Ubuzima

Hawa: Agace ka 10

Housna rwose uwamuhamagaye yatumye ahungabana. Noneho ndibaza uko biri bugende noneho namara kumenya ukuri afashe John aryamanye na Fatuma. Ndamuzi Housna arafuha cyane azabirwara iminsi.

 

Ako kanya nahise mbona Charles ampamagaye ambwirako ari iwacu antegereje musaba kujya iwe ko nimva aho ndi bumusange yo. Charles twariganye muri kaminuza kandi yajyaga adusobanurira jyewe na Housna ku masomo tutumvaga neza. Ni umwana mwiza kandi ajya amfasha mu tuntu tumwe na tumwe. Ansura kenshi ariko jyewe nari ntarajyayo na rimwe. Ibrahim yari yarambujije kumusura na rimwe. Nagiyeyo rero nsanga abana na nyina, murumuna we na mushiki we. Nyina yatandukanye na se ubwo Charles yari afite imyaka itatu, akundana n’undi mugabo babyarana abo bana. Ubwo nari hafi gutaha nibwo uwo mugabo yaje aradusuhuza, Charles amusuhuza amwubashye cyane, mbona ndabikunze. Ni we wamureze, amurihira amashuri, muri macye yabaye aho se atari.

Ariko uwo mugabo naramwitegereje mbona hari ahantu muzi. Ariko se ni hehe?

 

Ubwo yari amperekeje naramubajije

-Charles, uriya mugabo udushuhuje ni nde ko wamushuhuje umwubashye cyane

-Ni umugabo wa mama ni we babyaranye bariya babiri. Adusura kenshi

-Kuki se mutabana

-Ni inkuru ndende. Gusa muri macye afite undi mugore n’abandi bana

-Ibyo ni byo wita inkuru ndende

-Mama yambwiye ko bakundanaga bakiri bato. Gusa ngo bose bari abakene, nuko uriya mugabo yishakira umwana wo mu bakire. Nyuma aza guhura na mama yaratandukanye na papa nuko urukundo ruragaruka, niko babyaranye bariya bavandimwe.

-None se umugore mukuru arabizi?

-Oya abimenye ahubwo byaba birebire

-Yitwa nde se uriya mugabo?

-Yitwa Gatare Kizito

 

Nahise nibuka aho namubonye. Ni papa wa John namubonye mu isabukuru ya Hakima. Aya makuru mashya mbonye nayo azamfasha. Housna nafata John agashaka kuzana ibyo kumubabarira nzahita mubwira ko nta mwana nta se. Ko niba se abyara abana hanze ntabibwire umugore we, na John atakizerwa. Iri banga nzaribika, nzarimena byabaye ngombwa

 

-None se Hawa kuki ibyo byose ubimbajije?

-Ni ya matsiko yanjye rwose. Duhindure ikiganiro ahubwo

 

Yaranjyanye angeza mu rugo nuko ntarinjira nsanga Ibrahim yicaye ku irembo iwacu antegereje

 

-Ese Hawa ko utakiba mu rugo wabonye akazi sinabimenya?

-Ibrahim, niba nta kizima ufite cyo kumbwira waceceka

-Ariko nagutwaye iki Hawa. Warahindutse cyane pee. Ntukinsura, ntukinyitaba. Wabaye iki?

-Ntakubeshye sinkikwishimira. Rwose ushaka wanyura inzira yawe nanjye ngakomeza izanjye

-Sha ibyo ntukabikinihse.

-Jyewe nkina? Ndakomeje rero. Mu mutwe wawe imenyereze ko byarangiye

 

Nahise ngenda nigira mu cyumba ariko amfata akaboko

 

-Hawa, ndakwinginze wibikora. Ndi gukora uko nshoboye ngo mbone akazi nanjye nkwiteho. Namaze kudepoza ntegereje gusubizwa, nukuri ihangane

-Nakubwiye ko byarangiye, ndekura

 

Yakomeje kwinginga yanga kundekura. Sinzi ibyamfashe mpita mukubita urushyi ninjira mu cyumba. Ese ubu nkoze ibiki koko? Ibrahim rwose ndamurenganyije. Nicujije ibyo maze gukora ndasohoka ngo musabe imbabazi ariko nsanga yamaze kugenda. Ndareka abanze atuze ndabyukira iwe musabe imbabazi. Nubwo nkora ibi byose ariko numva ari we nkunda pee.

 

Bucyeye nagiye kumureba. Nahasanze papa we. Naramuramukije

 

-Mwaramutse papa

-Waramutse mwana wa. Iyi minsi ko utakidusura cyane ra

-Ni ibibazo by’isi mba ndi guhiga akazi ariko sindakabona.

-Komeza wizere mwana wanjye. Naba nawe iyo mpamyabumenyi urayifite, jyewe sinzi n’uko isa. Isaha nigera ari wowe na mushuti wawe Ibrahim akazi muzakabona

-Urakoze papa

-None se mwana wa, kuki ejo watonganye na Ibrahim

 

Nahise ngira ubwoba ukuntu Ibrahim ntacyo ahisha se

 

-Byatewe n’uburakari papa. Nanjye byambabaje niyo mpamvu mbyutse nza kumusaba imbabazi

-Umujinya ntukakurushe ingufu mwana wa. Ingaruka zawo ziba mbi cyane. Ubu ari kwa muganga

-Kwa muganga?

-Yari amaze igihe arwaye amenyo, ejobundi niho bamukuye. Rero wamukubise urushyi mu musaya bakuye, yageze hano aribwa anavirirana tubonye bikomeye ajya kwa muganga niho yaraye na nyina.

 

Nahise nikorera amaboko numva nakabije

 

-Sinari nzi ko bamukuye amenyo

-Wari kubimenya ute se utakimusura ntunamwitabe kuri terefoni, yanaza iwanyu akakubura

-Arwariye mu bihe bitaro se?

-Ari ku bitaro bikuru. Usanze ari ho ngiye

-Ndaje tujyane

 

Tugezeyo sinabashije kumubona kuko atari amasaha yo gusura. Nabonye nyina gusa nawe ambonye ahita andeba nabi cyane ariko nishyiramo akanyabugabo ndamwegera

 

-Mwaramutse mama

-Urasuhuza nde Hawa? Urabona ibyo wakoreye umuhungu wanjye? Niba utamushaka kuki wanamukubise koko?

-Mama sinari nzi ko bamukuye. Rwose ni umujinya wabinteye mumbabarire

-Ceceka wa kagome we. Urabibona nta wemerewe kwinjira aho ari izi saha. Rero mbabarira uve hano kandi ntuzahagaruke ntuzanangarukire mu rugo

 

Numvise uburakari bugarutse nuko mpita musubiza:

 

-Ubundi se nazaga iwawe kuhakora iki? Inzu nziza se mufite? Uwo muhungu wawe mugumane uzamurye. Si uriya mukene utari kuzanangurira igitenge. Rwose sinzagaruka ningaruka uzamenye ko data yabyaye nabi.

 

Nahise nikubita ndagenda ariko mu nzira nagiye nibaza ibyo nkoze mu minsi ibiri kubera umujinya. Dore nakubise urushyi Ibrahim none byamuviriyemo kujya kwa muganga kuko namukomerekeje. Bwa kabiri mbwiye nabi mama we. Umujinya nubwo utawubuza kuza ariko ni byiza kumenya uko uwutwara, iyo utawutwaye neza ugutera kuvuga nabi, cyangwa gukora ibitari ngombwa ukazicuza amazi yarenze inkombe.

Natashye nibaza ibyo nkoze icyo bizambyarira. Ubundi numvaga umupango wanjye nugenda neza nzakomeza urukundo rwanjye na Ibrahim maze nkaba mfite urukundo mfite n’amafaranga none dore urukundo ruri mu nzira zo kugenda kandi n’amafaranga sindayabona.

Ubu se ibi nzabikosora gute? Ngomba gukora uko nshoboye ngatandukanya Housna na John ni cyo cyihutirwa ubundi nkabona uko Paul ashakana na Housna, nkabona amafaranga azamfasha kwiyunga n’uyu muryango ngasubirana Ibrahim atarashaka undi.

Ifaranga aho rikubise haroroha erega.

 

Ahubwo reka ntekereze neza uko gahunda zigiye gukurikirana.

 

Biracyaza…

2 comments

  1. umanika agati wicaye wajya kukamanura ugahaguruka.hawa ndumva utangiye kujya mubihombo na Paul ntawuzegukana dore aho nibereye.

    Like

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s