Inkuru ndende

Igihe cyanjye kizagera: Agace ka 8

Yinjiye asakuza cyane ababaye ati:

-Joanna!!!!!

Nahise mbyuka nshigutse

-Lyne bigenze bite?

-Joanna ni njye nakakubajije icyo kibazo none ni wowe ukimbaza koko? Umugabo wawe ashatse undi mugore. Ari musaza wacu na njye nta kintu tubiziho none waniyemeje kubana na we mu nzu koko? Joanna uri muzima ubwo koko cyangwa wararwaye ntitwabimenya?

 

Nariruhukije nitsa umutima mbanza gutuza

-Ese nari kubamenyesha gute gahunda na njye ntari nzi koko?

-Ngo iki?

-Uko niko kuri. Nta kintu nari mbiziho, nanjye babintuye hejuru.

 

Nahise mutekerereza inkuru yose uko byatangiye, kuko nabonaga nta mpamvu yo kumuhisha. Byahise bimurenga na we

– Didi nzi ni we wagukora ibi koko? Icyakora mbashije kumirwa koko umuntu ni mugari pe. Ntiyanafashe akanya byibuze ngo aguteguze ibyo agiye kugukorera ahitamo kwigira mu mahanga ngo ubage wifashe koko? Nukuri ntiwongere kurenganya nyokobukwe kuko iyo Didi akubaha akaguhesha agaciro na nyokobukwe ntiyari kubirengaho. Kuko ntabwo ari we umufatira umwanzuro wo gushaka undi mugore rwose aho ntazakubeshye. Nako reka mpamagare Marc mubwire ishyano tugushije

-Oya Lyne mbabarira iki si cyo gihe cyo kubimubwira. Reka Didi abanze agaruke mvugane na we. Wibuke ko mama akiriho yahoraga adusaba kudacira abantu imanza tutaramenya icyabateye gukora ikintu runaka. Byihorere bibe bigumye hagati yacu, aho Didi azazira nzavugana nawe, niho nzamenyesha musaza wacu uko byifashe

-Sawa Joanna. Ariko Didi akiza uzahite umenyesha Marc uko bimeze.

-Ngaho basi mbwira ibyabereye hano igihe ntari mpari

-Nari ndi muri cya cyumba cyanjye nziko nawe uri kuruhuka. Nuko numva nyokobukwe na muramukazi wawe baha ikaze abashyitsi. Nuko numva ni abantu benshi nanjye ngira amatsiko nza muri salon mpita nkubitana na nyokobukwe arambwira nze nguhamagare kuko yumvaga ko nzi aho wagiye. Namubwiye ko ntazi aho uherereye ariko mbona ntabyemeye neza. Nahisemo kuguhamagara kuri terefoni nayo ntiyacamo. Nuko nkomeza kwitegereza abashyitsi baje mbonamo umukobwa mwiza muto, maze mbona bamweretse icyumba cye, batangira kumusabira imigisha nibwo namenye ibijya mbere. Gusa nahise ntungurwa

– ok, reka ntegereze Didi naza azansobanurira byose

-None se ntujya no kureba uko mukeba wawe ameze?

-Nubundi se ko nzajya mbonana na we buri munsi nzaba mureba

-None se ugiye gukora iki Joanna hagati aho?

-Sha ntakubeshye kugeza ubu sinzi icyo gukora pee

– Ndumva nagusaba ukava hano ukigendera. Uracyari muto ntabwo wabura uko ubaho n’aho uba

-Lyse, uko byamera kose sinafata umwanzuro mpubutse. Hari igihe iyo ufashe umwanzuro uhubutse nyuma yaho wicuza.

Lyse twararanye iryo joro abyuka azindutse kuko hari aho yagombaga kujya gukora ikizami cy’akazi. Nanjye nakomeje kwibera mu cyumba kugeza bucyeye neza. Nyuma yo gusenga no kwiyuhagira nagannye mu gikoni. Nasanzeyo mabukwe ndamusuhuza ntiyanyikiriza. Biramureba. Jye icyo nakoze namushuhuje nta kindi. Mugani wa Lyne, mabukwe si we ngomba kwitaho cyane kuko si we wanshatse. Kandi nta n’umubyeyi wagategetse umwana we icyo agomba gukora mu rugo rwe. Wenda yamuha inama nk’umuntu mukuru ariko si we wafata umwanzuro. Ubu koko yabwira umwana we ngo genda uryamane n’uriya muntu? Ariko nanone simurenganye byose mugani wa Lyne, iyo Didi atabyemera ntibyari kuba

Nakoze umureti nywurisha umugati ndenzaho ikawa. Ubwo umukozi nawe yari ari gutegura ibya mu gitondo. Gusa mukeba wanjye sinamubonye

 

Narariye maze kurya numva ngomba kujya gusura Hilda. Namwoherereje ubutumwa mubaza niba ari yo nuko ataranansubiza njya mu cyumba guhindura imyenda nari nambaye.

Nkigera muri corridor niho nahise nkubitana na mukeba. Yambwiye mwaramutse gusa nk’aho atari ubwa mbere tubonanye, ahita yikomereza urugendo. Namwitegereje agenda ariko ateye neza pe. Ni munini, ateye nk’ivubi (hejuru no hasi hatubutse, mu nda hato cyane). aranahumura neza cyane, dore ko anafite igikara cyiza n’imisatsi myiza itendera ku bitugu. Yego ni mukeba wanjye ariko ni mwiza.

Nabanje kwinjira mu cyumba nicara ku buriri ndatekereza. Noneho gihamya ko mparitswe ndayiboneye sinongera kubishidikanyaho. Ariko Didi ni umutindi ku buryo atanashatse kubimbwiraho na gacye. Ariko ni hahandi azabimbwira naza.

 

Maze guhindura nahise mfata imodoka ngo njye kwa Hilda ariko ntarasohoka mu gipangu nibwo nabonye anshubije ko adahari ari bube ahari ku mugoroba.

Numvaga nshaka gusohoka nuko mpindura gahunda niyemeza kujya gusura umuturanyi Anita ngo tube twiganirira bisanzwe wenda ndebe ko ibitekerezo mazemo igihe byanshiramo.

Kuko atari kure nahise nsiga imodoka ngenda n’amaguru. Mu nzira nahuye n’umugore wikoreye umutwaro uremereye cyane ubona ko ari kuvunika rwose.

– Zana nkwakire mama

-Urakoze mwana wa, nari ndushye byo

-Niba ujya kure reka nsubire mu rugo nzane imodoka ngutware dore ndumva uyu mutwaro utoroshye

-Oya si kure cyane ni imbere hano

Naramutwaje tugera iwe. Nawe ni umuturanyi nuko ntari muzi. Gusa natunguwe n’uko yari yikoreye ibintu biremereye kandi uko mbona urugo rwe, ntabwo ari umukene pee

-Ariko mama, kuki wikoreye ibintu biremereye aka kageni utuye ku muhanda iyo uba wafashe tagisi cyangwa moto?

-Humura mwana wa. Buriya nari ndi muri siporo. Bambwiye ko gukora urugendo n’amaguru wikoreye ibintu biremereye ari byiza ku buzima. Ubu uyu mutwaro nawuturukanye hano ariko mu kugaruka numvaga naniwe cyane. Uhagereye igihe nari ngiye guhamagara umushoferi akaza kuntwara da. Bishyire aho ngaho uruhuke nawe. Ese ubundi witwa nde mwana wa?

-Nitwa Joanna

-Uri umwana mwiza kandi wararezwe. Niba ntacyo uri gukora reka tube twiganirira.

 

Numvise nshubijwe kuko nashakaga nanjye ahantu nicara nkaganira nkibagirwa ibyahise.

 

Yitwa Monique, ni umupfakazi ariko ni umukire. Afite abana bane kandi bose baba hanze, akunze kujya kubasurayo. Ni we ucunga imitungo n’ibikorwa by’umugabo we witabye Imana mu myaka itatu ishize azize impanuka y’imodoka. Ari hafi kuzuza imyaka 70 kandi azakora umunsi mukuru wo kuyizihiza. Ni umubyeyi uzi kuganira no gutera urwenya ku buryo yanshekeje nkibagirwa ko baraye bamparitse mukeba. Gusa mu biganiro bye byose nabonye ko ari umubyeyi w’umuhanga cyane kandi uko yanyibwiraga numvaga ari umubyeyi rwose pe. Ngiye gutaha yansabye kumusigira nimero ya terefoni ngo ajye ampamagara ngende twiganirire mu gihe mfite akanya.

Mvuye kwa Monique numvise atari ngombwa kujya kwa Anita kandi nkiri kwa Monique na Lyse yari yampamagaye ambwira ko ari mu rugo yambuze.

Nahise nitahira, ngera mu rugo nyuma y’iminota nka 15 mpita ninjira mu cyumba cyanjye ngo ntavaho nanakubitana na mukeba na mabukwe dore ko nawe yari yaciye ingando aho ari we wabaye umutinyisha.

Ariko ntarinjira mu cyumba numva mabukwe mu bwiherero abwira mukeba ngo ihangane mwana wanje, akibivuga numva mukeba wanjye ari kuruka.

Ese yaba ari kurukishwa n’iki? yYageze hano se ahita atwita cyangwa…

 

Ntuzacikwe n’inkuru izakurikira

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s