Inkuru ndende

Igihe cyanjye kizagera: Agace ka 11

Didi yahise ansanga mu cyumba nuko arambwira ati:

-Joanna, data wacu yambujije kwirukana Bella

 

Nyumvira nukuri. Didi atangiye kundakaza noneho pee. Uru se ko ari urugo rweni gute bamufatira umwanzuro w’ugomba kurubamo? Yaba A cyangwa B, ibyo si jye ubimuhamo inama. Aje kubimbwira nk’aho ibitekerezo namuha hari icyo byahindura. Gusa naramwihoreye arakomeza

-Gusa jyewe numvaga atari wowe ukwiye kuruvamo pee. Ese ubundi cherie Joanna, hari icyo byagutwara gukomeza kubana na Bella hano? Wenda nta wamenya hari igihe mwabana neza mukanaba inshuti.

Ngo? Jyewe nkaba inshuti na mukeba wanjye se? Ariko noneho ubanza Didi yahanzweho si gusa. Mbese mbe akagoryi byose njye nemera…. Nakomeje kwicecekera

– Joanna, mvugisha nshaka kumva icyo ubitekerezaho

Nakomeje kumwihorera nkomeza gukandagura terefoni nari mfite mu ntoki. Abonye nanze kumuvugisha yaranyegereye anyegura umutwe ashaka kunsoma

Nahise mwishikanuza mwigizayo abona ko ntabishaka.

-Didi, ibi byose kuri jye ni bishya urabizi kandi byarantunguye. Rero nyihanganira umpe igihe cyo gutekereza nimara kubona igisubizo nzagusubiza

Rwose ndumva no kumusoma ntabyo nshaka. Ubwo yanashaka ngo dukore imibonano rero? Uwatinyutse gutera inda akabimpisha namenya gute niba aho avuye ho atari yaragiye guterayo izindi se?

Gusa ntabwo mufitiye ibyiyumviro rwose sinzi niba bizanaza. Nahise mpaguruka ku buriri mpindura imyenda mfata urufunguzo rw’imodoka

-Didi wirirwe rero ndagiye

– Ugiye hehe Joanna?

-Hari umushuti ngiye gusura

– Uwuhe mushuti?

-Ntabwo umuzi yewe. Ndaza vuba

 

Narabibonye ko ngiye atabishaka ariko abura icyo arenzaho. Nahise nigira kwa Monique, dore hashize iminsi ine amenye ikibazo cyanjye. Yari yaransabye nzagaruke kumubwira niba koko Didi yarashatse undi mugore. Buri munsi yanyohererezaga ijambo ryiza ryo kumpumuriza

-Mwaramutse mama

– Mwaramutse Joanna

-Mama wari mu kuri, ni byo koko Didi yazanye undi mugore

-None se kuki atabikumenyesheje mbere

– Yambwiye ko atashakaga kumbabaza kandi atashakaga ko namusiga

-None kuki yamuzanye ngo mubane?

-Urebye byakozwe n’umuryango we, ntiyari abizi ko byanabaye.

Nahise mutekerereza ibimaze iminsi biba byose. Nuko arambwira ati:

 

-Mwana wanjye Joanna mbere yuko ufata umwanzuro uwo ari wo wose, banza utekereze kuri ibi bibazo bibiri.

Icya mbere, Ese uracyakunda Didi? Niba igisubizo ari oya, ibyo biroroshye. Ariko niba ari yego, utekereze kuri iki kibazo cya kabiri. Urukundo waba umukunda rwose, witeguye kubana nawe ubizi neza ko afite undi mugore? Ahazaza hawe hazaterwa n’ibisubizo kuri ibi bibazo bibiri. Gusa ubu uracyafite uburakari n’agahinda ku byagukorewe. Aha rero ntiwahita ubona ibisubizo nyabyo. Ndakugira inama yo kureka hagaca iminsi, uburakari nibucogora niho uzafata umwanzuro nyawo. Hagati aho nakugira inama yo gushaka icyo ukora nabyo bizagufasha kutirirwa muri ibyo bitekerezo

-Nanjye ndabishaka ariko ikibazo se wowe ntubizi ko uri iyi minsi koko akazi kabona umugabo kagasiba undi?

-Ibyo bindekere. Uzanzanire CV na kopi ya dipolome yawe gusa ibindi nzabyimenyera

Numvise bindenze mpita mpfukama imbere ngo mushimire.

-Haguruka Joanna. Narakubwiye ngo ubwo uri imfubyi nzakubera mama. Nta ntambara itarangira humura n’ibi bizashira

Aha nahise mbona ko guhura kwacu bitapfuye kwikora. Imana niyo yanyoherereje uyu mubyeyi ngo amfashe kuva muri aka kayubi. Burya nta mahirwe abaho ahubwo ni Imana ibikora tutabizi tutanabigizemo uruhare

Ibyo mama Monique avuga nibyo koko. Ibi bibazo bibiri ngomba kubisubiza nitinze maze gutuza. Kuko ubu rwose ndacyafite umunabi muri jye.

Narasezeye ndataha. Mu nzira ngenda nagiye ntekereza kuri mukeba wanjye. Mbona umugore ari ikirura kuri mugenzi we. Ni gute umugore yemera kuza kudurumbanya abasanzwe bibanira koko? Gusa niko abagore duteye nyine buri wese akurura yishyira. No mu kazi usanga uwazamuwe mu ntera abandi bamuryanira inzara.

Nyamara abagore dushyize hamwe byahindura byinshi mu isi. Nk’ubu abakiri abakobwa baramutse biyemeje guhakanira burundu ibyo babwirwa n’abagabo bubatse. Ubu bamwe bari kuvuga ko ndi umunyeshyari kandi nikunda nshaka kwiharira Didi kandi afite uburenganzira.

Nyamara ni we wankuye iwacu anyizeza kuzankunda jyenyine none aranyigaritse. Nagiye mbyibaza ndinda ngera mu rugo ndaruhuka

Bucyeye bwaho nazanye ibyangombwa Monique yari yantumye. Yahise ansaba kuzagaruka nyuma y’iminsi itatu kureba aho bigeze. Nuko iminsi itatu ishize nsubiyeyo yahise ampa inkuru nziza

-Joanna, ibyangombwa byawe nabyoherereje umuyobozi mukuru wa sosiyete yanjye ASF ngo arebe akazi kajyanye n’ibyo wize.

-Eeeeh. Mama ntumbwire ko kiriya kigo gikomeye ari icyawe. Nukuri urakoze, urakoze cyane. Nzakora akahe kazi se mama?

-Kuko wize icungamutungo ni wowe uzungiriza umuyobozi mukuru mu bijyanye n’imari n’ubutegetsi. Gusa twifuje ko mu gutangira wakora imenyerezamwuga ry’amezi atatu mu bice byose kugirango ubashe kumenya neza imikorere y’ikigo

 

Nahise numva ngiye mu bicu. Byibuze nimba ndi mu kazi bizatuma ntirirwa mu rugo bityo nzabona akanya kanini ko gutekereza neza icyo nakora. Gusa nanone ni byiza ko ibi byose mbimenyesha musaza wanjye Marc. Naramuhamagaye ambwira ko namusanga aho akorera tukavugana

-Mwaramutse Marc

-Mwaramutse Joanna. Bite se?

-Sha wapi kabisa burya Didi yashatse undi mugore

-Reka kunkinisha se nyine. Ibyo se yabikora?

Nahise mutekerereza byose uko bimeze.

-None se kuki koko ubimbwiye ubu?

-Nari ntegereje ko Didi agaruka akabyiyemerera ko ari ukuri

-Umva Joanna genda witegure muri weekend nzaza kugutwara

-Bitware buhoro Marc.nta na hamwe nzajye kandi niyo nabikora si nonaha. Sinshaka gufata umwanzuro nazicuza nyuma. Nshaka kubanza gutuza ngafata umwanzuro ntahubutse

-Icyakora aho uravuga ukuri. Umuntu mubanye imyaka 5 mwarakundanye 3 ntabwo umunsi umwe cyangwa ibiri ihagije ngo uhite umwikuramo.

 

Naratashye ngeze mu rugo mbwira Didi ko nabonye akazi. Yahise abihakana. Gusa umwanzuro we nari nywiteze ariko ntacyo umbwiye. Kuva twabana naramwubashye nkagendera ku myanzuro ye ariko yampembye kumparika.

Naramwihoreye weekend iragera nuko kuwa mbere ndabyuka nditegura njya gutangira akazi.

Ntashye nasanze Didi yabishe ahita ambwirana uburakari ati:

 

Ntuzacikwe n’ibizakurikiraho

 

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s