Ubuzima

Preeclampsia: Menya byinshi kuri yo

Ushobora kuba iri jambo atari ubwa mbere uribonye, uryumvise cyangwa se bukaba ari ubwa mbere. Gusa ni imwe mu ndwara zikomeye zifata abagore batwite zishobora kubahitana zidasize n’umwana batwite, gusa nanone ikaba indwara ishobora kwirindwa hakiri kare nk’uko muri iyi nkuru tugiye kubivugaho.

 

PREECLAMPSIA NI IKI?

 

Havugwa preeclampsia igihe umugore utwite agize umuvuduko ukabije w’amaraso bigaherekezwa no kwangirika kwa zimwe mu nyama zo mu nda cyane cyane umwijima n’impyiko. Iyo indwara ikaze bituma umwana uri mu nda atabasha kubona amaraso n’ibimutunga bikagira ingaruka ku mikurire ye. Abagore batwite bari hagati ya 5-8% basanganwa iki kibazo, kenshi gikunze kuza iyo inda irengeje ibyumweru 20.
Iyo bitavuwe ku gihe bitera ibibazo bikomeye haba ku mwana uri mu nda bidasize na nyina.

 

ITERWA N’IKI?

 

Impamvu nyamukuru itera preeclampsia ntiyaba imwe gusa hari impamvu zagiye zigaragazwa ko zigira uruhare mu kugira iki kibazo.

 

  1. Amaraso adatembera neza

 

Iyo inda ikiri ntoya, hakorwa imiyoboro y’amaraso mishya ahanini ishinzwe kujyana amaraso mu ngobyi y’umwana. Hari igihe rero iyi miyoboro iba idahagije cyangwa se ikamera nk’inizwe ku buryo idashobora kohereza neza amaraso ahagije mu ngobyi, bigatuma amaraso agera ku mwana n’intungamubiri biba bicyeya. Ibi bigasaba ko umutima ukoresha ingufu nyinshi mu kohereza amaraso.

 

  1. Ibibazo wari usanganywe

 

Kuba wari usanzwe ufite ikibazo cy’umuvuduko ukabije w’amaraso, kuba utwite abana barenze umwe, kuba mu muryango wanyu hari uwigeze kugira icyo kibazo, kuba ubyibushye bikabije (ufite BMI irenze 30 mbere yo gutwita) no kuba utwite urengeje imyaka 40 ni bimwe mu byakongera ibyago byo kurwara preeclampsia.

 

IRANGWA N’IKI?

 

Ubusanzwe usanga ibimenyetso bijya guhura n’ibindi bigaragara ku mugore wese utwite, gusa ni ngombwa ko umugore utwite yisuzumisha mu gihe cyagenwe kugirango harebwe niba yaba adafite iki kibazo. Mu bimenyetso twavugamo:

 

  1. Kubyimba ibiganza n’ibirenge

 

Nubwo abagore benshi bashobora kubyimba ibirenge n’ibiganza iyo batwite, ibi bikaba ahanini biterwa n’uko umubiri uba uzigama amazi menshi, ariko nanone kubyimba bikabije ni ikimenyetso cy’umuvuduko ukabije w’amaraso. Bikubangamira iyo ugenda, uryamye cyangwa ugiye kwambara inkweto. Ibi ubyibonyeho bikagendana no kwiyongera ibiro kudasanzwe usabwa kujya kwa muganga.

 

  1. Proteinuria

 

Iki ahanini nicyo kimenyetso simusiga cy’uko ufite preeclampsia. Aha ni igihe bapima bagasanga mu nkari zawe harimo poroteyine nyinshi.
Niyo mpamvu igihe cyose ugiye kwipimisha baba bagomba gupima inkari kugirango barebe niba nta kibazo ufite babe babikurikiranira hafi amazi atararenga inkombe. Inkari zirimo poroteyine nyinshi ahanini ziba zimeze nk’izifite urufuro.

 

  1. Ibimenyetso bikaze

 

Iyo bitinze kuvurwa, haza ibindi bimenyetso birimo kureba ibicyezicyezi, umutwe uhoraho, isereri igendana no kwitura hasi, umunaniro uhoraho, gucika intege no kumara igihe utajya kunyara. Ibi bije haba hakenewe kwitabaza muganga byihuse kugirango baramire umugore n’uwo atwite.

 

  1. Kutagira ibimenyetso

 

Hari abagore bagira preeclampsia ariko ntibagaragaze ikimenyetso na kimwe cyo kuyirwara. Aba baba bafite ibyago kurenza abagaragaza ibimenyetso doreko benshi twibuka kujya kwa muganga iyo tubonye ibimenyetso by’indwara.

Niyo mpamvu ari byiza kwipimisha ku buryo buhoraho igihe cyose utwite kugeza ubyaye.

Ese iyi ndwara ishobora kuvurwa?
Ni gute nakirinda iki kibazo?

 

Ni aho mu nkuru yacu itaha.

1 comment

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s