Ubuzima

Hawa: Agace ka 11

Nk’uko nari nabigiriyemo inama Housna, yashyizeho maneko wo kujya amenya igihe John na Fatuma bahura ndetse n’aho bahurira. Amakuru yose yamenyaga nanjye yahitaga ayampa atazi ko ari jye mbiri inyuma byose.

Kugirango nihutishe gahunda twahise dupanga gahunda na Fatuma nuko umunsi ugeze asohokana na John kandi bagombaga kuhava bakajyana hahandi yamukodeshereje.

Niko byagenze nuko ya maneko irabakurikira bageze mu nzu ihita ihamagara Housna. Nari ndi kumwe na we nuko ahita abwira umushoferi aradutwara atugeza kuri iyo nzu

 

Housna yakomanze ku rugi rwa Fatuma nuko nkuko twari twabipanze na Fatuma ntiyakingura. Twamaze isaha yose aho hanze dutegereje kugeza igihe John ari we wakinguye atashye.

Fatuma na we yari amuri inyuma amuherekeje. John agikingura yahise akubitana amaso na twe ahita yubika umutwe.

 

Nahise niyamira:

-Fatuma!!!Ni wowe koko? Ni gute koko utwara fiyanse w’inshuti yanjye?

 

Housna nawe yahise akoma mu mashyi by’akababaro ahita avuga:

-John, warakoze. Nashakaga kwirebera n’amaso yanjye niba ibyo nabwiwe ari ukuri.

 

N’umujinya mwinshi yahise asimbukira Fatuma ashaka kumukubita nuko ndamufata. Kugirango arusheho gukomeza ibintu, Fatuma yongeraho:

 

-Hawa umufatiye iki koko? Iyo umureka nkamuha isomo atazibagirwa. Iyo aba afata neza fiyanse we se mba naramumutwaye?

 

Ayo magambo yahise arakaza cyane Housna nuko atangira kurira. Namujyanye buhoro nuko turasohoka mushyira mu modoka turataha. Housna yararize nanjye numva ngize impuhwe. Gusa amazi yari yarenze inkombe. Yego ni jye nyirabayazana ariko John nawe iyo aba umugabo nyamugabo ntiyari kugwa muri uwo mutego. Noneho kugera aho yishyura inzu umwaka wose, ibyo ni we ubyiteye! Ikigeretseho ntacyo yavuze uwo mwanya byibuze ngo arengere Housna ariko twahavuye Fatuma akojeje isoni Housna. Nta mwana nta se koko!

 

Bwari bwije nuko ndataha. Nahise mpamagara Fatina musobanurira uko byagenze nuko musaba kuba yakita ku mukobwa we kuko aremerewe. Naratashye nuko mu gitondo mbyuka ndi bujye kureba uko yaramutse ariko mbanza kunyura kwa Fatuma kugira menye uko John yabyitwayemo tumaze kugenda.

 

Narakomanze

-Ni nde

-Kingura Fatuma ni Hawa

-Waramutse Hawa w’umurozi

-Waramutse Fatuma w’inzoka

 

Twahise duseka twese.

 

-Ariko sha Fatuma rwose ejo nagiriye impuhwe Housna ku buryo ameze. N’ubu ararembye

-Uratera umuntu inkota ukaba ari wowe urira? Ahubwo warakoze kuko uyu mupango wose jyewe ndi kuwungukiramo

-Kubera iki se kandi

-John ashaka ko twibanira

-Mubana? Gute ubwo

– Mumaze kugenda twasubiye mu nzu. Ngerageza kumuhumuriza mubwira ko Housna nashira uburakari azamubabarira. Ariko ambwira ko ari byiza ubwo yadufashe kuko mu mutima we ari jyewe nicayemo. Housna ntakirimo kandi nta nubwo azamusaba imbabazi. Ambwira ko mukundiye ari jye twabana

-None se Fatuma, wigeze utekereza ko nawe umunsi umwe yazakubeshya?

-Ntacyo bimbwiye. Apfa kunyambika impeta nanjye nkitwa Madamu John ubundi inoti nkaziryamamo. Nibyo bimfitiye akamaro.

 

Navuye kwa Fatuma numva nubwo mpemutse ariko ngiriye neza Housna. Mufashije gutandukana na John ufatafata. Iyo aba yarashatse Housna yazagira inshoreke nyinshi ndetse akabyara abana hanze nk’uko se yababyaranye na nyina wa Charles.

 

Muri iyo minsi nafataga umwanya wo guhoza no guhumuriza Housna. John we ntiyigeze anaza gusaba imbabazi icyakora ababyeyi be byarabatunguye. Ni uko urukundo rwa Housna na John rwageze ku musozo.

 

Ukuntu nitwaye umunsi tubafata, ni kimwe mu byatuma Housna adashobora no kunkeka kandi ntazi ko byose ari umupango wanjye disi. Nk’uko babivuga mu gifaransa koko “l’apparence est trrompeuse”. burya si byiza kurebera ku bigaragara gusa kuko umuntu ni mugari. Benshi bazi kwiyambika uruhu rw’intama kandi imbere ari ibirura n’amasega aryana. Ukwigiraho mwiza cyangwa inshuti si ko buri gihe aba agufitiye imigambi myiza, hari igihe aba afite ibindi agushakaho utazi cyangwa akaba ari gatumwa.

 

Hari imigani ibiri y’igifaransa ibivuga neza.

 

  1. Les eaux calmes sont les plus profondes (amazi adasuma niyo aba ari maremare)
  2. L’habit ne fait pas le moine (umwambaro wambaye siwo ukugira nyirawo, nk’urugero kwambara umwenda wa padiri ntibihita bikugira padiri)

 

Yombi iratwigisha kutarebera ku bigaragara ngo duhite twemeza ko umuntu ari mwiza. Kuba umugore ari igishongore, avuga neza, sibyo bimugira umugore w’umutima. Nyamara usanga kenshi tuvuga abantu tugendeye ku isura yabo, aho bakomoka, ubwoko bakomokamo, akazi bakora, uko bavuga, uko bambara, …

Byakabaye byiza ahubwo tubanje kumenya neza uwo muntu bya nyabyo mbere yo kugira umwanzuro tubafataho.

 

Kugirango mfashe Housna kongera gutuza nakundaga gutegura gahunda zo gusohoka nuko ngatumira Charles na musaza wanjye Paul. Numvaga yakabaye Ibrahim mu mwanya wa Charles ariko kuva mukubise urushyi sindongera kumubona. Ndamuhamagara ntiyitabe. Nanagiye iwabo nsangayo nyina anyamaganira kure nk’uwiyama isazi. Yanze kunyumva.

 

Gusa ngomba gushaka uko nkemura iki kibazo vuba na bwangu kuko sinshaka guhomba Ibrahim. Nitumara gufatisha amafaranga yo kwa Patrick, tuzahita twigira I Burayi, nuko mve mu bukene kandi mbe ndi kumwe n’uwo nkunda akankunda.

 

Ndumva gutunga ibya Mirenge ariko ntari kumwe n’uwo nkunda bitazatuma nishima.

 

Nicyo gihe ngo mbone byose icyarimwe.

 

 

Biracyaza…

6 comments

  1. narabivuze ko hawa ntacyazageraho ahubwo azabura nibyo yarafite( urugero: lbrahim), Reba yihereye amahirwe fatuma nubwo binyuze munzirambi kandi yabikoze aziko azigarurira Paul none aramuhombye.

    Like

  2. Paul Ni musaza we,ahubwo Hawa na Paul bafatanyije umugambi wo gutandukanya Housna na John noneho Paul akaba Ari we wigarurira Housna,bakabana,noneho umuryango wa Hawa ukaboneraho gukira.Nakomeje kubona Uri kubitiranya.

    Like

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s