Inkuru ndende

Igihe cyanjye kizagera: Agace ka 29

Nageze mu rugo mpita mfungura impano Simon yari yanzaniye kuko amatsiko yari yose. Harimo amakanzu abiri yanjye, inkweto n’isakoshi. Hari harimo kandi n’utwenda tw’abana buri wese ibiri ibiri. Ukuntu Simon asobanutse iy’abakobwa yari yayitandukanyije buri wese iye ifunze ukwayo hariho n’amazina ye. Nari nkiri kubireba nibwo Lyne yinjiye

-Yooo. Mbega imyenda myiza . joanna wayiguze ryari?

-Ni impano Simon yanzaniye

-Eeeeh. Uriya musaza nako cheri wawe arasobanutse. Ameze neza se?

-Yego. Ejo nimugoroba tuzajya gusangira

-We nkwiyame nakubwira ko agukunda uzahite wemera. Ndakuzi kwihagararaho kwawe

– Ntakubeshye nubwo vuba nzabona gatanya ariko sinshaka guhita nishora mu mubano n’undi mugabo ntaramenya neza. Yego nibyo nkeneye umuntu umba hafi ariko na Didi sinari nzi ko ibyo yankoze yabikora. Ubu narahumutse nzajya mbanza mfate akanya ko gutekereza mbere yo gufata umwanzuro. Kandi erega nta kinyirukansa. Rero nindamuka ntemeye rwose ntibikubabaze Lyne wanjye.

– Nyamara ushobora gutinda kwemera akagucika

-Niba ari uwanjye, niyo nahakana ntiyagenda yakomeza agategereza igihe nzavugira yego. Niba atari uwanjye niyo twabana hazagira igituma dutandukana. Icyo kandi ni ukuri

Nabonye Lyne atari kubyumva neza ndamureka. Gusa nanone ni ubuzima bwanjye bireba, ni jye ngomba kwifatira umwanzuro. Monique yangiriye inama yo kutazemerera uwo ari we wese kumfatira umwanzuro. Nibyo nanjye nkunda Simon kandi rwose yaramfashije muri byinshi. Gusa sinzi niba ari urukundo cyangwa amarangamutima mufitiye, byose nziko Imana izabimpishurira. Imana yampaye abana nihebye ntizabura kumpa umugabo mu gihe cya ngombwa.

Terefone yarasonnye mbona ni Rita uhamagaye

– Muraho Joana

– Uraho Rita.

– Abana bameze bate ?

-Sha bameze neza

-Monique se yakubwiye?

-Ambwira iki?

-Tuzaza mu cyumweru gitaha. Didi yagarutse

-Eeeh, nari nasohotse ntabwo ndabonana nawe ngo ambwire

– Sawa noneho. Unsuhurize abana

Nahise njya mu cyumba cya Monique ndakomanga

-Ni nde

-Ni Joanna

-Injira mukobwa wanjye

-Mwiriwe Mama

-Simon yaje?

-Yego yantumiye gusangira ejo nimugoroba

– Byiza. Ariko uzitonde Joanna. Ntuzahubuke nta kikwirukansa

-Ndabizi mama. Rita yambwiye ngo Didi yagarutse. Inama izaba mu cyumweru gitaha

-Yego nyirasenge yampamagaye.

-Izabera nanone kwa Marc?

-Sinzi. Ikibazo uwo munsi nanone hari inama ya Pauline na wa mukobwa yibye, sinzi rero nimba ndi kwa Marc uko nzabihuza byombi

-Ariko mama ubwo ufite inzu nini reka tuzajye muri salon twebwe nabo nibaza bajye muri salle ntoya. Aho bizakorohera kuhaboneka hose

-Ako gatekerezo ni keza Joanna

 

Bugorobye niteguye kujya guhura na Simon. Nambaye akajipo n’ishati idoze muri basin, nk’umwambaro w’iwacu. Imisatsi nyifunga shinyo nuko nsohoka nyura muri salon nsanga Lyne ari muri salon ari kureba TV

-Lyne ndagiye ni aho mu kanya

-Ugiye mu musangiro mutagatifu se mukuru wanjye?

-Yego rwose

-Ukagenda wambaye utyo?

Nahise nireba

-None se ubu nambaye nabi?

– Ejo ntiyakuzaniye amakanzu abiri koko? Wakambayemo imwe se ko byarushaho kumushimisha

-Uzi ubwenge shahu. Reka njye guhindura

 

Narahinduye nuko nihutira kujya kureba Simon aho yari yambwiye duhurira

-Urasa neza Joanna. Wakoze kwambara iyo kanzu

-Urakoze Simon

Twakomeje kuvuga ibya mva he na njya he

– Ese simon kuki washatse umugore wo mu gihugu cyacu?

-Joanna urukundo nta bara rugira. Ntabwo njye nshyira imbere ubwoko cyangwa uruhu kandi Afurika narayikunze. Abantu hano barafatanya kandi rwose mugira amafunguro anyuranye kandi y’umwimerere. Umugore wanjye namukunze nkimubona bwa mbere, ntitaye ngo arirabura nkaba umuzungu

-Wihangane ko yagusize Imana ikamwisubiza

-Ayo mateka ababaje tuyihorere. Ese umugabo wawe mwarabonanye?

-Ntiwabyumva. Nkiva mu ndege uwo munsi twarahuye

-Gute se

Namubwiye uko byagenze byose uwo munsi duhura na Didi

– None se Joanna wafashe uwuhe mwanzuro?

-Ujyanye n’iki?

-Umugabo wawe namara kubona abana akagusaba kugaruka mu rugo uzasubirayo?

-Simon rwose nawe winsetsa. Jyewe sinabana na mukeba wanjye mu nzu rwose

– Byiza cyane. Igisubizo nashakaga ndakibonye

-Gute Simon? Nsobanurira neza

-Uracyakunda umugabo wawe ikikubangamiye ni mukeba wawe

-Oya Didi yarambabaje sinasubirana na we na cyane ko yanyibwiriye ko yanshatse kubera impuhwe.

– Ibyo byose ntacyo bivuze kuva ukimukunda. Ahubwo rekera kubagarira urwango, woroshye ubuzima ubeho utuje.

Twakomeje kurya tutavuga. Nyuma yo kurya turongera twiganirira bisanzwe. Ibyo nari niteze ko Simon ari bumbwire sinabibonye. Gusa byaramfashije kuko n’ubundi nari kumubwira ngo ategereze. Ntabwo nditegura kuba najya mu rukundo rwimbitse aka kanya kuko ndacyashavuye ku mutima.

Ngarutse mu rugo nasanze Lyne Pauline na Monique bantegerereje ku rubaraza

-Mwiriwe mwese

-Byagenze neza se? Uwo ni Lyne wambazaga

-Twariye turanywa birarangira

-Kurya no kunywa gusa nta kindi?

-Yego wa kana we

-Nta kintu yakubwiye se?

– Oya.

Monique ahita avuga:

-Uriya muganga ni mukuru kandi azi kureba mu maso akamenya ibyo utekereza. Yabonye ko utamukunda yanga ko umwumvira ubusa

Muri icyo cyumweru twahuye kenshi na Simon. Yaranadusuye mu rugo. Ariko nta kintu yigeze ambwira. Nubwo nashoboraga kutamusubiza ibyo ashaka ariko rimwe yadusuye naramubajije:

-Ese ikintu wambwiraga uzambwira waje ino ni ikihe ko utarakimbwira?

Yaramwenyuye nuko aransubiza:

-Icyo nshaka kukubwira nzakikubwira nihagera. Gusa nkurikije uko mbibona ubanza icyo gihe kitazagera. Gusa nimbana witeguye kubyumva nzabikubwira, ariko si nonaha

-Simon mbabarira umbwire

-Oya Joanna. Nari mfite icyo nakubwira ariko narakiretse. Imana nibona ko hageze ngo mbikubwire nzakubwira. Ntegereje igisubizo cyayo

 

– Ayo magambo Monique ahora ayambwira. Ngo Imana niyo igenera buri kintu igihe cyacyo

-Uko niko kuri rero

-Ejo nibwo Didi na benewabo bazaza hano. Ndumva umujinya

– Sha ari jye Didi sinzi ko natinyuka kuhaza pee. Mbega isoni!!!

-Umugore we gusa ni we uzahababarira

-Azaba ahari nawe se?

– Oya. Ariko uko byamera kose Didi azamubwira ibyabereye hano byose. Niyumva ko nabyaye batatu kandi we yarabyaye upfuye, akumva ko umuhungu asa na Didi neza ni gute atazashenguka koko

-Joanna reka nsubire kuri hotel burije. Ejobundi uzaze tujyane gusura musee.

-Nta kibazo. Ijoro ryiza Simon

Abana banjye nasanze basinziriye. Ariko Kimia ni Lyne neza neza. Ntacyo asiga aho anyuze byose arasanzagiza. Igihe kirihuta disi. Ubu hagiye gushira imyaka ibiri ntabana na Didi? Arikoe jo nzaboneraho akanya ko kumubaza igihe azampera gatanya. Nkiri muri ibyo numva umuntu ukomanga

-Joanna wasinziriye?

– Oya mama. Injira

-Nshaka ko tuganira

-Ndakumva mama

-Ejo Didi na bene wabo bazaza hano

– Ndabizi mama

-Hari ikintu nshaka kugusaba. Kuva twamenyana ndumva nta kintu ndagusaba, ubu rero ngusabe kandi umbabarire wemere

-Mbwira mama

-Ndifuza ko wazabababarira

-Oya mama. Nsaba ikindi icyo kiragoye. Rwose sinzi ko nabona imbaraga zo kubababarira.

-Ndagusabye none uranyimye mwana wa? Bikorere kugirango wikiranure n’Imana. Umutima wawe weze uwukuremo urwango

-Mama sinshaka gusubira muri uriya muryango

– Kubabarira ni kimwe, gusubirayo ni ikindi. Jyewe nkubwiye kubababarira. Ko wamaze kubatsinda ikindi ushaka ni iki koko? Ibuka ko nta dini na rimwe kuri iyi si ritigisha gutanga imbabazi. Imbabazi ziruhura ubwonko kandi zituma utekereza neza. Nukomeza kugira urwango n’inzika ntuzigera umenya agaciro k’umunezero. Bitekerezeho

-Mama ku bwawe nzabababarira ariko sinzasubirayo peee

-Icyo ni ikindi kintu. Ejo rero nibashaka guterura abana ntuzababuze.

-yego mama.

Ako kanya umuntu yahise akomanga. Ni Pauline

-Mumbabarire kubavangira. Wa mugabo wanjye ambwiye ko agize gahunda itunguranye azahagera saa kumi n’imwe.

– Nta kibazo. Muzaba muri mu kindi cyumba. Twe tuzaba twatangiye saa kumi zuzuye. Nunkenera uzambwira nta kibazo. Ahubwo icara twiganirire

Ahaa. Monique nawe akunda inkuru. Nibaza umunsi Lyne yabaye umukazana we. Bazajya barya imipfube cyangwa ibyashiririye bibereye mu nkuru!!!

-Pauline urumva mu mutima umerewe ute ejo kuzabona umwana wari umaze igihe utabona?

-Sinzi pee. Erega papa we yarambwiye ngo ubu ni umugore da.

-Naho se mushuti wawe Elizabeth we bite?

-Aho yabaga sinahamubonye ariko ndacyakomeje gushakisha.

-izere Imana izabikora.

Pauline yitegereje mu cyumba cyanjye. Atinza amaso ku ikanzu Simon yanguriye

-Iriya kanzu ya Joanna ni nziza cyane. Nibutse mu buto bwanjye izo najyaga nambara

– Wowe ukora kwa muganga uramuzi neza Simon

-Ese niwe wayiguze. Sha uwansubiza mu bukumi najya muterekera amaso nkareba ko atangira umugore

 

Twarabisetse. Narababwiye bagende niryamire, ejo ni undi munsi kandi hari gahunda nyinshi.

Inkuru ikurikira ntigucike

2 comments

  1. Yooo disi umusaza ijambo rye arisubiranyeyo !!!!!gusa mfite amatsiko yuwo mwana Pauline yibye

    Like

  2. Amatsiko.comSimon birangiye atavuze ikimuri kumushaha disi. Ndumva kubona umwana wa Pauline biraza kubatungura mwese p. mutegerezanije amatsiko, ibaze abaye nka Bella😂😂😂. cg Esta mushuti wanyu.Murakoze banditsi beza iyi nkuru ndayikunda cyane mbere yo kuryama mbanza kureba ko ntayasohotse p.Mubangutse Indi ndategereje. Thx

    Like

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s