Inkuru ndende

Igihe cyanjye kizagera: Agace ka 13

Nubwo nihagazeho ariko amarira yaraye ashoka ku buryo amashuka yatose. Ese nacumuye iki gituma mfatwa gutya koko? Hari ibitubaho bituma twibaza niba ubuzima bugira umurongo ndetse ukaba wanibaza impamvu ubabara kandi nta kosa ufite. Gusa byose bibaho kubera impamvu iyo igihe kigeze umenya ko byari ngombwa burya.

 

Bucyeye nasangiye ibya mu gitondo na Monique

-Waramutse Joanna, waraye neza?

-Waramutse mama. Si neza pee. Naraye ndira

-Humura uzabimenyera mwana wanjye. Buriya iyo uba ari wowe wahukanye wari kujya wishinja ko ari wowe wenda munyamafuti bityo ntumenye urundi ruhande rw’umugabo wawe. Ariko ubu byibuze yakwiyeretse bihagije.

-Nibyo mama. Rwose siniyumvishaga ko Didi yahinduka bigeze aha pee.

-Ihangane. Igihe niwo muti wa byose. Nubwo utabizi ariko ubu niho utsinze kuruta ko wari kwijyana. Waricecekeye none umugabo wawe atangiye kwicuza kuko akwirukanye

-Ibyo se byo wabibwiwe n’iki?

-Wambwiye ko ugiye yakubajije impamvu utamusabye imbabazi. Ibi ni ukwicuza nubwo ntacyo yabikoraho. Yibwiraga ko ntaho wajya nawe kubera guceceka ntiyari gutekereza ibiri ku mutima wawe. Byamuteye gukora ubugoryi kandi azabyicuza uzabibona

-Ndumva nshaka kubimenyesha Lyne na Marc. Nta mbaraga zo gukora mfite.

 

Nahise njya aho Marc akorera mubwira uko byitwaye

 

-Ndaguherekeza kwa Didi gufata ibyawe. Nta mpamvu yo guhamagara polisi. Ufite musaza wawe byibuke. Imyenda yo yimurekere nzakugurira indi. Ese ubundi waje ukaba iwanjye?

-Oya Marc, Lyne nawe arahagije reka ndeke kukongerera umutwaro. Umugore wawe ashobora guceceka ariko atabishimye burya gutunga bashiki bawe bose si ibintu. Gumana na Lyne utarabona akazi jyewe nzaguma kwa Monique nta kibazo
-Noneho ba utashye ndaza kukureba nimugoroba tujye kwa Didi. Akira aya mafaranga utege imodoka

-Urakoze Marc ariko tike si ngombwa Monique yantije imodoka ye niyo najemo.

 

Nkiva kwa Marc ntarinjira mu modoka numvise umuntu ampamagaye mu izina.
– Joana.
Narahindukiye. Ni muramu wanjye Arnaud

 

-Joanna uraho

-Uraho Arnaud

-Joanna ni amahoro ko mbona wijimye mu maso?

-Ni amahoro Arnaud. Ahubwo reka ngende

-Ese Joanna kuki uri kumbwira gutyo koko?

-Arnaud singifite umwanya wo guta ku ndyarya nka mwe

-Joanna nagutwaye iki?
– Wajyaga unyita umugore wanyu ukunda nyamara ntiwigeze umbwira ko Didi agiye gushaka undi mugore

-Eeeh. Noneho ndakumvise. Reka ninjire mu modoka basi ngusobanurire. Joanna, jyewe na mushiki wacu Rita ntitwigeze dushyigikira buriya bukwe, n’ikimenyimenyi mu gusaba no gukwa ntitwabyitabiriye. Byatumye umujinya wa Didi uzamuka ku buryo yanambujije kuzamugarukira mu rugo. Yongeyeho ko bitatureba bityo tutemerewe kugira icyo tuguhingukiriza. Ndabona noneho we yarabikwibwiriye

-Ubu rero uwo mugore yaraje ari mu rugo.

-Ntibishoboka. Ibyo Didi yarabitinyutse?

-Ibyo byoroshye? Ejo rero yaranyirukanye ubu sinkiri iwe

-Ibyo noneho bindenzeho peee. Rita yatinye no guhura nawe kuko afite isoni z’ibyabaye. Bella ubusanzwe ni inshuti ya Rita bityo mama yabyuririyeho amuhuza na Didi. Kuko rero ka Bella gakunda amafaranga kandi Didi akaba akize, kabyemeye bwangu. Sinkubeshye ruriya rugo ntiruteze kuzaramba. Si ngaha aho ndi!

 

Yaransezeye nanjye ndataha. Sinabivuze nti ni mabukwe byose wabipanze? None dore koko niwe wabitangiye byose. Gusa nanone iyo Didi atabyemera ntiyari kumumutsindagira.

Nageze murugo nduhukaho gato ntegereza ko Marc aza tukajya gufata ibyanjye kwa Didi. Gusa nashaka kubyanga ni ukwitabaza polisi.

Bugorobye Marc na Lyne baje kundeba nuko tujya ahahoze ari iwanjye. Umuzamu yabanje kubaza Didi aremera turinjira. Marc ahita afata ijambo:

 

– Mwiriwe Didi. Nkuko ubizi Joanna hari ibyangombwa bye biri hano. Nibyo tuje gufata. Joanna injira ufate ibyawe ugire vuba uze dutahe.

Didi ahita amusubiza:

-Marc ibyo ukora si byo. Wakabanje kumenya byibuze icyatumye Joanna agenda ukaba ari cyo ucyemura. Wibuke ko uyu ari umugore wanjye

-Wibuke ko mbere yuko akubera umugore ariko ari mushiki wanjye kandi nta na rimwe nzihanganira ko uwo ari we wese amuhonyora. Ubanza waragizengo yabuze ababyeyi abura n’abavandimwe

Lyne yahise yungamo:

-Didi ntuzongere kuvuga ko Joanna ari umugore wawe. Waramusuzuguye bihagije ahubwo itegure vuba arajya kwaka gatanya

-Yewe aho ho yaba arota. Iyo gatanya sinteze kuyimwemerera.ni umugore wanjye kugeza apfuye kandi byaba byiza agarutse hano akemera kunyubaha tukabana neza. Akazi ashinzwe ni ukunyitaho. Hari icyo yabuze hano se? Niba yumva nzamuha gatanya ho rwose aribeshya

Ubwo nari maze gufata ibyanjye byose nahise ngana mu gikoni. Hari agapulato nkunda cyane nahawe na Esta nk’impano ndumva ntagasiga rwose. Ngeze mu gikoni nsangamo Bella nuko arambwira:

-Joanna, nizereko wamenye ko iyi nzu ubu ari iyanjye n’umwna ntwite naho aha hatakiri iwawe. Ndi wowe nasaba gatanya hakiri kare

-Imana ishimwe ko utari jyewe utanateze kuzamuba. Baca umugani ngo umwijuto w’ikinonko ugirango imvura ntizagwa. Ubaye utaranamara umwaka hano utangiye kunyihenuraho nararumazemo imyaka itanu?

Nafashe ka gapulato nsubira muri salon mbwira abavandimwe nti tugende. Didi ahita amfata akaboko:

-Uri umugore wanjye kandi umugore abana n’umugabo we

Nahise nibuka amagambo ya Monique ko Didi ari kwicuza

Marc yahise amutegeka kundekura ariko Didi akomeza kumfata. Marc yahise ahaguruka amwasa urushyi rwiza Didi ahita andekura asubira inyuma. Sinari nzi ko Marc ibi yabikora.
Twarasohotse turagenda gusa nagiye nibaz abyinshi. Kutabyara kwanjye biteje amahane angana gutya koko? Ngaho ndagiye nabane amahoro na Bella we. Nanjye reka nshake uko natangira gusaba gatanya.
Ubwo nabibwiraga Monique nkamubwira ko ngiye gusaba gatanya yahise ansubiza:

-Sinakubwiraga ko guceceka bizakugirira akamaro. Nimugera imbere y’umucamanza nta na kimwe uzashinjwa kuko nta jambo wavuze kandi nta kosa ufite rindi. Ikindi si wow wijyanye warirukanwe.

Humura gatanya uzayibona kuko umwanzuro ufatwa n’umucamanza amaze kumva impande zombi.

-Ndabyizeye mama

-Joanna, mbere yuko uryama nshakako utekereza ku buzima wanyuzemo wowe na Didi kuva mwamenyana kugeza uyu munsi. Utekereze ku byo yagusezeranyaga atakoz. Ibi ndabizi kubyibaza biragutera kurira. Ntiwifate urire rwose bihagije. Numara kurira wihanagure woge mu maso wiyemeze ko ibyahise bijyanye n’ayo marira kandi bitazongera kukuriza. Ubundi uryame. Uzabyuka ufite ingufu zo guhangana n’ahazaza ahahise uhatere umugongo

-Mama ndababaye pe. Kubona Bella ambwira ngo nta mwanya wanjye uri muri iriya nzu? Inzu yubatswe ari jye mpagarikiye abafundi koko ngo nta ruhare nyifiteho?

– Joana, emera ko nawe wakoze amakosa. Wizeye buhumyi ibyo umugabo yakwizezaga ko nta wundi mugore yazana, agukura ku kazi uremera, nta na gato wizigamye kagutabara ubu. Menya ko buri wese ariwe muyobozi w’ubuzima bwe bwite waba ingaragu cyangwa warashatse. Ntuzagire uwo ubeshyera ngo yaguteye kuyoba kuko utiyoboye natwe uzakuyobora. Ni twe twiha umunezero cyangwa tukawibuza. Joanna uracyari muto jye ndashaje ndabyina mvamo. Dore inama nguhaye: jya wumvira ijwi rikuvugiramo mbere yo gutangira urugendo cyangwa ikindi. Iryo jwi nuryumva uzaryumvire udashidikanya ni ijwi ry’Imana. Gusa ntuzigere wemerera n’umwe kugufatira imyanzuro ku buzima bwawe. Uranyumva neza?

-Yego mama. Amagambo yawe arampumurije kandi ndashimira Imana yaduhuje.

– Ngaho jya kuryama utekereze ku hazaza hawe, ni ah’ejo

 

Inkuru iracyakomeza

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s