Inkuru ndende

Igihe cyanjye kizagera: Agace ka 9

Yarakomeje araruka nuko mabukwe numva aramubwiye:

-Ihangane mwana wanjye niko inda imera cyane cyane iyo ikiri mu mezi atatu ya mbere. Hari byinshi bigiye guhinduka mu buzima bwawe, ariko humura ndahari uzajya umbaza ibikuyobeye.

 

Nahise numva ijuru rinyituyeho noneho. Burya bwose ntabwo yapfuye kuza gusa, ahubwo yaje abizi ko anatwite. Nagiye mu cyumba cyanjye ndarira ndanaboroga ku buryo ahari na bo banyumivise. Murumuna wanjye Lyne ni we winjiye mu cyumba ahita ambaza:

-Joanna, kuki uri kurira cyane? Uzi ko n’amaso yatukuye.

-Lyne, nashatse umugabo w’umugome. Yashatse undi mugore kuko ntabyara jyewe. Nyamara twabiganiriyeho kenshi mbere ariko akambwira ko nta kibazo tuzategereza igihe Imana izabishakira. Ariko uburyo yahinduye ibitekerezo ntanamenyeshe, akanca inyuma agatera inda kugeza azanye uwo yayiteye, sindi kubyumva. Ubuhemu bwe yaranigendeye ngo byose bizabe adahari. Ese urabona afite iyihe gahunda wowe?

-Narabikubwiye uyu mugabo ntakubaha rwose nta gaciro ufite imbere ye. Ari jyewe nahita mva hano nkigendera

-Lyne reka nshake uko nsinzira ndumva ntameze neza.

-Sawa shaka ibitotsi, nanjye ndaguma hano

 

Nafashe amata nshyiramo ubuki kuko byamfashaga kubona ibitotsi vuba. Nakangutse bwamaze kwira, Lyne anzanira ibyokurya ariko nanirwa kubimira.

Byose numvaga nabashije kubyakira ariko kuba mukeba atwite noneho byo sindi kubyakira peee. Lyne ntako atagize ngo ampoze ariko ntacyo byatanze. Gusa aranzi ko nkunda inkuru yahise ahindura ikiganiro nuko antera urwenya nanjye sinzi uko nisanze amarira yahindutse ibitwenge

– Ubwo usetse ni byiza. Uri buze kugenda umererwa neza burya igitwenge na cyo ni umuti.

-Koko se?

-Nibyo kuko mama atarapfa umuganga wamuvuraga niwe wabimbwiye. Bishoboke ko igitwenge gisukura inzira z’ubuhumekero zo hejuru, nkuko gukorora nabyo bituma hafunguka kandi guseka bituma imyanda yari mu bihaha ibasha gusohoka. Burya ngo igitwenge gifasha abarwara asima kugabanya igihe cya crise

 

Ibyo nabyo byatumye nseka kuko yabivugaga asobanura nk’umuhanga wabyigiye akabona impamyabumenyi y’ikirenga.

-Ese ubwo koko nturi kumbeshya?

-Oya nukuri pee. Uwo muganga yanongeyeho yuko igitwenge gifasha igifu gukora neza ndetse bifasha igogorwa. Ni kimwe mu birwanya ububabare kurenza ndetse ibinini

 

Aha naho hatumye nseka kumva ko guseka biruta paracetamol najyaga nywa iyo numvaga ndibwa. Gusa disi Lyne ni akana keza yatumye ntuza

-None se ko kuvuga ari ugutaruka, Jonna wari wagiye he mu gitondo?

 

Namubwiye ko numvaga ntashaka kuguma mu rugo hamwe na mabukwe na mukeba ngahitamo gutembera ari naho namenyaniye na Monique ubwo najyaga kwa Anita. Mubwira muri macye uko ikiganiro cyagenze

– Ariko Joanna mfite agatekerezo

-Akahe se Lyne?

-Ukeneye umuntu mukuru wo kuguha inama kuko mama wakaziguhaye ntahari. Niba uwo Monique wabonye ari umubyeyi mwiza, wamwisunga ahari yakuyobora ukamenya icyo gukora. Nubwo ariho mukimenyana ariko wasanga ari Imana yabikoze ngo mumenyane. Usenge mbere yo kumubwira ataza kukumvira ubusa

 

Avuze gutyo nahise nibuka isengesho nari nasengeye mu rusengero nsaba Imana kumbwira icyo gukora ibinyujije mu nzira ishaka. Nibuka ko nayisabye ko yakoresha ibiremwa byayo ikambwira. Kuba uwo mugore twahuye bitunguranye, na Lyne akaba ansabye kuba ari we mbwira, ese iki si igisubizo cy’Imana?

Nahise ntekereza gato nuko mfata terefoni yanjye ndahamagara.

– Allô

– Mwiriwe mama Monique. Ni Joanna

– Mwiriwe mwana wanjye Joanna. Nongeye kugushimira uko mu gitondo wamfashije

– Nta kibazo mama. Ese wanyemerera ejo mu gitondo nkaza tukaganira?

-Nta kibazo mwana wanjye. Iwanjye uhafate nko kwa mama wawe jya uza wisanga

-Urakoze cyane ni ah’ejo

 

Natinye guhita mubwira ko nshaka inama ku bibazo mfite kandi ariho nkimumenya. Ahubwo mbihariye ejo, uko azanyakira niho nzabona aho mpera mubwira byose.

 

Nakomeje gutera urwenya na Lyne kugeza ubwo antanze gusinzira. Gusa kuba mfite Lyne biranyura byibuze atuma nseka. Kugirango ibitekerezo bibi bitagaruka nahisemo kubanza gusenga kugirango niragize Imana. Nanasengeye gahunda yanjye na Monique. Burya gahunda z’Imana ziratangaje koko. Nari natekereje Hilda, ngiye kumureba ambwira ko adahari, naho Imana yo yari ifite umugabmbi wayo. Namaze gusenga njya koga ndaryama.

 
Bucyeye narabyutse ndasenga, njya koga mfata ibya mu gitondo nuko nitegura kugenda. Kuko wa mukozi agihari, akazi ko mu rugo ntikandeba n’isuku ni we uyikora. Nsohotse nasanze mabukwe na mukeba bicaye ku rubaraza bari kuganira

Nabashuhuje na mwiriwe muri rusange, nuko nkomeza urugendo ariko mabukwe ahita ampagarika.

-Joanna garuka hano

Nuko ndahagarara  ariko sinasubira inyuma

-Ese ko usigaye ubyuka ugenda noneho wabonye akazi?

 

Nashatse kumureba nk’uko ajya abigenza ariko nibuka ko ari mabukwe kandi ntagoba kuba nka we. Gusa nanone numva nta jambo ryo kumubwira mfite, nshingura ibirenge ndigendera ntacyo mvuze.

-Erega niba ari ishyari ryo guharikwa ufite, ndi wowe natumuka nkava hano. Nta waguhatiye kuguma hano

 

Nabwo naracecetse. Nuko abura icyo arenzaho. Nahise mbona ko ashaka kunyiyenzaho ngo azabone ibyo anshinja banyirukane. Gusa yiyibagije ko kugenda cyangwa kuhaguma ari umwanzuro wanjye bwite. Nahise nisohokera.

Mu minota micye nka 15 nahise ngera kwa Monique

-Mwaramutse Mama

-Nkunze ukuntu wubaha ukanyita mama. Urangana rwose n’abana banjye. Ese ufite imyaka ingahe?

-Mfite 28

-Ntiwumva umwana wanjye wa kabiri akurusha umwaka umwe. Icara umbwire rero. Ufite ikihe kibazo Joanna?

Nahise ngwa mu kantu. Uyu se ko ntaramubwira ikingenza ni umuhanuzi cyangwa na we ni umupfumu?

-Ikihe kibazo mama?

-Nacyetse ko washatse kunganiriza kuko ufite ikibazo

-Yego ni byo ariko se wabimenye ute?

-Joanna, ndakuze urabibona. Twahuye ejo mu gitondo ari ubwa mbere, nijoro uhita umbwira ko ushaka kunsura. Kimwe ni uko waba udafite akazi ukaba ushaka uwo muba mwiganirira, ikindi ni uko waba ufite ikibazo ukeneye inama. Nkurikije uko twaganiriye ejo, nturi umuntu ushishikazwa no kuvuga bityo ubwo sicyo kikugenza ahubwo ufite ikibazo ubwo.

Uyu mubyeyi azi kugenzura rwose ndamwemeye. Ahise anyorohereza kubona aho mpera, Imana iranshubije

-Nibyo koko mfite ikibazo kandi numvaga ntashaka kukibwira ubonetse wese

-Mama wawe se ari hehe?

-Yarapfuye hashize amezi

-Yooo. Imana imuhe iruhuko ridashira. Ngaho mbwira nkaho wabwira mama wawe.

Namubwiye byose guhera nkibana na Didi kugeza ku byabaye iki gitondo na mabukwe. Mubwira sinabashaga kwibuza kurira. Ndangije kumubwira yahamagaye umukozi anzanira amazi akonje. Nuko ahita amfata akaboko turahaguruka anjyana mu cyumba kimwe ansaba kuba ndimo nkarira uko nshobora kose akabona kugira icyo ambwira. Yambwiye ko ntararuhuka nshobora kutabasha kwakira inama agiye kumpa.

Numvise inama ye. Koko ari mu kuri. Nyuma yo kurira numvise nsa n’uruhutse. Nyuma y’amasha nk’atatu yaraje afata agatebe anyicara imbere.

-Ndacyeka ko waje kundeba kuko wayobewe icyo gukora. Nanjye ubu sinakubwira ngo kora iki cyangwa kiriya. Niba ugomba kwahukana ukagenda cyangwa se ukagumana n’umugabo wawe, ubu sinzi icyo nakubwira gukora gusa Imana yo ifite igisubizo. Wambwiye ko utazi neza niba ibyo umuryango washatsemo ukubwira ari byo. Gusa nawe wiba umupfayongo. Ntabwo umuryango waterana ngo ukubwire ibintu bitari byo ndetse banazane umuntu koko batamusabye ngo bamukwe.

Nyokobukwe ashobora kukubwira ibinyoma ngo ugende cyangwa agukange ariko ba sobukwe ntibyabaho. Rwose byakire umugabo wawe yashatse undi mugore. Ahubwo icyo dukwiye kwibaza ni iki: kuki atabikubwiye mbere, nanone kuki uwo mugore amuzanye ngo mubane mu nzu imwe?

Uko byamera kose afite ibisubizo azaguha kandi afite impamvu zaba nziza cyangwa mbi. Inama nguhye ya mbere komeza guceceka no gutuza. Birakomeye ariko nubishobora uzaba uciye intege mukeba wawe na nyokobukwe. Umugabo wawe nagaruka ntuzigere umubaza ikintu na kimwe. Ni we gusa ugomba kuzishakira uko abikubwira kandi nakubwira ntuzabaze byinshi wowe gusa uzamubwire uti “sawa”.

Ntuzagire ikindi urenzaho. Mukeba wawe nagusuhuza, uzamwikirize. Nashaka uko mwasa n’abasabana, uzabyirinde mu buryo bwose bushoboka ariko utavuze. Nagushotora uzamwihorere. None se Joanna, umuntu w’injiji umusubirisha iki?

-Uramwihorera

-Byiza cyane. Mu guceceka kwawe, usabwa kongera ubusabane bwawe n’Imana niyo ifite igisubizo cya byose. Ni bwo ntawe uzakunyuzamo ijisho ngo amenye ibyawe. Ngusezeranyije ko ibyo nubishobora bizakubashisha kumenya icyo gukora nyacyo

-Ariko mama ninceceka Didi we azashaka kumvugisiha kandi sinzabasha kubyihanganira. Nzakore iki?

-Uzamusabe igihe kugirango ubashe kubanza kumenyera ubuzima bushya urimo.uri mukuru uzabibasha

-Mama urakoze cyane ku nama zawe

-Nta kibazo mwana wanjye. Igihe cyose uzakenera inama zanjye uzajye umbaza niba mpari uze tuyage. Uko iminsi ihita niko ibitekerezo bizagenda biza

 

Naramusezeye nyuma yo kuganira ibindi bisanzwe nuko nsubira mu rugo. Nabwiye Lyne uko byagenze nuko dushima inama ze. Koko wa mugani ndamutse nahukanye aka kanya nta bwenge bwaba burimo. Imana niyo izaduha icyo gukora uko iminsi ihita.

Mu gihe ntegereje didi nakomeje kugendera kure mabukwe na mukeba. Nakomeje gusenga no kwinginga Imana ngo impe imbaraga zo kubyakira. Iminsi Didi azaziraho igeze yarampamagaye ansaba kuza kumureba ku kibuga cy’indege. Nemeye ntashidikanyije nkaho nta cyabaye

Najyanye na Lyne ku kibuga kugirango Didi ataza kuva aho azana ibya mukeba turi mu modoka. Nari ndi kwiganirira na Lyne kugeza ubwo numvise umuntu ankoze ku rutugu. Yari Didi yanavuye mu ndege ntabibona.

-Wiriwe cherie, wiriwe Lyne

-Uraho Didi. Ni karibu

-Uhm. Kuki umvuze mu izina?

Ubu se yashakaga mwite gute ra? Nkomeze mwite cherie, rukundo rwanjye, bebe, n’ibindi? Hari kera.

-Tugende Didi

Kuko turi kumwe na Lyne twaganiriye ibisanzwe. Tugeze mu rugo ndaparika nuko ahita ambaza:

-Ko hano hadakinze n’amatara akaba yaka se?

Ubu se tuvuge ko nta cyo abiziho ra? Kamere yarazamutse nshaka kumubwira nabi ariko nibuka inama ya Monique ndaceceka

-Ni mama wawe uhari

-Ko bwije se arakora iki hano?

-Umwibarize nugera mu nzu

Twinjiye muri salon nuko ahita abona mabukwe na mukeba wanjye ahita atungurwa nuko ahita abwirana nyina umujinya mwinshi ati:

 

Ntuzacikwe inkuru ikurikira

2 comments

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s