Imibanire Ubuzima

Bimwe mu bitera abagabo guca inyuma abagore babo

Gucana inyuma hagati y’abashakanye cyangwa ababiteganya usanga kuri ubu tuvuga ko bimaze kuba icyorezo ndetse bamwe bakavuga ngo nta mugabo uhazwa n’umugore umwe. Iyo havuzwe ko ubu bikabije twirengagiza ko kera baciye umugani ngo “abaturanyi babyarana abana basa.” Ibi rero iyo ubisesenguye neza usanga kuva ikiremwamuntu cyabaho ingeso yo gucana inyuma iriho kandi iboneka hose.

Aho ubu bitandukaniye na kera ni uko isi yabaye nk’umudugudu ugasanga icyo ukoze uziko wiherereye kiraye gisakaye hose, naho kera wasangaga unabyara umwana akarinda aba umusore bitazwi.

Icyo sicyo kituraje ishinga, ahubwo reka tugaruke ku bitera abantu gucana inyuma.

Abagabo dore ko ari bo bashinjwa guca abagore babo inyuma (aha wakibaza niba babikora n’abandi bagabo), usanga mu kwiregura kwabo batanga impamvu zinyuranye. Bamwe bitwaza ngo abagore babo ntibanyara, abandi bati umugore wanjye igihe cyose mushatse siko mubona, hari n’abadatinya kuvuga bati ni Satani wanshutse, n’ibindi byireguzo binyuranye.

Gusa iyo ugenzuye usanga umugabo waciye umugore we ashobora kubiterwa n’imwe cyangwa nyinshi mu mpamvu tugiye kurebera hamwe muri iyi nkuru.

Ibitera abagabo guca inyuma abagore

 

1. Kwihorera

Abagabo bamwe usanga iyo yashwanye n’umugore we cyangwa se hari ikosa runaka umugore we yakoze, cyangwa se n’umugore we yamuciye inyuma (nabo si shyashya), atuza ari uko asambanye n’undi muntu. Ikibabaje hano uyu mugabo aba ahemukiye abagore babiri. Bwa mbere ahemukiye uwe kuko agiye ahandi, bwa kabiri ahemukiye uwo asanze kuko si urukundo rumujyanye namara kubona icyo yashakaga azagenda ubutagaruka. Gusa icyiza nanone ni uko uwabikoze byo kwihorera iyo ikosa rikosowe burundu nawe ntiyongera kandi akenshi usanga yicuza.

2. Ububata

Ubu bubata buri mu byiciro bibiri bitandukanye.

Mu cyiciro cya mbere hari uwabaswe n’ibintu biyobya intekerezo ze nk’inzoga n’ibindi biyobyabwenge noneho igihe yabikoresheje bikamutera bwa busambanyi. Bene uyu ni Bapfumwenge kuko ntaba yikoresha, nibo usangamo abafata ku ngufu ndetse n’abaryamana n’amatungo.

Mu cyiciro cya kabiri tuhasanga uwabaswe n’igitsina. Kuri we iyo abonye umugore yumva ko baryamana. Nawe ntarobanura, ntiyita ngo yasambanye na nde kandi kuri we ntanumva uburemere bw’ikosa yakoze. Niyo uwo bashakanye abimubajijeho arabyemera kandi ntagaragaze gushaka kubireka. Uyu kubicikaho biragoye kuko aba ameze nk’utagira urukundo abagore bose abafata kimwe

3. Ubwigunge

Ibi bikunze kuba ku bakorera kure y’ingo zabo, abagiye mu butumwa bw’akazi cyangwa amahugurwa n’amasomo bizamara igihe kinini. Gusa bene aba babamo ibice bibiri. Hari igice cy’abafata akanya ko kuba bari kumwe n’igitsinagore, bagasangira, bagatembera bakishima ariko ntibaryamane hakaba n’abandi bananirwa kwihangana hakazamo no kuryamana. Ikindi gitiza umurindi aba bantu ni ukureba filimi z’abakora imibonano nuko bikabakururira ubushake bwo kuyikora. Kuko bari kure y’ingo zabo ubwo nyine bitabaza uwo babonye hafi yabo.

4. Kwangiza urukundo no kwikuraho umuntu

Ibi bijya gusa no ku ngingo ya mbere, gusa hano ho uyu aba ashaka ko mutandukana akabura impamvu nuko agahitamo kuguca inyuma. Uyu aho abera mubi akora uko ashoboye kose umugore akabimenya, kugirango umugore ababare yigendere. Aha iyo umugore abaye intwari akabyakira umugabo hari igihe yisubiraho akabireka cyangwa se akerura agatunga abagore barenze umwe, wa wundi akaba nyirantabwa.

5. Urubyaro

Aha usanga biboneka mu bice bibiri.

Ku gice cya mbere hari abashaka ntibabone urubyaro kubera impamvu zitandukanye. Umugabo rero ashobora kujya ku wundi mugore ashaka kubyarana na we gusa, kenshi abikora acyeka ko umugore we ari we utabyara cyangwa se barisuzumishije koko bagasanga umugore ntabyara

Ku rundi ruhande hari igihe usanga ku mugore babana havuka igitsina kimwe cyane cyane abakobwa gusa nuko umugabo akajya ahandi ngo gushaka agahungu. Aha aba yiyibagije ko igitsina cy’umwana gitangwa na se.

6. Kudakura

Hari umugani ugira uti: “ubugabo si ubwanwa n’ihene irabugira.” Nibyo koko hari abagabo baba badakuze mu mutwe, cyangwa se baba barashatse batarafata umwanzuro uhamye wo kubaka urugo. Bene uyu mugabo usanga akirarikira abakobwa bakiri bato, mbese kuri we kuba yarashatse umugore ni mu magambo gusa ariko mu myitwarire aracyari nk’umusore.

7. Ibyamubayeho akiri umwana

Hari abagabo baba bameze nk’abakuranye ihungabana. Aba bagabo usanga babona umugore wese ubaganirije neza bakumva bagirana umubano wihariye nuko wa mugore yaborohereza bagashiduka nabo baryamanye nawe. Akenshi bene uyu mugabo usanga ibiganiro bye biba byuzuye amaganya, usanga inshuti nyinshi agira ari igitsinagore, nyamara nubwo abikora aziko byamukiza bwa bwigunge na rya hungabana ryamubayeho akiri muto, birangira ahubwo bimwongereye kudatuza no kubura amahoro muri we kuko ibyo akora byose aba abizi ko nawe hari uwo ari guhemukira.

8. Ubuzima abayemo

Hari abaca inyuma abagore babo bameze nk’abicuruza ngo babone amaronko, hano tuzahasanga abasambana na ba nyirabuja ngo babone uko bakomeza akazi. Ku rundi ruhande nanone tuhasanga ababikora kubera umurengwe, kubera kuba abantu bakomeye (abasitari, abayobozi, …). Aba babikora akenshi kubera abo bari bo, ndetse n’uwo baterese kubera hari icyo ari bubakureho ntiyapfa kubitesha iyo Atari umugore cyangwa umukobwa w’umutima.

Dusoza

Mu mpamvu zose zivuzwe nta n’imwe umugabo wese yakitwaza ngo imurengere ku ikosa yakoze aca inyuma umugore we. Igihe cyose ucitse intege ukumva ukururirwa guca inyuma umugore wawe, hari inama yoroshye.

Aho uzajya hose zirikana ko ntawe uteze kuzakurutira umugore washatse.

2 comments

  1. Uri umwanditsi ukaba n’umuhanga wihariye rwose utanga ubutumwa kungeri zose Imana ikomeze lugushyigikira no lwagura impano zawe.

    Like

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s