Ubuzima

Hawa: Agace ka 22

Umutima wanjye wakomeje kudihagura. Ashaka kumvikanisha iki se ubu? Uyu mugore ashaka kunyivangira muri gahunda.

 

-Nonese ni iki gitangaje aho koko tanti? Ni gute nari kumenya ko Fatuma azabigenza kuriya? Jyewe namuhuje n’uriya muryango kuko nashakaga kumufasha kubona amafaranga ariko yarantengushye ndetse uko yitwaye nanjye byarantunguye. Ikimenyimenyi n’ubukwe bwe sinabutashye. Hanyuma ikindi kuba Paul na Housna bakundana koko hari ubwo ari jye nabahuje? Gusa kuko Paul ari musaza wanjye na Housna akaba inshuti yanjye barabimbwiye bose ndabishyigikira. None ubwo ibyo byose ni iki gitangajemo?

 

-Ibyo byihorere. Ahubwo mbwira. Kuki wanze kuba inshuti n’umuhungu wanjye Baptiste?

 

-Ni uko nkundana na Ibrahim nta kindi.

 

-Nta kibazo Hawa. Gusa kumva ko wanze Baptiste ugakunda Ibrahim byarantunguye. Ukuntu nagucyekaga ubanza nkwibeshyaho. Nakubonaga nk’umukobwa ukunda ibintu nkumva utakundana n’umusore w’umukene nka Ibrahim. Ngaho jya kureba mugenzi wawe Housna ibibazo byanjye byari ibyo.

 

Iki kiganiro nagiranye na tantine Fatina cyarantunguye gusa kinamvanga mu bwonko. Yego nahikuye neza ariko se ibi byose yabimenye ate? Ibi byose ko nzi ko tubiziranyeho turi batatu, we ajemo ate? Niyo yanshyiraho maneko nziko zitamvumbura kuko singisura Fatuma. Ni we rimwe na rimwe uza kundeba kandi icyo nticyaba ikibazo kuko namumenye kubera ari inshuti ya mama.

Icyakora kuba yumvise ko gukundana na Ibrahim bitangira umukunzi w’ibintu binduhuye umutima wenda ntazacyeka ko Paul akurikiye kuri Housna umutungo.

Ariko nanone byanyeretse ko Fatina ari inyaryenge ku buryo ntatuza ngo nterere agati mu ryinyo. Ngomba gukomeza kwitonda kuko ashobora gukomeza kwibaza akanaperereza byinshi

 

Nubwo numvaga mu mutwe byivanze nagumanye na Housna umwanya utari muto nuko ngeze aho ndataha.

 

Nashuhuje mama mpita ngana mu cyumba cyanjye. Nkigeramo nasanze Assia aryamye ari kurira

 

-Assia wabaye iki?

 

Aranyihorera

 

-Assia wambwiye ikiri kukuriza?

 

Aho kumbwira ahubwo arushaho kurira cyane no kuboroga

 

Nabonye bindenze mpita njya kureba mama ndabimutekerereza.

 

-Mama wowe waba uzi ikiri gutuma Assia ari kurira?

-Oya yambwiye ko ananiwe akigera hano. Ubu nari nziko yasinziriye ahubwo. Tujye kureba icyo yabaye

 

Twaramwinginze akomeza kutwihorera ariko mama akomeje kumurembya amwinginga ageze aho aratobora aravuga

 

-Ni Darius

-Darius yabaye iki?

-Yagiye hanze atambwiye

 

Twahise turebana jyewe na mama twumiwe

-None se ni gute ajya hanze atakubwiye? Ese urabizi neza ko yagiye?

-Yego. Nagiye iwe kumureba kuko terefoni ye itacagamo. Umuturanyi we yambwiye ko amaze iminsi ibiri agiye

 

Mbega Darius! Burya mu bagabo koko habamo n’abahemu n’abagome. Darius nyuma yo gutsindira amafaranga muri betingi ahise yumva ko ari umukire nuko yiyemeza kwigira hanze ntacyo abwiye mukuru wanjye koko? Ukuntu yanze Emile w’umukire none ndebera ibyo Darius amukoze

 

Mama yahise amubwira:

 

-Umva mwana wa. Umugabo ugukunda bya nyabyo ntiyakishimira kubona urira. Ahubwo niba Imana ikweretse uwo ari we hakiri kare ni uko ifite umugambi mwiza igufitiye. Nubwo bibabaje ariko ikuremo umubabaro n’agahinda. Umunsi umwe ndabizi neza Darius azicuza kuba yarakubabaje.

 

Mama yagumanye natwe akanya gato nuko arasohoka adusiga aho na Assia. Gusa yari atarabasha guhora

 

-Assia rekera aho kuririra iriya mburamukoro. Wamunambyeho ubabarana na we bihagije none ni ibi akwituye? Aho kwishimana mu byo amaze kubona ahisemo kujya kuyarira hanze wenyine? Mwibagirwe ahubwo wongere uhe amahirwe Emile

 

-Ese uracyeka ko ari ibintu byoroshye guhita wikuramo umuntu? Wowe se ko Ibrahim byakunaniye kumwikuramo ahubwo ugapfukama kugirango musubirane

-Ariko biratandukanye Assia. Jyewe Ibrahim ni jye nari namukoshereje, nagombaga rero guca bugufi

 

-Hawa, Darius arampemukiye ntiwabyumva. Yanyijeje ko tuzabana ndabyizera koko kugeza n’aho nemeye ko anyambura ubusugi none dore ibyo ankoreye

 

-Ngo iki? Assia! Wabaye ikigoryi cyane aho ngaho. Wirengagije inama zose za mama ukora ubwo bugoryi? Urwo rukundo rutuma urenga ku nama ntirwari kuguhira

 

Assia yaraye ijoro ryose arira. Bwakeye ubona yanoze yarembye rwose. Umukobwa w’umunyamutima, inyangamugayo, akizera umusore w’umuhemu. Darius ntacyo ahombye kuko batandukanye yaramwambuye ubusugi. Icyo nzi cyo umunsi umwe nzahorera mukuru wanjye. Gusa ndahamya ko nawe ibimubayeho abikuyemo isomo.

Ubusanzwe amafaranga niyo atuma duhindura imyitwarire tukaba twakora ibyo tutateganyaga gukora. Ariko aha ho Assia yararengereye. Kuryamana n’umuntu noneho w’umukene ngo ni uko akwijeje kuzabana? Nahise ntekereza abakobwa benshi bagwa muri uyu mutego. Umusore akaba yarabuze uko muryamana akakubeshya ko muzabana. Hari n’abemera bagafata irembo ubundi si ukumwiha ugasizora yamara kuguhaga ukazumva ari mu rukundo n’undi mukobwa wowe ugatahira aho. Ubundi umukobwa yagakoze imibonano kuko yumva bimurimo abishaka, atabikoreye ko yijejwe ibintu runaka nk’impano zihenze,a amfaranga cyangwa umubano.

Ububabare bwa mukuru wanjye bwahise bundenga mpita niyumvisha urwo mukunda koko.

Guhemukirwa n’uwo ukunda wakakurinze ibyo byose birababaza cyane. Uba wumva isi ikubanye nto ukabura aho ukwirwa.

Kugirango byibuze ibi bimuvemo vuba nahisemo kumwinjiza mu myiteguro y’ubukwe bwa Paul na Housna, wenda bizamufasha guhindura intekerezo

 

Biracyaza…

1 comment

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s