Inkuru ndende

Igihe cyanjye kizagera: Agace ka 22

Iminsi yakomeje kwisunika nuko umunsi wo kubyara urushaho kwegereza. Bambwiye ko kubyara bibabaza. Nkongera nkanibaza uko nzajya mbasha koza abana batatu, kubonsa, kubaheka, byose bikambera ihurizo.

Nyuma y’isuzuma rya nyuma nabwiye muganga uko ndi kwiyumva

-Simon, mfite ubwoba bwo kubyara

-Joanna, kuba ufite ubwoba birumvikana kuko ni ibintu bigiye kukubaho bwa mbere. Ubu hari abakubwira ko biryana cyane abandi bati nta kibazo kirimo. Nibyo rwose buri wese ibise bimufata uburyo bunyuranye n’undi. Wowe iyumvishe ko niyo waribwa gute, ariko uzanezezwa nuko nyuma y’umubabaro wawe uzabona ku bibero abana bawe. Kuba mama wawe n’abandi bose babyara umwna urenze umwe ni uko nubwo ibise bibabaza ariko ikivamo kikwibagiza wa mubabaro.

Amagambo ya Simon yarampumurije.

-Ni wowe uzambyaza?

-Oya uzitabwaho n’ababyaza. Jyewe naza ari uko hakenewe kukubaga, ariko simbikwifuriza

-Urakoze Simon. Amagambo yawe angaruyemo imbaraga

Kuva inda igize amezi 8 Monique ampamagara kenshi ankomeza, kani na Lyne nawe ni uko utibagiwe Marc, Esta na Nicole tubana.

Simon yambwiye ko guhera mu cyumweru gitaha, isaha n’isaha nshobora kubyara. Yansabye gutegura hakiri kare valise izaba irimo ibyo jye n’umwana tuzakenera turi kwa muganga. Gusa Monique we yari yarambwiye kuyitegura mu kwezi kwa munani kugirango ntazagira icyo nibagirwa.

Ubwo twateguraga valise nibwo terefoni yasonnye ndebye mbonanni Joel. Uyu nawe antesha umutwe ariko disi aba ashaka kuntera urwenya kandi biranduhura

-Allo

-Uraho mugore mwiza mu batwite bose

-Uraho musore udasanzwe

-Ndabizi uri hafi kubyara. Niwumva gikubise bwa mbere, ndavuga igise, uzahite umpamagara ni jye mubyaza wa mbere ku isi

Nari mbizi ko agiye gutera urwenya

-Eeeeh. Sinari nzi ko nawe uri muganga burya

-Uzabyemera uwo munsi wowe gusa uzandye akara

 

-Sawa nshuti yanjye. Nzakurya akara rwose gusa ninibagirwa ntuzabure kuza guterura abana

-Yego. Imyiteguro myiza

Gusa nyuzamo ngatekereza Didi. Nubwo twashwanye ariko sinabura kwibuka ko abana ngiye kubyara ari abe.

Rimwe ndi kwa muganga nagiye muri ibyo bitekerezo nuko Simon ambaza ikibazo mfite

 

– Nkubwije ukuri nubwo ntashaka kubana n’umugabo wanjye ariko sinjya mbura kumutekerezaho. Gusa kuba yarigeze kumbwira ngo yanshatse kubera impuhwe birambabaza buri munsi. Ubu koko nzamwibagirwa?

-Iyo ukandagiye shikareti, kugirango uyikureho bigutwara igihe. Ni kimwe no kwibagirwa uwo wakundaga cyane cyane nka we mwanabanaga ari we wa mbere wakunze. Gusa Imana yonyine niyo idafite ikindi wayisimbuza naho umuntu buhoro buhoro uramwibagirwa ukanabona undi ushobora no kuba mwiza cyane

 

Kuva Simon yambwira amateka ye uko mbona ibintu byarahindutse. Sincyumva ko ari jye ubayeho nabi ku isi. Nizera ko hari igihe amarira yanjye azahozwa.

Simon kandi akunda kuganira ijambo ry’Imana cyane niyo mpamvu ahora ampumuriza.

Ngiye gutaha uwo munsi ngo nzagaruke ngiye kubyara Simon niwo yambajije?

-Ese Joanna ko utigeze umbaza ibitsina by’abana utwite ntufite amatsiko yo kubimenya mbere ngo unamenye uko ubagurira imyenda?

 

Biracyaza…

1 comment

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s