Inkuru ndende

Igihe cyanjye kizagera: Agace ka 21

Nararebye nsanga ni Joel uhamagaye

-allo

-Bite umugore mwiza mu bagore bose batwite

-Joel uri nka nyoko neza neza ntuhinduka uhora mu rwenya

– Ntubizi se ko nta ntare ibyara intama. Yaribyaye ubwo. Unsuye ryari se

-Tuzabivugana ubu ndi kwa muganga

-Sawa noneho ibihe byiza

 

Yarakupye muganga araza aransuzuma nuko ansaba kujya nza buri kwezi kureba uko ubuzima bwanjye buhagaze. Gusa yongeraho ko mu gihe mbonye impinduka niyo ukwezi kwaba kutarashira bitajya bimbuza kujya kwisuzumisha.

Joel nawe yakomeje kumbaza igihe nzamusurira nuko ngeze aho mbwira mushiki we ko nshaka kujya kumusura

Ndi gushimira Imana yampaye izi nshuti ebyiri Joel na Simon. Simon niwe unkurikirana kuzageza mbyaye naho Joel we ahora anyisekereza cyane

Gusa mpora nibaza niba nzabona umugabo unyemera n’abana batatu nzaba narabyaye. Kuko mbona ibya Didi byo byararangiye nimbyara nzasubirayo nsaba gatanya yihuse.

Gusa ninsubira ku kazi nziko nzabasha kwitunga n’abana banjye kandi nzabaho nezerewe nubundi ak’imuhana kaza imvura ihise.

Igihe cyo kujya kwa Joel kigeze Nicole yaramperekeje angeza kuri gari ya moshi yagombaga kunjyana Montreal. Nicaye ku idirishya ngo ngende nirebera kuko ni ahantu hashya.

Nasanze Joel antegereje

-Joanna Imana ishimwe ndongeye ndakubonye

-Nanjye ndanezerewe Joel. Hari hashize igihe

Twaragiye tugera iwe, kandi iminsi nahamaze naranezerewe pee. Yantembereje umugi nsanga rwose Esta nta bikabyo yashyizemo ahandatira. Ni umugi mwiza cyane.

Kwa Joel nabonye umwanya uhagije wo guseka kandi Lyne yari yarambwiye ko igitwenge ari umuti mwiza. Inkuru ntazibagirwa imwe ni iyi ikurikira gusa sinzi niba byarabayeho koko cyangwa se ari inkuru za Joel

Ngo mu gihugu kimwe iyo bajyaga gushyingura, umuntu mukuru muri bo yavugaga utahiwe gupfa. Nuko ubwo bari bamaze gushyingura, umusaza afata ijambo avuga ko umuntu uri buve aho mbere y’aabandi ari we uzakurikiraho gupfa!!!

Ngo na nubu bose baracyari aho ku irimbi bategereje ugena mbere

Ubwo nari kwa Joel nabonye amara igihe kinini kuri terefoni ye yandika.

-Ese Joel ko uhora wandika uba wandika uduki?

Araseka

-Ndakuvumbuye sha. Uba wandikira inshuti yawe kandi ntiwayimbwiye

-Kumukubwira si ngombwa kuko ameze nkawe

Gusa kubera urwenya rwa Joel sinjya menya ibyo avuze akomeje cyangwa ibyo avuze yiganirira

Iminsi yarahise nuko igihe nagombaga gusura Joel kirarangira. Ejo ndasubira kwa Nicole

-Joanna, iminsi irihuse numvaga twakiyongeza iminsi

-Oya sha ngomba kugenda urabizi muganga wanjye ari Toronto

-Ese ko kuba ino bihenze uzabasha kuharerera abana batatu koko nta kazi?

-Oya nimara kubyara nzasubira iwacu da. Niho nzabona uko nabasha kubitaho

Bucyeye nasubiye Toronto nuko amezi akomeza kwisunika. Ku kwezi kwa karindwi maze kwisuzumisha Simon arambwira:

-Joanna ese umugabo wawe azaba ahari nuza kubyara?

-Kuki ubimbajije?

-Ni gacye abantu babyara abana batatu. Rero abagabo usanga bamwe baba bashaka kuza kwirebera uko abagore babo babyara

-None se biremewe ko umugabo aba ahari umugore we abyara?

-Biremewe ahubwo ni na byiza. Biri mu bituma umugore abyara atekanye kuko hafi ye aba aziko hari papa w’umwana

-Uwanjye ntazaba ahari

-Kubera iki?

Nazamuye intugu ndaceceka

-Joanna uretse kuba muganga wawe ibuka ko turi n’inshuti. Mbwira nta kibazo

Nuko mutekerereza byose kugeza umunsi mfata indege

-Joanna ndabyumva rwose naranabibonaga ko utameze neza gusa ntukunda kuvuga. Gusa jya wiringira Imana niyo izi byose. Nzi yuko uyu munsi kubabara biba bidutegurira ibyishimo by’ejo. Mu cyumweru gitaha uzaze tujye gusangira tuganire birambuye

-Gusangira? Sinshaka ibibazo n’umugore wawe

– Humura ndi umupfakazi. Hashize imyaka itanu umugore wanjye ahitanywe n’impanuka

– Oh. Ihangane

-Yari agiye gusura iwabo ari kumwe n’abahungu bacu babiri

-Birababaje. None urakora akazi neza ukumva uratuje?

-Nibyo nshaka kukuganirira. Nshaka kukwereka uko nyuma y’ibyo byose Imana yamfashije nkaba ntuje ntekanye

– Yari umunyakanada umugore wawe?

-Oya yari uwo mu gihugu cyawe. Buri mwaka njya gushyira indabo ku mva ye. Burya twazanye ariho mvuye.

Nasohotse aho numva byanyobeye. Ukuntu numvaga ari jye munyabibazo naho burya hari abababaye kundusha. Nahise nibuka imvugo igira iti: “Niganyiraga ko ntagira inkweto kugeza mbonye utagira ibirenge”

Ndi kwiganyira ngo umugabo yarantaye naho Simon we aratuje nyuma yo gupfusha umugore we n’abana.

 

Natashye mbyibazaho

 

 

Inkuru irakomeza…

 

6 comments

  1. Yooo reka bazibanire disi amuhoze amarira ya Didi. Rwose umbabarire ntibazabane na Didi mwanditsi mwiza😘

    Like

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s