Ubuzima

Hawa: Agace ka 21

Nawe akitubona yahise atangara ati:

-Housna? Hawa? Murakora iki hano?

 

Housna ahita amusubiza ati:

 

-Baptiste ndi iwacu kandi urabizi Hawa nawe ni inshuti yanjye

 

Tantine Fatina aguye mu kantu ahita abaza

-Baptiste, uziranye n’aba bakobwa?

-Yego twariganye muri kaminuza

 

Housna arakomeza

 

-Maze tukimenyana kuva ku ishuri Baptiste yateretaga Hawa. Iyo amwemerera ubu wari kuba ubaye nyirabukwe

 

Fatina yahise andeba nk’icyo imbwa ihaze. Mbese yahise yerekana ko ntamubera umukazana. Icyakora burya iby’Imana birikora. Nanjye kuba naranze Baptiste mbyungukiyemo. Uyu mugore w’umwaga ntiyambera mabukwe. Reka reka.

 

Fatina yahise yereka Baptiste umuryango wose. Umuryango wose wari wishimiye ko umwana abonetse nyuma y’igihe kinini yaraburanye na nyina. Nahamaze akanya gato nanjye ndasezera ndataha.

 

Icyakora ubuzima buhora budutungura pee. Ukuntu Baptiste yashakishaga nyina kandi aziranye na Housna? Gusa nahise numva nishimiye ko noneho abashije kubona nyina yari yarabuze.

 

Kandi ndizera ko bigiye kongerera akanyamuneza Fatina akareka kujya andeba nabi iteka iyo ambonye

 

Mu nzira ntaha nagiye ntekereza inda ya Housna kuko nubwo byanshimishije ariko nanone byanteye kwibaza.

 

Nakomeje kwibaza ibibazo bikurikira:

 

Ese umugabo yatera inda kandi yari yambaye agakingirizo?

Ese iyi nda ubu si iya John?

Ese Housna yaba afite undi musore utari Paul?

Ese kuki Paul yahise yemera inda atazuyaje kandi yarakoresheje agakingirizo?

 

Ibyo bibazo byakomeje kundwanira mu mutwe

 

Hashize amezi agera muri atanu Housna na John batandukanye. Iyo batandukana yaramuteye inda, yari kuba yaragaragaye kera. Ibi byo ntibishoboka

 

Ese Housna yaba atendetse Paul undi mugabo? Ndacyeka hano igisubizo ari oya kuko byibuze buri minsi ibiri turabonana, nari kuba narabimenye. Kandi Housna ni inyangamugayo uko muzi ntiyatendeka.

 

None se birashoboka gutwara inda hakoreshejwe agakingirizo? Nkurikije ibyo batwigishije mu ishuri, ibi bishoboka gusa iyo agakingirizo kacitse. Aha ho niho hashoboka gusa.

 

Gusa ngomba gushaka ukuri nkakumenya kandi nasanga inda atari iya Paul sinemere ko abyirengera. Nzahita nkora uko nshoboye nemeze Housna kuyikuramo.

Ndabizi ni icyaha imbere y’Imana ndetse n’amategeko ahana ukuramo inda ku bushake, kandi n’ubuzima bw’umubyeyi bukajya mu kaga ariko sinakemera ko Paul arera umwana atabyaye.

 

Nakomeje kubitekerezaho cyane ibyo kuyikuramo numva ubwoba burantashye. Ni gute nakemeza Housna gukuramo inda kandi gutwita kwe biri mu nyungu zanjye? Nzabitekerezaho

 

Mu gutegereza ngomba gukora uko nshoboye nkakomeza kugendana neza na Paul kuko ntangiye kugenda mwishisha. Nawe reba ahise yemera ko inda ari iye kandi yarakoresheje agakingirizo. Kandi mu gitondo yari yambwiye ko agiye kubwira Housna imipango yose mfite ubundi byashaka bigapfa. Ndakomeza mbyigeho neza.

 

Iminsi yakurikiyeho yari iminsi ituje muri twe

 

Hagati aho Fatuma na John baje kubana. Kugirango ntataha ubukwe bwabo byansabye kwirwaza. Ibi byatumye ari mama na Housna bose ntawe ungiraho ikibazo cyangwa ngo agire ibyo ambaza.

 

Hagati yanjye na Ibrahim naho ibintu biri kugenda neza. Yazaga kunsura kabiri mu kwezi. Jyewe sinari nkimusura kuko mama yari yarambwiye ngo ninsubira yo nkarara nzagumeyo. Kandi ukuntu ari kure sinajyayo ngo ndare ntashye.

Umuryango we nawo dusigaye tubyumva kimwe, mbese ubu urukundo nirwo ruyoboye. Igisigaye ni ubukwe bwa Paul ubundi nkabona inoti nkigira hanze n’uwo umutima wanjye wihebeye

 

Amakuru yose yerekeye itike z’indege, gukodesha aho kuba, kwiga, byose bizatwara za miliyoni nyinshi. Rero hazakenerwa ubufasha bwa Paul.

Ibyerekeye inda byo twamaze kumenya ko baje kuryoherwa agakingirizo kagacika bakikomereza gahunda zabo amasohoro agacamo. Ni uko Housna yatwaye inda. Housna kandi yavuze ko namara kubyara azakoresha ikizami cya DNA kugirango Paul ashire amakenga ntakomeze gushidikanya ko wenda umwana yaba atari uwe.

 

Kandi kuko atashakaga kubyarira iwabo, yaremeye gahunda y’ubukwe ishyirwa vuba

 

Nubwo papa we byabanje kumubabaza kumva ko umukobwa we atwite ariko yaremeye ko ashyingirwa aho kugirango bizane ikindi gisebo mu muryango.

 

Umunsi umwe ubwo najyaga kureba Housna nkuko bisanzwe nasanze tantine Fatina yicaye ku rubaraza. Iyi minsi asigaye afite akanyamuneza aho yaboneye umuhungu we.

 

-Mwaramutse tantine Fatina

-Mwaramutse Hawa. Ngwino twicarane hano ngire icyo nkubwira

-Naje mama. Mbateze yombi

-Hawa mfite ibibazo byinshi ndi kwibaza kandi ndumva ushobora kuba wampa ibisubizo byabyo

-Sindi kumva neza ibyo mushaka kuvuga. Mbwira numve

-Birumvikana ariko ibyo nshaka kukubaza. Watanze Fatuma ngo abere umukozi iwabo wa John, nyuma Housna amufatana na John. Byatumye John na Housna batandukana maze abana na Fatuma, urabizi ubukwe bwarabaye.

-Narabyumvise ahubwo nanjye byarantunguye

-Ikibazo rero ndi kwibaza, ni gute nyuma yo gutandukana na John, Housna agiye kubana na musaza wawe Paul? Ntakubeshye ibi bintu biranshisha ndi kumva hari ikibyihishe inyuma.

 

Umutima wanjye watangiye kudihagura. Ndamusubiza iki se ubu? Jya utinya abantu bacecetse baba bafite byinshi batekereza mu mitima yabo. Kuva na kera uyu mugore narabibonaga ko azanteza ibibazo.

 

 

Aha se noneho Hawa arahikura?

 

Biracyaza

3 comments

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s