Ubuzima

Kwirabura mu matako: Ikibitera n’uko wabivura

Niba wowe hatirabura ariko ushobora kuba warabonye cyangwa warumvise abantu birabura hagati y’amaguru mu matako kandi banaba basanzwe birabura ugasanga ho harirabura kurutaho, naho yaba inzobe ukaba wacyeka ko yitukuje aho ho hakanga. Ndetse bamwe binagera mu mayasha no hejuru y’igitsina ahaba insya.

 

Bikunze kuba ku babyibushye cyane ariko n’abatabyibushye byababaho kuko impamvu zibitera zimwe muri zo zaba ku bantu bose nubwo umubyibuho ukabije ari imwe mu mpamvu

 

Muri iyi nkuru tugiye kurebera hamwe impamvu zinyuranye zibitera, ndetse tunavuge bimwe mu byo wakora ugatuma hongera gusa n’ahandi.

Biterwa n’iki?

Nkuko twabivuze hejuru biterwa n’impamvu zinyuranye aho twavuga zimwe muri zo:

 

  • Kwikubanaho kw’amaguru cyane cyane ku bakunze kugenda n’amaguru ubwo hano ahanini biba bireba abagore bambara amajipo cyangwa amakanzu
  • Kutaringanira kw’imisemburo cyane cyane ku bagore batwite, bonsa, bari mu mihango cyangwa afite ubundi burwayi butera imisemburo kutaringanira
  • Kuba ufata imwe mu miti nk’ibinini bikoreshwa mu kuboneza urubyaro cyangwa imwe mu miti ya kanseri
  • Gutwikwa n’izuba
  • Kugira uruhu rwumagaye
  • Kwambara imyenda igukanyaga cyane nk’amakoboyi
  • Kugira melanin nyinshi muri ibyo bice
  • Kuba urwaye diyabete

 

Ni ba nde bagira ibyago kurenza abandi?

Nkuko twabivuze usanga bikunze kuba ku bantu babyibushye cyane kubera kugenda uruhu rukikubanaho. Gusa si bo gusa ahubwo n’abarwaye diyabete ndetse n’abafata imwe mu miti yavuzwe ibitera baba bafite ibyago kurenza abandi

 

Uko wabyivura

 

Hari uburyo bunyuranye wakoresha ukivura kwirabura cyane mu matako. Gusa hano tubanze tukubwireko ibijyanye n’uruhu bisaba kutarambirwa niyo mpamvu niyo hashira ibyumweru cyangwa ukwezi utarabona impinduka ukwiye kutarambirwa

 

1. Amavuta ya coconut n’umutobe w’indimu

Indimu zikungahaye kuri vitamini C ikaba izwiho kurwanya ikibazo cyo guhinduka uruhu. Amavuta ya coconut yo azafasha mu gutuma uruhu rworohera birinde ibimeze nko gukoboka kubera kwikubanaho

Mu gukora uru ruvange uvanga umutobe wavuye mu gisate cy’indimu n’utuyiko tubiri tw’amavuta ya coconut.

Ubisiga ahari ikibazo ukamera nk’uhakorera massage mu gihe kingana n’iminota 10 hanyuma ukahakaraba n’amazi meza ukihanagura

 

  1. Isukari n’ubuki

Isukari hano iba ije mu guhanagura imyanda cyangwa se uturemangingo dushaje twaba twaripakiye ku ruhu.

Gukora uru ruvange uvanga umutobe w’igisate cy’indimu, akayiko k’isukari n’akayiko k’ubuki. Ubisiga buhoro buhoro ahari ikibazo ukabirekeraho iminota 15 nyuma ukoga amazi ukiyunyuguza ukihanagura

3. Bicarbonate

Iyi nayo izwiho gufasha mu bintu byinshi. Ariko kuko ari ubwoko bw’umunyu usabwa kuyikoresha uyitondeye ugakurikiza neza amabwiriza. Kuko kuyikoresha nabi bishobora kwangiza uruhu

Mu kubikora uvanga bicarbonate n’amazi ku gipimo kingana. Aho wapimye bicarbonate niho upima n’amazi. Ukabisiga nk’ukora mask ukabirekeraho mu gihe cy’iminota 15 ubundi ukiyunyuguza

4. Igikakarubamba

Igikakarubamba cyangwa ibigikomokaho ariko bitavanzwemo ibindi bibonekamo aloin ikaba izwiho gucyesha uruhu. Ucyisiga nk’uwisiga amavuta ukabirekeraho. Ntabwo byo ubyoga ubirekeraho ijoro ryose

5. Ikirayi

Mu kirayi habonekamo catecholase izwiho gutuma uruhu rugarura umwimerere warwo. Ndetse uretse mu matako cyo wanagisiga ahandi ku ruhu hari utubara.

Mu kubikora ukata ikirayi ukajya ugisigiriza aharwaye mu gihe cy’iminota 15. Nyuma ukahoga n’amazi meza ukihanagura

 

Icyitonderwa

 

Mu gihe cyose uri kwivura ni byiza gukurikiza amabwiriza kandi ukibuka kwirinda ibituma amaguru yongera gukubanaho.

 

  • Ambara utwenda twa collant dukoze muri nylon niba ugiye kwambara ikanzu cyangwa ijipo, kandi ukaba uteganya kugenda n’amaguru
  • Niba uri bugende n’amaguru irinde kwambara amapantalo ya koboyi aguhambiriye cyane ahubwo wambare imyenda ituma uruhu rubasha guhumeka
  • Irinde kwikuba cyane niba ukunda kogosha ubwoya bwo ku maguru, kuko kuhakuba kenshi na cyane biri mu byangiza uruhu bikahatera kwirabura cyane. Insya uzogoshe byibuze rimwe mu cyumweru birahagije.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s