Inkuru ndende

Igihe cyanjye kizagera: Agace ka 12

Ntashye nasanze Didi yabishe ahita ambwirana uburakari ati:

– Joana, ugomba guhitamo hagati y’umugabo cyangwa akazi. Jyewe urabizi sinemera ko umugore wanjye agira akazi akora. Hita kandi unsubiza nonaha.

Naracecetse ndamwihorera mpita ninjira mu cyumba.

-Si wowe mbwira Joanna?

Nakomeje kumwihorera mfata terefone yanjye nihamagarira Hilda. Didi yahise asohoka mu cyumba yijujuta ariko ntumva ibyo avuga. Gusa ku mutima byaranshekeje. Gusa mu mutwe wanjye rwose harimo ko aka kazi ntateze kuzakareka. Nkareke se nkore iki mu rugo? Turi abagore babiri kandi ibyo nakoraga undi yiyemeje kuzajya abikora.

Nagumye mu cyumba gusa ubwo nasohokaga ngeze muri salon ibyo nabonye byambereye inzozi. Didi na Bella bari bicaye muri salon barimo gusomana. Kuko aho naturutse Didi atandebaga , Bella yarambonye akaza umurego arushaho kumwiyegereza no kumusoma neza ngo ambabaze. Ubu kandi Didi azongera ambwire ngo icyo yashakaga ni umwana gusa? Gusomanira ku karubanda koko muri salona ahantu buri wese yinjira uko ashatse?
Ibi byatumye ndushaho kwibaza niba ubu buzima nzakomeza kububamo mpaka ryari. Mabukwe yambereye umugome we washatse ko mbana na mukeba mu nzu. Ikiboneka cyo Didi we arabyishimiye. None se atambeshye ubu koko aracyankunda?

Nasubiye mu cyumba bucece kuko sinashakaga ko Didi amenya ko nababonye. Ndababaye ariko sinshaka kurira mu maso ya Didi. Gusa ndabona bya bibazo bya Monique hageze ngo mbisubize. Ku cya mbere , yego ndacyakunda Didi. Ntunseke kuko Didi ni we musore nakunze bwa mbere kandi mu myaka 8 yose nta kosa riremereye yankoreye ngo nshidikanye ku rukundo rwe. Niwe wanyambuye ubusugi, niwe nahaye urukundo rwanjye rwose. Uretse kutabyara nta kindi cyigeze kibangamira umubano wacu. Gusa ku kibazo cya kabiri, oya. Sinashobora gukomeza kubana na we afite undi mugore. Sinigeze nitegura kuzasangira umugabo n’undi mugore noneho mu nzu imwe?

Narongeye ndahaguruka nsubira mu gikoni. Noneho nasanze batakiri muri salon ahubwo bagiye muri cya cyumba Bella yateguriwe. Monique yari yarambwiye ko Imana ariyo izabikora, ngombwa ari ugutegereza igihe nyacyo. Nahise mbona ko icyo gihe kiri kwegereza.

Iryo joro Didi ntiyaraye mu cyumba cyacu. Naraye nibaza ibiri kubera mu kindi cyumba birushaho kuntera ishavu.

Mu gitondo narabyutse nitegura kujya ku kazi nuko Didi ahita yinjira mu cyumba.

-Mwaramutse Joanna

-Mwaramutse Didi

-Ugiye hehe se

-Ngiye ku kazi

Ahita arakara isura irahinduka

 

-Ejo nagusabye guhitamo hagati yanjye cyangwa akazi.

 

Naracecetse nisohokera mu cyumba ndagenda. Ubwo nagarukaga nasanze Didi atarataha njya mu cyumba mpindura imyenda njya mu gikoni gushaka ibyo kurya. Mabukwe noneho yari yasubiye iwe hasigaye umukozi.

Ubwo nari ntangiye kwarura Bella yahise yinjira anshikuza icyo naruzaga ahita ambwira ati:

-Umva mada, sinaje hano kukubera umuyaya. Uru urgo nta cyo urukoramo. Ndateka ugatinyuka kuza kwarura. Ntundire ibiryo rero.

Nahise mbona ko ari urwiyenzo. Naramwihoreye nkuko Monique yabingiriyemo inama, ariko narura amakaroni mpita nyarya andeba.

Nahise njya muri salon kureba tereviziyo kuko ikiganiro nkunda cyari hafi kujyamo ndicara ngo ntegereze. Bella yahise aza anshikuza terekomande ahindura chaine

nahise mbona ko ashaka impamvu ngo nzaregwe ko narwanye n’umugore utwite. Si uko ntashobora guhangana na we ariko naricecekeye nsubira mu cyumba.

Amahirwe ni uko mfite akazi bityo simba ndi kumwe na we amasaha menshi naho ubanza inama za Monique rimwe nazananirwa kuzubahiriza.

Nahise nsinzira nuko mu gitondo mbyutse ngo njye ku kazi nsanga imfunguzo z’imodoka nta zihari. Natekereje ko nibagiwe aho nazishyize ariko nkomeza gushaka ndazibura. Narimo gushakira mu isakoshi nuko Didi aba arinjiye ati:
– Niba uri gushaka urufunguzo rw’imodoka wikigora. Ubwo wanze kunyubaha nta n’uburenganzira ufite bwo gukoresha iriya modoka.

Naracecetse ndasohoka nuko ahita ambwira ati: “Joanna uri gukina n’umuriro”

 

Naramwihoreye ndagenda ntega tagisi njya ku kazi

 

Nimugoroba ngarutse umuzamu yanga kunkingurira

-Mabuja rwose ntunyumve nabi ariko boss yambwiye ko ninibeshya nkagukingurira ahita anyirukana.

-Koko niko yakubwiye?

-Nukuri mabuja niko yambwiye

 

Nahise mfata terefoni ngo muhamagare mubaze koko aho kunyitaba ahita aza kuri portail.
-Joanna, amahitamo ni abiri. Urareka akazi, uze mu nzu cyangwa uhitemo akazi, ujye gushaka aho uba umvire mu rugo. Hitamo rero

 

Didi yahisemo undi mugore atamenyesheje, ambuza gutwara imodoka yanjye none ansuzuguriye imbere y’umuzamu. Koko Monique ubanz ayerekwa, burya umukuru aba ari mukuru koko. Igihe nyacyo iyo kigeze ibintu birikora.

Nubwo nari nuzuye uburakari ariko nashiriyemo ndaceceka nuko ndamubwira nti:

-Reka ninjire mfate imyenda yanjye kuko nzayikenera

-Iyo myenda yaguzwe mu mafaranga yanjye. Niba uhisemo kugenda genda wenyine

 

Nahise numva ko amajoro abiri ashize atararana nanjye yahinduye byinshi. Bella yatangiye kumuganza ibitekerezo. Ntakinkeneye kandi nanjye ni uko gusa nashakaga ko bizaba ntabigizemo uruhare.

Nahise nkata nsubira inyuma. Ndi ugenda numva arambwiye:

-Joanna aho kunyinginga ngo unsabe imbabazi uhisemo kugenda? Ese ubona ari nde mugabo wundi muzabana neza nk’uko twabanaga?
Numvaga narira ariko ndikomeza. Nahise mbona moto ndayitega njya kwa Monique dore ko ari we wari warabaye mama.
-Joanna ni amahoro ko uje bwije

-Didi amaze kunyirukana

 

Namutekerereje byose uko bimeze nuko arambwira ati:

-Niyo mpamvu nakubwiraga ngo uzicecekere Imana izitangira igisubizo. Yaraguhemukiye none ageretseho kukwirukana koko? Komera ushikame, Imana izi impamvu kandi humura izaguhorera

-Uzi ko yanambujije kuzana imyenda ngo niwe wayiguze. N’impapuro zanjye za ngombwa zose niho zikiri

-Joanna imyenda uzabona indi. Ibyangombwa byawe humura mfite umupolisi w’inshuti nzamubaza inzira tuzanyuramo ukabihabwa naramuka yanze ko ubifata ku neza.

-Urakoze mama. Nari nanze kurara ntakubwiye ibyambayeho reka rero ngende

-Urajya hehe se iri joro mwana wa?

-Ngiye kwa musaza wanjye Marc. Ndararayo iri joro ejo nzashaka inzu yo gukodesha nzabamo

-Mwana wa, iyi nzu ubona nyibanamo n’abakozi gusa. Kandi ni nini. Ibyumba abana babagamo ntawe ubirimo. Byanshimisha ugumye hano n’ubundi irungu ryari kuzanyica. Uhawe ikaze hano ubu habaye iwawe
Iryo joro sinabashije gusinzira kuko naraye nibaza iherezo ry’ibi rikanyobera.

 

Ese Mana ubu koko hazagera undenganure?

 

 

Ntuzacikwe n’agace gakurikiraho

 

1 comment

  1. Ariko Mana ndumva mbabaye cyane Joanna Ihangane utegereze ImanaKandi uranyigishije mubuzima mbonye isomo ryo bita kwihangana Monique Imana ikomeze igukoreshe ibyubutwari

    Like

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s