Inkuru ndende

Igihe cyanjye kizagera: Agace ka 10

Twinjiye muri salon nuko ahita abona mabukwe na mukeba wanjye ahita atungurwa nuko ahita abwirana nyina umujinya mwinshi ati:

 

– Mama kuki wamuzanye hano? Ukanamuzana noneho ntahari, ikirenze ibyo ukamuzana utanambajije?

 

Ayo magambo yahise anyereka yuko uwo mugore amuzi ahubwo icyo atamenye ari ukuza kwe. Ibi bivuze ko yashakaga kubimpisha sinzapfe mbimenye. Umuryango we ubivumbuye, wamukinnye agakino adahari, wasanga barashakaga kuntesha umutwe nkahava nkagenda. Nahise njya mu cyumba

Gusa mu cyumba sinakinze ahubwo negetseho urugi gacye ngo nkomeze kumva ibyo Didi avugana na nyina.

 

-None se wasahakaga akomeze kuba iwabo kandi waramukoye ukanamutera inda?

-Ariko ibyo twari twabiganiriyeho kandi nkubwira ko ningaruka nzamukodeshereza aho kuba mu gihe ndi kubaka aho azaba

-Wacuze se ko ahubwo watinye ko Joanna azahita yigendera kuko wamuharitse

-Mama uzi ko ibintu wakoze byatera umuntu kwiyahura? Uziko Joanna iyo ataba intwari aba yaraguye muri koma cyangwa agapfa?

-Uravuga gupfa ukagirango ni ibintu byoroshye ariko? Ko atapfuye se nyine? Uko byamera kose, umugore wawe ari hano. Akeneye ko umuba hafi, umwana akeneye kwitabwaho na se nubwo yaba akiri mu nda. Kandi uramuke urwanjye ndarurangije

 

Mabukwe amaze kugenda hashize hafi isaha yose Didi atarinjira mu cyumba. Nyuma arinjira, abanza kujya koga nuko araza yicara ku gitanda.

Yahise yubika umutwe mu maguru, akongera akawegura akareba imbere, gutyo gutyo. Byabonekaga ko byamuyobeye. Nkuko Monique yari yangiriye inama, nta jambo na rimwe navuze nakomeje kwisomera agatabo nari mfite mu ntoki. Hashize akanya aratobora aravuga

-Joanna, mbabarira sinigeze nifuza ko ibi bigenda gutya

Ndaceceka

-Joanna ko utavuga uri kunyumva?

-Yego

– Urabona ibyo nkora biri gutera imbere, rero nkeneye umwana uzabisigaramo maze kwigendera. Jyewe nifuzaga kubyarana na we gusa ariko amaze gutwita yahise ambwira ko tugomba kubana nabyanga akayikuramo. Yabibwiye rero mama nuko ahita abyivangamo bigenda gutya. Jyewe icyo nashakaga ni umwana, sinigeze nifuza kuguharika no kukubabaza.

Numvise nahita ntomboka ariko ndifata. Yahoraga ambwira ko nta wundi mugore yashaka kuva na kera. Ukuntu rero yahinduye ibitekerezo atanambwiye nibyo ntari kwiyumvisha. Abagore badakomeye imitima yanahita arwara umutima akimara kubyumva, gusa nyine jye ndatuje

Arakomeza

-Joanna, umbabarire. Natinyaga ko wansiga. Gusa uko byagenda kose, guhera ejo ndamushakira aho azaba, kuko nta na rimwe yafata umwanya wanjye. Ese wambabarira?

 

Nakomeje guceceka

-Joanna gira icyo uvuga ndakwinginze

-Ntacyo mfite cyo kuvuga Didi, nasobanukiwe rwose

-Gute koko ntacyo ufite kuvuga? Mbwira ibiri ku mutima wawe kuko ndabibona ko biriho

-Didi ndananiwe nkeneye gusinzira. Tuzabivuga ejo niba ubishaka. Reka nzimye itara dusinzire ahubwo

 

Iryo joro yabuze ibitotsi gusa nanjye ni uko. Yaraye ahindukira, akagarama, akubika inda, akimyoza akitsa imitima. Nibyo koko kuba nacecetse byamukozeho. Monique ni umuhanga yangiriye inama nziza. Gusa najye naraye nibaza amaherezo y’uru rugamba. Biranyobera.

Mu gitondo nkuko Monique yari yangiriye inama nahise mbyuka njya gutegura ibya mu gitondo ariko ndangije mbijyanye ku meza nsanga hari ibyamaze gutegurwa kare. Mpita mbza wa mukozi.

-Ese ni wowe wateguriye umugabo wanjye ibya mu gitondo?

-Oya ni tantine Bella

Nta nubwo nari narigeze menya uko yitwa. Ubwo ashaka kujya aba ari we utegura ameza, ntacyo nanjye biranduhuye. Gusa kuko nari namaze kubitegura nanjye nabishyize ku meza ubwo guhera ejo nzajya niryamira. Nasubiye mu cyumba ngo nitegure koga. Ngarutse mvuye koga nsanga Didi yicaye ku gitanda

-Joanna nshaka tuganire noneho byimbitse

Akivuga atyo bahita bakomanga ku rugi

-Ni nde?

-Ni jyewe Afi

-Ushaka iki?

-Hari abashyitsi hano hamwe na mama barabashaka

 

Nahise nitegura ndambara naho Didi nawe ajya koga bwangu

Twahise tujya muri salon dusanga ni wa sewabo na nyina na nyirasenge. Agaco k’indyarya gusa. Nahise nibaza ikibazinduye izo saha ariko niyumvisha ko nta kindi kibagenza uretse ibimaze iminsi biba. Narabashuhuje nuko nsa n’usubira mu cyumba riko nguma muri corridor ngo numve ibyo bavuga

Sewabo yahise afata ijambo

-Didi tuzinduwe nuko twumvise ko udashaka ko umugore wawe wa kabiri aguma muri iyi nzu. Kandi urabizi aratwite sinumva impamvu ushaka ko ajya kuba mu nkodeshanyo wenyine. Ese agize ikibazo nijoro ni nde yakitabaza ubwo? Ese umwana atwite we ntagukeneye?

Didi yahise asubiza:

-Muzehe rero sinshobora kubana n’abagore babiri mu nzu. Ibyo byaba ari ukurema intambara ihoraho ntazabsha guhosha kandi bikanyongerera ibibazo. Sinshaka rero intambara ndashaka amahoro

-Ubaye ushaka amahoro ntuba warateye inda undi mugore. Rero niba ahri ukwiye kuva muri iyi nzu ubwo Joanna ni we ugenda kuko nta mpamvu afite ihamugumisha ariko Bella we aratwite. Nibananirwa kumvikana ujye ubakosora ubahane. Si wowe mugabo mu rugo?

 

Nahise ngwa mu kantu. Uyu musaza ubundi yavuye ku wuhe mubumbe? Umuntu ubwira umuhungu we ngo azajye adukubita we? Noneho azibeshye ankoze n’urushyi rumwe niho azamenya ko nanjye mfite musaza wanjye!

Umusaza yarakomeje aravuga:

-Didi ubu hano ndi mu mwanya wa so wapfuye. Nk’uhagarariye umuryango nkubujije kudukoza isoni imbere y’umuryango wa Bella umujyana mu nkodeshanyo. Nuramuka kandi ubirenzeho ikizakurikiraho uzabage wifashe. Ndarangije rero ngaho hamagara abagore bawe baze hano.

 

Avuze atyo nahise nihuta njya mu cyumba nuko mu kanya gato numva umukozi arampamagaye ngo nitabe

-Naje papa mukuru

-Joanna na Bella. Nkeneye amahoro muri uru rugo. Amategeko asobanuke kandi mujye mujya ibihe byo gutekera umugabo wanyu. Sinshaka impaka n’intonganya muri uru rugo. Muranyumva?

 

Nasekeye mu mutima. Ubu se koko uyu musaza arumva ari nde wo gufata imyanzuro mu rugo rutari urwe? Si na databukwe nyawe, ni sewabo wa Didi. Ubundi se azi ate niba tuzagumya kuba muri uru rugo? Wenda mukeba wanjye azagenda cyangwa ngende. Gusa ikimbabaza cyane si uguharikwa. Ni uburenganzira bwe gushaka uzamubyarira akana, kandi imyaka itanu naho yarihanganye. Ko hari n’ubyara hanze se kandi nawe ubyara? Ikimbabaza cyane ni ukuntu najyaga namwisabira kubyara umwana akazamuzana nkamurera akirenga akarahira ngo ntiyamparika, none uretse gutera inda ageretseho no kumuzana ngo tubane mu nzu. None ari kwiregura ngo yaje atabizi ngo yashakaga akana gusa. Kuki se atambwiye ko kwihangana byanze ngo mbyitegure ko n’ubundi najyaga mbimubwira?

 

Maze kumva inama za databukwe nahise nsubira mu cyumba. Nahise mfata umwanzuro wo gushaka akazi kuko hari hamaze kuboneka uzajya yita ku mugabo kandi nanjye sinashakaga guhora ndebana na mukeba wanjye mu maso

Ngeze mu cyumba mbona Didi araje arambwira ati:

 

 

Agace gakurikira ntikazagucike

 

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s