Inkuru ndende

Igihe cyanjye kizagera: Agace ka 26

Iminsi yakomeje kwicuma abana bageza amezi atandatu. Bari batangiye kwiga gukambakamba. Igihe cyo gusubira iwacu cyari kigeze nukodutangira gupakira ibyo tuzajyana. Twabikoze tuganira jyewe na Lyne, kandi nyine muramuzi ntajya abura inkuru

-Joanna ayo makarito y’amata ni ay’iki?

-Ni ay’abana bakeneye ifashabere

-Uratuma biba byinshi ku kibuga cy’indege bazatwishyuze imizigo. Yareke dufate macye andi uzayagura tugezeyo. Gusa numvaga twakigumanira kwa Monique

-Maye se ko uzamubera umukazana vuba urumva yabyanga. Ubundi se Joel ntimuzabana vuba?

-Yamaze no kubinsaba ariko nta kinyirukansa. Nagufatiyeho isomo. Reka mbanze nshake icyo nkora nizigame sha

-Uzabibwire Monique azagufasha kubona akazi

-Wowe se ntuzahita ugasubiraho buriya nitugerayo

-Oya nzarindira abana babanze bamenye kugenda. Kandi nimara kubona visa y’igihe kinini nzahita nigarukira muri Canada

-Ndabyumva Simon yaragufatishije

-Oya wa kana we nta gahunda mfitanye nawe!

Mu gusubira iwacu urugendo ntirwandambiye cyane gusa numvaga bizantonda kuko umwaka utari ahantu ni igihe kinini. Tugeze ku kibuga cy’indege twahasanze umushoferi wa Marc yaje kutwakira. Marc niwe washakaga kuza kutwakira ariko ngo grippe yari yamuryamishije. Lyne yarabyumvise araseka ati nta mugabo wo kuryamishwa na grippe.

-Joel yambwiye ko ashaka kugaruka gucunga imitungo yasizwe na se kuko nyina ari gusaza. Ubwo bivuze ko tuzatura inaha kandi jye nari nikundiye Canada

– Lyne ibyo birekere Imana niyo izaca inzira. Imana nihitamo hano ni uko izaba ibona ariho heza

-Nibyo cyakora Imana niyo mugenga wa byose. Ahubwo se ntitunyura kuri farumasi?

-Gukorayo iki Lyne?

-Kugura amata y’abana. Nijoro ntuyakenera se

-Nibyo koko kandi ndizera ahari meza

 

Twasabye umushoferi atunyuza kuri farumasi ariko mpageze nibuka ko nta mafaranga mfite avunje. Nari nibagiwe kuvunjisha mvuye mu ndege.

Nasabye umushoferi ko yanjyana ku biro by’ivunja biri hafi. Naravunjishije mu gusohoka nkubitana na Didi yinjira. Nabaye nk’ukubiswe n’inkuba kuko numvaga ntazongera guhura nawe. Twararebanye nuko aravuga:

– Joana ! Numvise ko wari waragiye hanze. Wagarutse ryari?

-Naje vuba.

-Najye nje kuvunjisha nshaka kujya I Paris na Bella. Yarongeye arasama, nshaka ko aba aruhukirayo mbere yo kubyara. Warabyaye. Wabyaye iki?

-Ubwo se urumva koko ushaka kubimenya?

– Ni amatsiko gusa bisanzwe. Hashize umwaka ugiy. Aho wari waragiye haraguhinduye uri mwiza nka mbere tukimenyana. Gusa wanciye inyuma urabyara. Gusa sinkigukeneye. Numvaga ntazaguha gatanya ariko Bella yarabinyemeje. Ubwo wagarutse uzanshake tubirangize vuba. Nimero yanjye ntiyahindutse. Mfite aba avoka tuziranye benshi bazadufasha byihut icyo kinyendaro cyawe kizabone uko kibaho wenda uwaguteye inda yanagutwara

Nashatse kumusubiza byinshi kubera umujinya cyane cyane numvise yita abo yabyaye ibinyendaro. Ariko namushubije ijambo rimwe gusa:

-Bizagenda uko uzabishaka

Nikomereje urugendo ntanamusezeye. Disi arambabaje. Yabaye inganzwa ku buryo Bella avuga agahita yemera. Gusa ubwo ari we wivugiye gatanya, bizabe uko abishaka rwose. Nabikore vuba gusa nzi ko uwo yise ikinyendaro mu myaka micye azamuhagama. Nsubira mu modoka

– Lyne uzi umuntu mbonye?

-Ndabizi ni Didi namubonye aparika imodoka. Gusa nizere ko utamubwiye ngo wabyaye batatu kandi ngo bari mu modoka aze kubareba.

– Oya Lyne, no kumusuhuza ntabyo nakoze nateze amatwi arambwira gusa.

Twarabisetse cyane turigendera

Twasanze Monique adutereje n’ubwuzu bwinshi. Bucyey maze kuruhuka nahamagaye Esta ahita aza yihuse

– Esta nari ngukumbuye cyane

-Abana se bari hehe?

-Tujye mu nzu ubarebe

Twakomeje kujya tuvugana na Pauline, nawe yari yaragarutse mu gihugu. Uyu munsi yaje kudusura, tuganira birambuye

– Yemwe reka mbareke ntahe, sinakishinga urwenya rwanyu

-Ese uri kuba hehe Pauline?

-Ndi kuba muri hotel

-Kuki se? Nta muryango ufite ino?

-sha ni birebire. Nzakubwira nitonze. Ubu naje gushaka umuobwa wanjye umugabo twabanaga yanyambuye mbere yuko njya Canada. Hashize imyaka 20 yarambujije kumureba. Hari n’umugore naje gushaka. Nshaka kuvuga ukuri kuko nakiriye agakiza kandi biri kumbangamira kubana n’ibintu mu mutima ntabishyira hanze. Nzababwira nitonze

 

-Umva Pauline inzu yanjye ni nini kandi nta bantu bayibamo. Igihe uri ino ngwino tube tubana. Umushoferi mujyane kuri hotel agutwaze ibintu byawe

-Yooo. Urakoze cyane Monique.

Ubwo Pauline yari agiye nabajije Monique impamvu umwana wa Bella yapfuye. Yaranshubije ngo igihe nikigera Imana izaduha igisubizo.

Hashize icyumweru tugarutse nahamagaye Rita. Yahise ansaba kumurangira aho mba mubwira ko twazahurira ahantu kandi akazaza wenyine. Ntiyazuyaje yaraje

– Uraho Rita

-Uraho Joanna

-Unyihanganire Rita. Hari embouteillage mu muhanda bituma ntinda kukugeraho

-Joanna nta kibazo. Gusa warabyaye uba mwiza cyane. Umwana ameze ate?

-Ameze neza

-Ni umuhungu cyangwa umukobwa?

-Wikihuta uzabimenya hamwe n’umuryango wawe. Gusa muzabwire Didi ko ntabyaye ikinyendaro kandi niteguye kwerekana ko ari uwe uko byamera kose. Sinshaka kwitwa umusambanyi ndengana

– Tuza Joanna. Uretse Didi gusa abandi twese tuzi ko utamubeshyera ngo umwegekeho inda atateye. Kandi mama, Chantal n’abandi banyamuryango bicuza impamvu babwiye Didi gushaka Bella. Jyewe nubundi nari nabihakanye ariko Didi ambuza kubikubwira. Joanna mbabarira ubyikuremo byose. Mama yamaze kumenya no kwemera ikosa rye kandi twiteguye kugufasha gusubira iwawe.

– Iwanjye hehe Rita? Didi hashize icyumweru duhuye. Yambwiye ko yiteguye kumpa gatanya kandi nanjye ndabishaka cyane.

-Didi yarahindutse cyane. Bella asigaye amuyobora. Twese ubu twabaye abanzi be nta nubwo yatunyuraho ngo adusuhuze

– Ibyo ni ibyanyu Rita. Ntibindeba. Ahubwo umfashe uteranye benewanyu muzaze mbereke urubyaro rwa Didi. Byibuze niho muzamenya ko mvugisha ukuri. Nimumara kwitegura niho nzababwira aho mba mukaza kundeba.

Nyuma y’iminsi itatu Rita yarampamagaye. Biteguye kuzaza ejo kureba umwana (bazatungurwa no gusanga ari batatu)

 

Ese uyu muryango uzemera aba bana cyangwa nabo bazaba nka Didi?

 

Inkuru ikurikira ntizagucike

6 comments

  1. Skyiiiii subu agiye kuberekera iki.abana be uyu nawe ngo ni Joanna sinzi uko ateye yaretse akibanira na Simon ari.mu biki koko anteye umujinya

    Like

  2. Ubuse kuki agiye kuberekana bikiri ibihinja syiii joanna nawe yitereye ukwe kwihariye. Kubemera bazamera kuko bamigarukiye mo gake naho cya didi cyo kizaza gikambakamba!!!!bella amaze kumucyuza umunyu

    Like

  3. Arko raise Joanna ubwitonzi bee nabwo burandenga.ubu c iyo aba aretse bakagira nk'imyaka 4 koko??????

    Like

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s