Inkuru ndende

Igihe cyanjye kizagera: Agace ka 15

Ubwo nanjye naramuramukije ariko mbikora byo kwikiza gusa kuko Monique ari jye yari ashinze kumwitaho. Nahise nibaza ukuntu Dieudonne aje muri ibi birori nibaza niba ari agakino bankinnye cyangwa ari uguhurirana biranyobera. Gusa nanone nibaza impamvu aje wenyine atari kumwe na Bella nabyo biranyobera.kuko tukibana nta hantu yatumirwaga ngo agende tutajyanye. Ariko sinabitinzeho. Nahise mushakira aho yicara nuko mbwira umwe mu batangaga ibyo kuywa ngo amwiteho. Gusa byanyuzagamo nkabona Didi andembuza ariko nkigira nk’aho ntamubonye ngakomeza gahunda zanjye

Ubwo Marc na Lyne bahageraga bakabona Didi nahise mbona Marc ahindutse ahita ambaza:

– Joana, uri mu yihe mikino? Didi arakora iki hano?

-Ni Robert, umuhungu wa Monique wamutumiye. Nanjye rwose natunguwe. Gusa ngo bamenyaniye I Geneve kuko na Didi niho yize. Gusa kuko Monique atari azi ko ari we mugabo wanjye, ni jye yamushinze ngo mwiteho. Namushakiye aho yicara gusa ibindi mbishinga abatanga ibyo kunywa

-Ntiyigeze akuvugisha

-Oya ntaramvugisha

 

Lyne yahise anca mu ijambo:

-Araba se amubwira iki? Joanna uwo mwanya ndagusabye ntuwumuhe rwose

-Erega muhumure Didi ntankeneye. Ni Bella umushishikaje dore ko ari hafi no kumubyarira.

Nicole yahise aza kundeba ngo tujye gutunganya gato Monique ari bukoreshe iriho bougies ari buzimye. Nuko Moique azengurutswe n’abana be (na njye ndimo) twafatanyije kuzimya buji 70 abantu bose bahita bakoma amashyi.

Ibyo birangiye hakurikiyeho kubyina. Monique ni we wabanjemo n’imfura ye Paul bafungura piste. Byari biryoshye bose bishimye nuko abantu bose batangira kunyeganyega.

Nakomeje kurebera Didi kure. Yari yigunze ariko Robert akanyuzamo akajya kumuganiriza. Bigeze aho amuhuza n’izindi nshuti baraganira.

Uko abantu bakabyinnye, Joel yahise ansaba ko twabyinana nanjye mbyemera ntajuyaje. Twabyinnye harimo indirimbo ya zouk y’umuhanzikazi Jocelyne Beroard yitwa SIWO. Gusa tugeze hagati umuntu yahise anshikanuza n’uburakari bwinshi ndebye nsanga ni Didi.

Joel ahita amubaza:

 

– Wa mugabo we iyo mico y’abantu batarezwe wadukanye bite byawe?

-Ahubwo ni wowe utararezwe. Uratinyuka ukambyinishiriza umugore umwegereye gutyo utanabanje kunsaba uruhushya rwo kubyinana na we?

 

Ibyo byatumye ababyinaga bose bahagarara baratwitegereza batunguwe banatangaye nuko Monique na Robert bahita baza:

quelles sont ces manières de mal éduqué Monsieur?

– Joanna bigenze bite?

 

Nari ndakaye ku buryo kuvuga byananiye nuko Monique ahita abaza Dieudonne

-Ufite ikihe kibazo wa mugabo we?

-Uyu musore yihaye kumbyinishiriza umugore atanyatse uburenganzira

-Umugore wawe? Ese ni wowe Dieudonne?

 

Aha niho nahise menya ko burya Monique koko nta kintu yari abiziho. Nari natangiye kumurakarira. Nuko Robert ahita asobanura:

– Didi, uyu musore uri kubyinana na Joanna ni murumuna wanjye. Turi mu birori bya mama ntabwo ukwiye kwitwara gutyo. Uyu mugore wita uwawe ko wamusanze hano ukaba wambwiye ko umugore wawe yagize ikibazo atabasha kuza waba ufite abagore babiri?

 

Ibi byanyeretse ko na Robert atari azi ko umugabo twatandukanye ari Didi dore ko atari yarigeze anabimbazaho. Kandi no mu bukwe bwacu ntiyigeze aza kuko we yarangije kwiga aguma muri Geneve nibwo yari akigaruka kuva icyo gihe.

Nuko Monique arasobanura:

 

– Uyu ni we yabanje gushaka nuko aramwirukana. Rero wa mugabo we, wiza guteza akajagari mu birori byanjye sohoka utahe, ibyanyu muzashake aho mubivugira.

– Simva hano tutajyanye

Nahise ntekereza ko Didi mu rugo rwe bitameze neza. Kuva nava iwe, ntaranampamagara ariko abaye akimbona ati sintaha tutajyanye. Aracyankunda nubwo yabirenzeho agashaka undi mugore. Nuko marc ahita amusubiza:

 

– Ese ucyeka ko mushiki wanjye ari ikintu bajugunya bakazagitoragura igihe bashatse uko biboneye? Ufite iyihe mpamvu yatuma mujyana mbese? Ese ubundi mwazanye?

Didi kubera uburakari yahise avugira hejuru:

– Ese mufite ikihe kibazo? Ngo nashatse undi mugore? Ba data wacu bafite benshi, sogokuru yari afite abagore 18. umwami Salomo yari afite 700 n’inshoreke 300. None nakoze ikihe cyaha?

Monique yahise amusubiza:

-Kugira abagore benshi si cyo kibazo mwana wa. Ikibazo ni ukubeshya. Kandi iyo ushaka gushaka undi mugore bigira inzira binyuramo, ukanabiganiraho n’uwo ufite. Hagati aho rero hano siho ibyo bije kuganirirwa, witubihiriza ibirori itahire uruhuke ubitekereze neza

 

Didi nubu sindamusobanukirwa. Rimwe ati niba uhisemo akazi mvira mu rugo, ubundi ati sintaha tutajyanye. Niba yarashakaga ko ntaha kuki atabaririrje aho mba ngo aze gucyura?

Robert yaramuganirije nuko yemera gusohoka. Nahise njya mu cyumba nuko Lyne, Marc na Joel baza kumpumuriza.

Ese ubu koko Didi azampa amahoro ryari?

Ngeze mu cyumba nicaye ku buriri nuko Lyne wacu atangira kumbwira:

– Sinumva ibyo maze kubona niba byabaye cyangwa mbirose. Didi aragufuhira cyangwa ni ibindi? Uribyinira agafuha kandi we yanashatse undi mugore agashaka uceceke.

Hashize akanya gato nahise mbona ubutumwa bwa Didi: “Iriya niyo mpamvu yatumye nkubuza gushaka akazi. Utangiye ubusambanyi koko? Muri ibyo birori urahakora iki? Umugore ufite umugabo utangiye kwiruka mu bagabo? Nta gatanya uzabona, wa ndaya we”

Narabusomye nzunguza umutwe. Didi ubanza afite ikibazo mu mutwe. Ubu se ni Didi nzi mu myaka 5 ishize cyangwa baranguraniye sinabimenya? Muri macye we ashaka umugore wicara hariya mu rugo ntahave, akagendera ku mategeko ye gusa. Umuntu wanyambuye ubusugi akaba ari na yo mpamvu yatumye yiyemeza ko tubana atinyutse kunyita indaya abonye mbyina gusa? Ubu se we ni iki ra?

 

Bwakeye ari ku cyumweru narakangutse ariko numva sinshaka kujya mu rusengero. Nahisemo kuza kujya muri misa ya nimugoroba. Muri ako kanya nahise numva umuntu akomanze ku cyumba mbona ni Monique

-Waraye neza Joanna?

-Mwaramutse mama. Mbabarira kuba Didi yakwangirije ibirori

– Oya. Yamaze kugenda nsaba imbabazi abashyitsi ibirori birakomeza andi masaha abiri. Naje kukureba nsanga wasinziriye

-Ngirango noneho nawe Didi wamwiboneye. Yananyandikiye anyita indaya.

– Nyemerera nguhe inama. Niba mukibana atarigeze akwitwaraho kuriya wasanga hari amakuru amugeraho wowe utazi. Ntiyapfuye kwitwara kuriya gusa. Gusa si ibyawe igihe ubwacyo kizabigaragaza. Gusa nabonye ko akigukunda niyo mpamvu akigufuhira.

 

Ako kanya umukozi ayarkomanze arinjira aransuhuza ashyira ipulato ku meza ari mu cyumba.

-Nijye namubwiye ngo akuzanire ibya mu gitondo mu cyumba kuko nacyekaga ko umerewe nabi.

Narabyutse ndicara

-Ugiye he Joanna?

-Ngiye kubanza koza amenyo mbone kuza gufata icyayi.

-Tangira wimenyereze ahubwo kujya ubanza kurya mbere yo koza amenyo. Nibwo ubasha gukura imyanda mu menyo icyarimwe kandi ukagira mu kanwa hadafite impumuro mbi. Nijoro nyuma yo kurya jya woza amenyo, bituma mu gitondo ubyuka mu kanwa nta kibazo hafite bigatuma urya ibya mu gitondo utabangamiwe, wamara kubifata nabwo ukoza amenyo. Kandi ukarindira byibuze iminota itanu ariko waba wariye ibirimo acide nk’indimu, wanyoye divayi cyangwa inzoga kimwe n’izindi mbuto muri rusange ho wajya urindira iminota 30 ukabona koza amenyo

Aya mabwiriza ya Monique yatumye nturika ndaseka

-Sinari nzi ko burya uri na muganga w’amenyo

-Oya sindi we ahubwo ni amabwiriza nahawe na muganga nanjye

 

Nahise nicara mpfunduye nsanga hariho umureti, ikawa, umugati n’imbuto

Nahise mpera ku mureti ariko umwuka wawo ukinkubita mpita numva ngiye kuruka.

-Ubaye iki Joanna?

-Umwuka w’umureti urankubise numva ngiye kuruka, mama

-Urarwaye rero. Jya kwiyuhagira reka ndebe umushoferi akujyane kwa muganga

– Oya mama si ngombwa. Sindwaye pe

Ariko Monique yakomeje gutsimbarara nuko njya koga. Mazekwitegura ndasohoka ariko ntaragera muri salon numva bari kumvuga ndahagarara ngo numve. Ni Monique n’abana be n’abagore babo

-Joanna ntameze neza musabye kujya kwisuzumisha bakareba icyo arwaye.

Paul yahise amubwira:

-Ese wibagiwe ko umugore wanjye ari umuganga? Uba wamubwiye akamusuzuma?

-Aramusuzuma se ubu yagendanye ibikoresho?

Muka Paul ahita avuga:

-Si ngombwa buri gihe ibizami mama. Ubanza kuganira n’umurwayi, hari igihe uhita uvumbura icyo arwaye utiriwe ufata ibizami. Ibizami bifatwa kugirango wemeze neza cyangwa iyo uri kumva ibimenyetso bihurira ku ndwara nyinshi ushaka kumenya iyo ari yo muri zo. Ari hehe Joanna?

– Ari koga. Urebye ikibazo yagize ni isesemi yagize agiye kurya ibya mu gitondo.

-Ubwo se ntiyaba atwite?

-Nanye niko nabanje gutekereza ariko kuko amaze imyaka 5 adatwita sinabitindaho

 

Ubwo numvaga ijambo “gutwita” nahise nshiguka. Hashize amezi abiri koko ntabona imihango. Ariko kuko natangiye kuyibura ubwo namenyaga ko Didi yazanye undi mugore naketse ko ari kwa kundi stress ihagarika imihango. Gusa nanatekerezaga ko naba naracuze imburagihe.

Birabe ibyuya Mana we

 

Ese koko aratwite cyangwa ni uburwayi busanzwe?

 

Ntuzacikwe inkuru ikurikira

 

Ngiyi indirimbo babyinaga ubwo Didi yashikanuzaga Joanna mu maboko ya Joel

https://www.youtube.com/watch?v=rFzOeeulJGk

11 comments

  1. Mbega inkuru nziza weeeee!!! Birangiye Joanna nawe agiye kubyara disi!Tebutsa n'utundi duce numve uko Didi azabyitwaramo namara kumenya ko abagore be bombi batwite!!!

    Like

  2. Hhhhhh!!!!abagabo barambabaza bakananshimisha ,uhm ubu arabona afite ishingiro ryogufuhira umugore yirukanye?Ubuse we niba koko atwite ubu didi azemera ko ari iye umuntu utangiye kumwita indaya? Aho kwishima cg ngo mbabare ahubwo ngize ubwoba! ! Pee

    Like

  3. Mbega byiza weee,gusa biryoha biryana utwitiye umugabo utangiye kukwita indaya ESE azemera ko iyo NDA ariye???

    Like

  4. Ibi birenze gufuha ahubwo n'ubugoryi buvanze n'ubugome, ese yashaka abeho mugahinda yamuteye gusa ntazigere yishima na rimwe?Joanna abaye atwite byanshimisha, Didi yahita abona ko har'imyanzuro yafashe ahubutse

    Like

  5. Mbega ukuntu Didi yikunda wee! Arafuhira umugore yirukanye kuko yibyiniye gusa kdi we yaramuharitse, ngizemo akoba ahubwo ko atazemera inda ya Joanna ubwo atangiye no kumwita indaya!!!

    Like

  6. sisi jye ndishimye maze ariko inkur irimo ninyigisho i mean ubumenyi ati amenyo utararya ndabimenye kbs

    Like

  7. Didi nyamara azatora amashashi na titonda or.gusa iyonda nangye ndunva bizagorana ngo ayemere peariko ntakibazo Joanna numugore wubwengye azirera umwana nashaka kuzana ibya mma wararaye.

    Like

  8. Mbibuba!Hhhhhhhhh, impundu weeeeee !Bella we urasebye tu, nizeye ko iyo nda ubeshyera Didi atari iye rwose kdi ikinyoma cyawe kizagaragara. Mana ushimwe.

    Like

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s