Ubuzima

Hawa: Agace ka 25

Ese Mana yanjye uyu munsi umwe ampaye koko urarangira hari icyo ngezeho?

 

Charles amaze kumbera ikibazo gikomeye. Nabitekerejeho bihagije ariko nkabura umwanzuro pee.

Nafashe umwanzuro wo kubibwira Paul akangira inama ariko yari yagiye mu kwa buki. Naramuterefonaga buri gihe nkumva ari kumwe na Housna nkabura aho mpera. Bari baragiye muri Guadeloupe bagombaga kumarayo icyumweru.

 

Nahisemo kuvunira ibiti mu matwi nterera agati mu ryinyo. Uko byamera kose kuva Housna atari mu gihugu, bivuze ko Charles ntacyo azakora mbere y’uko bagaruka. Aho kumuha ubusugi bwanjye nakemera ngapfa.

 

Gusa mu gutegereza nararaga ntekereza nkirirwa ntekereza. Gusa byose nta kintu byatangaga umunsi ku wundi naburaga icyo nakora. Ese ubu noneho byagenze gute koko? Ubanza Imana yafunze ubwonko bwanjye ngo ntakomeza imigambi mibisha pee.

 

Ikibazo kindi mfite, Charles yampaye umunsi umwe, none hashize iminsi 7 yose ntaramwitaba nawe yaranyihoreye? None se ubu we ari gupanga iki koko?

 

Buri bucye ba Paul na Housna bakagaruka nagiye kubona mbona Charles anyoherereje ubutumwa: “Wiriwe Hawa. Narategereje ariko kwihangana kwanjye kwarangiye. Fata umwanzuro. Ndagutegereje nimugoroba iwanjye”

 

Nayobewe icyo nakora. Ikintu kimwe nzi neza ni uko ntazatanga umubiri wanjye nk’ikiguzi. Noneho ikibazo Charles uko mufata rwose ntibinyemerera kuryamana na we. Namufataga nka musaza wanjye nubwo yanyuzagamo agashaka kuntereta.

Nahisemo kwemera ubutumire bwe nkajyayo nkamwinginga bwa nyuma. Yabyanga nkabibwira nyina byose. Nubwo ntazi niba hari icyo bizatanga ariko nzagerageza nyine ngo uhiriye mu nzu ntaho adapfunda imitwe

 

N’umutima ushavuye nagiye kwa Charles nimugoroba nkuko yari yabinsabye.

 

-Mwiriwe Charles

-Nari ntangiye kwibaza niba uza cyangwa utaza. None wafashe uwuhe mwanzuro Hawa?

-Umva Charles, nshaka ko tuvugana dukomeje. Urabizi turi inshuti

-Hawa rekera aho ubwo bwenge. Nshaka kumenya ikintu kimwe. Urampa cyangwa ntumpa?

-Charles, urabona..

-Nshaka igisubizo kimwe. Yego cyangwa oya

-Ni Oya. Sinaryamana nawe nk’ikiguzi rwose

-Hawa rwose jya woroshya ibintu. Ngwino nkwereke aho tujya tuganire birambuye

 

Nubwo yari ari kundakaza naramukurikiye. Twinjiye mu cyumba nsanga hashashemo umukeka munini mwiza, hari akameza gato kariho Bibiliya. Ndabizi ko Charles ubusanzwe yubaha Imana kandi rwose abigaragaza. Ariko uko iyi minsi yanyiyeretse nahise mvuga nti burya koko na Rusiferi yahoze ari malayika ukomeye mu ijuru

 

-Icara Hawa. Ushaka kunywa iki? Soda cyangwa umutobe w’imbuto? Cyangwa ikindi kintu?

 

Nahise nyoberwa noneho nawe agakino agiyemo. Yego asanzwe ari umuntu mwiza ariko ibi byo birantunguye. None se ashaka kugera kuki?

 

-Oya nta kintu nshaka

 

-Urakoze cyane. Noneho nshaka untege amatwi witonze kandi wihangane ntunce mu ijambo. Icya mbere nishimiye ko ukiri isugi utigeze wiyandarika ngo wangize umubiri wawe. Ibyo rwose ujye uhora ubyishimira kuko ku myaka yawe, ubwiza ufite, kuba ukiri isugi byakemerwa na bacye. Wari uzi neza ko uzabona uburyo bwo kumbuza kuvuga ibyawe, ukagenda unsaba iminsi nkayiguha ariko nanubu wabuze icyo gukora. Nshaka rero aha uhite uhamenyera ko mu bwenge bwose waba ufite haba hari undi ukurenzeho wa mugani ngo hejuru y’inkoko haba hari dendo. Ni cyo nashakaga kukwereka buriya. Ni nka kwa kundi waba uri mu nzu umuntu akagusangamo ukamuhunga ugana ku gikuta. Nugera ku gikuta bizaba birangiye kuko ntuzaba ukibashije gusubira inyuma uzahagarara. Nawe nibyo byakubayeho. Nkubwize ukuri iyo wemera ko turyamana simba nanjye nabyemeye kuko si cyo nari ngendereye. Nashakaga kukwereka ko uri mu nzira mbi kandi ko mu gukomeza kugaragura abantu uko wishakiye amaherezo ingaruka ari wowe zizagarukaho. Byose nabikoze ngutera ubwoba. Nagirango umenye uburemere bw’ikosa ryawe. Ibyo wakoreye Housna ni bibi cyane, ni ubuhemu buvanze no kwikunda. Ntiwakabaye waramukoreye biriya byose, mu gihe we agufata nka murumuna we. Ibyo ni ukwikunda rwose no kudashima.

Umunsi umwe wanyoherereje ubutumwa bugufi wibeshye. Ariko mu kubusoma nasanze bwari bugenewe Fatuma. Nahise menya ko hari umugambi mubisha ufitiye Housna. Kuva uwo munsi nagushyiriyeho maneko. Ndetse na wa musore usabiriza wahamagaye Housna ndamuzi kuko maneko wanjye hari amakuru nawe yamukuyemo kuko aho ifaranga rikubise burya hahita horoha.

Ibyo byose nabikoze nshaka kumenya neza mu by’ukuri icyo ugamije, gusa amakuru mfite ntiyuzuye yose ariko arahagije. Ubwo rero Kizito yabwiraga mama ibyo yabwiwe n’umukazana we Fatuma, nahise menya ko ari wowe watanze ayo makuru. Rero nshaka ubohoke umbwize ukuri. Umbwire icyo ugamije kugeraho. Urabizi ndagukunda cyane nka mushiki wanjye niyo mpamvu utigeze unyitabaza ngo ngutenguhe. Nshaka kugusubiza mu nzira nyayo.

Mbwira byose. Ndahiriye kuri iyi Bibiliya ko nta na kimwe nzavuga haba none, ejo kugeza mpfuye. Ariko ubanze unsobanurire bihagije kuko sinshaka ko ukomeza ubu buyobe urimo

 

Amagambo yose Charles yavugaga nayumvaga amarira azenga mu maso. Gusa narihanganye ndabohoka mubwira byose nta na kimwe nsimbutse.

 

-Hawa, ibyo byose wabikoze ngo ubone amafaranga koko? Ntuzi ko Imana ari yo itanga koko? Wavukiye mu muryango ukennye, mukuru wawe ava mu ishuri ndetse musaza wawe ntiyabashije kwiga kaminuza ku gihe dore ari kwiga arihirwa n’umugore we. Wowe wagize amahirwe uhura na Housna na papa we akwishyurira kaminuza urayirangiza. Iyo ugize akabazo koroshye urambwira nkagufasha. Nkuguriza ntategereje ko uzanyishyura kuko mbikora nikorera. Housna yakoze uko ashoboye kose ngo utagira icyo ubura. Ntuzi ko Imana ariyo itanga byose koko? Nukomeza kwirwanirira ushakira ubukire mu nzira nk’izo ntabwo uzabona kandi uzicuza nyuma

 

-None se nkore iki Charles?

-Ugomba kwihana ukabwiza ukuri Housna ndetse ukanasaba imbabazi musaza wawe Paul

-Oya weee. Byo sinabitinyuka. Umuryango wanjye wahita unshyira mu kato, Fatuma na John bagatandukana, Housna n’umuryango we bakanyanga, Housna akanga Paul nanjye Ibrahim akanyanga

-Hawa haracyari igihe. Nubwo bigoye ariko ugomba kubinyuramo kuko ni hahandi ukuri kuzamenyekana kandi nibyo bizaba bibi kurutaho. Ikinyoma ntigihabwa intebe kabiri kandi amaherezo kiratsindwa. Iyo utahuwe bitinze uhita ukurwaho icyizere. Bivuge hakiri kare, batarabyimenyera ubwabo

 

Nakomeje kurira no kuboroga gusa ngahumurizwa nuko ntigeze nibeshya kuri Charles. Uburyo yari yanyihindutse ngo ashaka ko turyamana sinabyiyumvishaga kuko ubusanzwe ari imfura ubona atagenzwa no gushaka mu maguru hanjye. Yarakomeje ati:

 

-Hawa, nturi umuntu mubi, ahubwo wenda ushaka gukira utavunitse. Ubwenge wakoresheje mu gutuma abantu bashwana wabukoresha mu gushaka icyaguteza imbere. Ndabyumva umuryango wawe uzakurakarira ariko bizashira. Mama wawe na mukuru wawe ntibazaguca nkuko batazaca musaza wawe Paul. Housna ni imfura azakubabarira ndabizi kandi nanjye nzamukwingingira akubabarire. Niba akunda Paul koko, azamubabarira kandi nawe niba Ibrahim agukunda azakubabarira. Hawa, wowe na Paul mugomba kubwira mama wanyu, Assia, Housna, John na Ibrahim kuko nibo ahanini biri kureba. Nutabikora uzahora ubayeho wishinja ubuhemu kandi nta mahoro uzagira. Erega amahoro y’umunyabyaha ntayo. Kandi amahoro mu mutima nibwo bukire bwa mbere. Nzakuba hafi buri gihe kandi sinzakurekura kandi nzi neza ko nyuma uzabona ko ari byo byari bikwiriye

 

-Urakoze Charles. None se kuki hejuru y’ibyo uzi byose, ushaka kunkura muri iyi nzira?

-Kuko uri inshuti yanjye kandi ufite agaciro imbere yanjye. Nako si wowe gusa ahubwo buri muntu mu muryango wawe mwubaha nk’uko nubaha abo mu muryango wanjye.

 

Amagambo ya Charles yarantunguye. Cyangwa arankunda?

-Charles reka nkubaze ikibazo

-Mbaza Hawa

-Ubwo twajyaga mu majyepfo nakubajije ko ufite fiyanse umbwira ko uwo wakundaga wasanze umutima we yarawuhaye undi muntu. Ese ni jyewe wavugaga?

-Oya ntabwo ari wowe navugaga pe. Gusa uwo muntu navugaga ni inshuti yawe

-Ni nde Charles? Mbabarira umumbwire nshaka kumumenya

 

 

Ese aramumubwira? Ese ubundi ni nde? Hagati aho se, iyi nama ya Charles izakurikizwa?

 

 

Ntuzacikwe agace gakurikira

1 comment

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s