Ubuzima

Hawa: Agace ka 23

Namaze umunsi wose ngerageza guhoza no guhumuriza Assia. Byari byamukomerekeje cyane ku buryo atari no kubasha kujya ku mazi. Ubu se iyo aba yarumviye Darius akazi ko mu kabari akakareka nk’uko yabimusabaga ntaba ari kuririra mu myotsi koko?

 

Twasabye Paul kudushakira amakuru yose afatika yerekeye Darius atubwira ko amakuru yahawe avuga ko Darius ubu yibereye mu Budage.

 

Mama, Paul nanjye twiriranywe na Assia tugerageza kumuhumuriza umunsi wose. Yari akeneye ko tumuba hafi kandi tukamwereka urukundo. Bwa mbere mu buzima ni jye natetse. Ubusanzwe iwacu hatekaga Assia, namufashaga gutegura ibyo guteka ariko sinajyaga njya mu gikoni. Kandi ntiyajyaga abyinubira.

 

Akazi ko mu rugo burya nako karavuna. Niriwe muri ibyo byose nteka ku manywa na nijoro ariko nagiye kuryama numva naniwe cyane. Nahise nibaza abatajya baha agaciro abakozi babo bo mu rugo cyangwa abagabo bataha yasanga bitarashya ugasanga aratonganya umugore ngo ko nta kindi aba yakoze kuki bitarashya.

Nawe se koza ibyombo, gusukura mu nzu no hanze, gufura niba bihari, kwita ku bana iyo bahari, kujya guhaha ibyashize, ugirango ntibitwara umwanya n’imbaraga.

 

Naryamye naniwe nuko bucya numva nta mbaraga mba ndetse kubyuka.

 

Nari gisinziriye nkangurwa na Paul

 

-Hawa kanguka ufite umushyitsi

-Ni nde unsuye iki gitondo se?

-Ni Charles

-Mubwire abe antegereje mbanze niyuhagire dore naraye ntoze (umunaniro watumye njya kuryama ntanakarabye)

 

Hari hashize igihe ntabonana na Charles gusa akunda kumpamagara kenshi. Duherukana anjyana kureba Ibrahim mu majyepfo

 

-Waramutse Charles. Umeze ute se?

-Hawa meze nabi kandi ni ikosa ryawe. Ni wowe wabiteye

-Ikosa ryanjye? Nsobanurira sindi kubyumva neza

-Nari nziko uri inshuti yanjye ndetse uri umwana mwiza ariko warantengushye

-Banza wicare utuze Charles ubundi umbwire. Ko ntari gusobanukirwa se?

-Kuki wabwiye Fatuma ko papa wa John yabyaranye na mama? Ni wowe wabivuze cyangwa si wowe?

 

Nahise ntungurwa. Aya makuru yose Charles yayakuye hehe? Fatuma se yaba yaramvuyemo akabibwira John? Oya ntiyari kubitinyuka kuko byari gutuma batabana. Nari nkiri kubyibaza mbikurwamo n’urusaku rwa Charles ambwira kumusubiza vuba

-Vuga buhoro Charles. Sinshaka ko abantu batwumva. None se wabibwiwe na nde?

-Nta wabimbwiye. Hawa ntukabone ncecetse ngo ugirengo ndi ikigoryi. Mama yambwiye ko umugore wa John yabwiye papa we iyo nkuru. Kandi nahise nibuka ko Fatuma ari inshuti yawe ndetse n’inshuti y’umuryango wawe. Rero nta handi yaba yarakuye ayo makuru, ni wowe wabimubwiye, nuko papa wa John abibaza mama azi ko ari we wabivuze.

 

Nabuze aho mpera mbihakana

 

-Charles ni byo ariko mbimubwira sinari namubwiye kujya kubibwira uwo mugabo. Kandi umenye ko ari wowe wabimbwiye

-Nabikubwiye ariko ntagutumye kubivuga. Byarambabaje cyane kandi narakurakariye ariko dushobora kubicyemura mu mahoro

-Ushaka kuvuga iki?

-Niwemera gukora ibyo ndi bugusabe, nzaceceka. Ariko niwanga nzabwira ababyeyi bawe, mbwire Housna na Ibrahim ibyawe byose

 

 

Nahise nseka cyane nuko ndamusubiza

 

-Charles wizana iterabwoba hano. Kandi unabivuze rwose Housna ntiyakwizera ndetse na Ibrahim wanjye yaguhindura umusazi

-Wikiyemera Hawa. Umugani uravuga ngo “umuntu utareba nakubwira ko yagutera ibuye, jya umenya burya ko arikandagiyeho” rero ntukine nanjye sinje kuvuga ibi byose ntafite ibyamfasha kwerekana ukuri w’ibyo mvuga.

 

-Ngaho mbwira icyo ushaka ko nkora

 

Charles yarabanje yubika umutwe, arongera arawubura andeba mu maso neza. Nari mbizi ko agiye kunsaba ikintu kigoye cyangwa kitari bunshimishe. Agicecetse ndamubwira

 

-Mbwira. Ushaka ko nkora iki

-Nshaka kubikubwira mu gutwi neza umuyaga utabigurukana. Aranyegera nuko aranyongorera. Nari ngiye kwitura hasi kubera ibyo yari ambwiye. Sinabyiyumvishaga kandi sinumvaga ko ari byo yansaba. Yansabye ibidashoboka pee. Mana yanjye aha ndahikura gute ho?

-Charles, wasubiramo ibyo umaze kumbwira nkumva niba numvise neza cyangwa numviranye

-Nagusabye ngo tuzaryamane rimwe gusa bizaba bihagije. Ni ibintu byoroshye Hawa, niyo wampa ituru imwe gusa nzanyurwa mpite nceceka ibanga ndibike

-Ngo byoroshye? Kuri jye ntibyoroshye Charles. Urabizi mfite fiyanse uranamuzi. Ni nawe wanjyanye kumureba ubwo nari naraburanye na we. Ni gute watinyuka kunsaba kuryamana nawe koko

-Hawa wivuga menshi. Ibintu ni bibiri. Uremera nceceke cyangwa urahakana mbivuge

-Charles sinabitinyuka. Niba utari unabizi ndacyari isugi kandi ubusugi bwanjye nabubikiye uzambera umugabo ijoro rya mbere tuzararana niyo mpano nzamuha

-Mbega byiza. Burya uri n’isugi. Ubwo rero ni jye uzitwa umugabo wawe kuko ari jye nzaba ngutwaye ubusugi

-Charles ubanza ariko noneho wasaze. Uri kurota ku manywa

-Hawa, mfite ibihamya by’amanyanga n’ubuhemu bwawe byose. Bitekerezeho neza. Nguhaye iminsi itatu gusa, itarengaho n’umwe. Nibitaba uko ngusabye, uzabage wifashe nzaba navuze ukuri kose

 

Yavuze gutyo ahita asohoka mu nzu aragenda atanasezeye. Namurebye agenda muzunguriza umutwe. Natangiye kumuvuma mu mutima.

Charles nahereye kera mufata nk’inshuti. Naramwiyambazaga agahita anyumva. Ubu nibwo menye ko ibyo yankoreraga byose yari afite icyo anshakaho akabura uko akivuga none abonye aho ahera, abonye iturufu. Yarabibonaga ko mufata nk’inshuti isanzwe, none ashaka gufatira ku kibazo gihari ngo abone ibyo yifuje kuva kera. Narababaye ndetse cyane. Nintemera, ibyanjye byose birajya ku karubanda ubundi isi yose imbone, Hosuna anyange, mama anyange. Ikibi cyane Paul na Housna ntibazaba bakibanye, nuko ibyanjye byose napangaga biyoyoke ndetse na Ibrahim ntiyaba akinshatse kuko ntiyakemera kubana n’indyarya, umuhemu nkanjye. Ibyo naruhiye byose nkaba nararuhiye ubusa. Ku rundi ruhande ninemera arahita aceceka

Ariko ikiguzi ashaka kirahambaye cyane.

Ubusugi bwanjye mbukomeyeho kandi bufite agaciro kuri jye kurenza zahabu

 

None ikibazo bushaka gutwarwa na Charles, twikundaniraga bisanzwe, mbumuhe nk’ikiguzi koko? Ariko ntabwo anzi. Imana yandemye yonyine ni yo inzi ikamenya n’ibyanjye.

 

Numvise bindenze njya mu cyumba ndarira kuko nari ngeze aho ngomba gufata umwanzuro ntawe ngishije inama. Mbwire nde se?

Ni nde wamfasha gucyemura iki kibazo? Ukuntu nahoze niyemera ngo nzi gutwara abantu uko nshaka none ni jye agakino gahindukiyeho

 

Ariko uko byamera kose Charles ntazambonera ubwambure. Nzashaka inzira zose nacamo ariko ikibazo gicyemuke tutaryamanye. Jyewe Hawa ntanzi. Sinavukiye gutsindwa uko byamera kose. Aje kuba igisitaza mu nzira yanjye ariko ngomba kumukura mu nzira ngakomeza urugendo. Ijambo rya nyuma ni jye ndifite

Ahubwo ngomba gutekereza neza uburyo bwo gucecekesha Charles. Uyu munsi ahubwo ndirirwa nkora neza gahunda yo kumucecekesha.

 

Assia yinjiye mu cyumba asanga ndi kwihanagura amarira

-Hawa noneho ni wowe uri kurira? Wowe se wabaye iki?

-Assia ndi kurizwa nawe. Ibyo Darius yagukoze byambabaje cyane

 

Sinari kubwira ukuri Assia. Nari kumusobanurira gute ubwo. Ahubwo se ubu Paul we mubwire cyangwa mbage nifashe?

 

Nkiri muri ibyo bitekerezo nahise mbona Housna ampamagaye

 

-Allo

-Hawa itegure ndaje tujyane kureba umutayeri ambwiye ko ikanzu y’ubukwe ari hafi kuyisoza ambwiye kuza kwigera akabona kuyitunganya bwa nyuma.

-Sawa ndagutegereje

 

Ibi binyongerera imbaraga zo gushaka uko nacecekesha Charles. Ubu bukwe niryo shingiro ry’umukiro wanjye.

Niba Charles yiyita Adamu nanjye ndaje mubere Eva ubundi muhe itunda arye. Kandi ndaba ndihawe n’inzoka.

Nategereze gusa abone Hawa yakinishije

 

 

Ese Hawa arategura gukora iki? Ese natsindwa, Charles koko azabivuga cyangwa yamukangaga gusa?

 

Biracyaza…

6 comments

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s