Inkuru ndende

Igihe cyanjye kizagera: Agace ka 7

Terefoni yakomeje gusona nuko ngeze aho mfunga umwuka ndayitaba.

-Allo

-Allo Joanna umeze neza?

Nahise numva ari ijwi rya Didi numva ikintu kimfashe mu muhogo kimbuza kuvuga ariko ndihangana ndamusubiza

 

-Yego meze neza. Wowe se bite?

-Nanjye ndabona ndi aho buhoro. Kubona simukadi hano biragoye niyo mpamvu ntahise nguhamagara.

-Nta kibazo

-Nizere ko mu rugo ari amahoro

 

Yambajije uko, mpita nzenga amarira mu maso. Ni gute ambaza ibi kandi ubu mukeba wanjye ari mu nzira aza? Gusa nabwo narengejeho ndamusubiza

 

-Yego ni amahoro

– Unkeneye byihutirwa wajya umpamagara kuri iyi nimero. Uri mu rugo se?

-Oya

-Uri hehe?

-Ndi hanze ndi gufata akayaga

– Ese ko uri kunsubiza numva utishimye ni amahoro?

– Ni ibyo uri kumva ariko siko biri meze neza.

-Sawa noneho. Nzaza nyuma y’iminsi ine. Uramuke neza.

-Yego ni ah’ubutaha

 

Tumaze kuvugana nahise nzimya terefoni ngo hatagira n’undi uza kumpamagara kuko numvaga nishakira gutuza.

 

Ntiyigeze anakomoza ku byerekeye ubukwe bwa mukeba wanjye. Ubundi se kuki ampamagaye izi saha kandi ari bwo mukeba wanjye ari kuza? Yashakaga kumva ko napfuye se cyangwa ko ndi muri koma mu bitaro? Cyangwa yashakaga kumva ko nishimiye guharikwa? Kugeza ubu rwose sindasobanukirwa ibiri kubera muri uru rugo.

Gusa iyo biba bitari ukuri ntibyari guhagurutsa databukwe ngo aze kubinyibwirira.

Banambwiye ko basabye bagakwa. Ndumva nakabibwiye mushuti wanjye Hilda ariko reka mbanze ntegereze menye koko ko ari ukuri kuko hari aho ngera ngacyeka ko ari ibyo narose. Ni byiza kugisha inama mu gihe ufite inkuru nyayo ifatika, atari ibyo wabwiwe cyangwa utekereza gusa. Iyo uvuze ibintu bitaraba ntibizabe ufatwa nk’injajwa cyangwa umubeshyi ku buryo n’ubutaha nta wizera ukuri kwawe.

Niyo mpamvu mu bintu byose dusabwa gushishoza no kwitwara neza kugirango hatagira uzatunyuzamo ijisho. Nanjye reka ntegereze amasaha asigaye ngo ukuri kujye ahagaragara.

Nagumye gutembera mu busitani niyumvira akayaga nuko niyemeza kujya mu kiliziya cyari hafi aho ngo byibuze nsenge. Iyo ibibazo byaturenze, abantu bose batugiye kure, Imana gusa niyo yo kwereka ibituremerera ikadusubiza kandi niyo yatinda, iba iri kudutegurira ibyiza kurutaho.

Nageze mu kiliziya ndapfukama mbanza gusaba imbabazi z’ibyaha byanjye mpereye ku by’uko nagiye kuraguza (niba wowe wumva atari icyaha, ntubifate nabi kuko jyewe mu myizerere yanjye numva kuraguza ari icyaha) nuko maze gusaba imbabazi mbwira Imana nti:

 

” Mana Nyagasani ni wowe wandemye. Urabizi neza ko kuri iyi si ari mama wanjye wanyoboraga akanangira inama. Nyamara waramukunze kundusha uramuhamagara ubu ntakiri kumwe na njye. Rero ubu byanyobeye. Ndabizi ndi umunyabyaha ntabwo byakumanura ngo unyibwirire imbonankubone ariko byibuze gira icyo umbwira unyuze mu byo waremye. Nshaka kumenya icyo nakora. Ni wowe wampaye Didi kandi ni wowe watumye tutabyara. Ndabizi impamvu urayizi nubwo utarayimbwira. Ubu ndagukeneye kurenza ibindi bihe byose. Haba mu nzozi, cyangwa igitekerezo cyanzamo gishya, cyangwa umuntu wantumaho, nshaka igisubizo kikuvuyeho Mana yanjye. Wadusabye kukwiyambaza mu bihe bikomeye kandi uvuga ko usabye umuha n’ukwiyambaje umusubiza. Kuko uri Imana utari umuntu, nizeye isezerano ryawe kandi ndategereje”

 

Nyuma yo gusenga numvise nkeye ku mutima. Isengesho rigira imbaraga utamenya. Rivura intekerezo n’umubiri kandi rituma twumva umutima utuje. Nibyo koko gusenga birwanya stress, bigabanya umuvuduko ukabije w’amaraso, byongerera ingufu ubudahangarwa bw’umubiri, birwanya intekerezo mbi, bifasha ubwonko gukora neza, bigabanya uburibwe, byongera ibyishimo, birinda agahinda gasaze ndetse ni imwe mu nzira zo kurwanya kwiyahura kuko bituma umenya agaciro ka roho n’ubugingo.

 

(Warabashije gusoma igitabo cyitwa “How God changes your brain” ni ukuvuga ngo uko Imana ihindura ubwonko bwawe cya Dr. Andrew Newberg ibi wabyumva cyane.)

Isengesho rwose riraruhura kandi niba gusenga biri muri gahunda zawe za buri munsi, ibi wabitangira ubuhamya. Gusenga bigira ingaruka nziza ku buzima bw’usenga mu buryo bw’umubiri na roho.

Narangije gusenga ndeba ku isaha. Hafi saa tatu z’ijoro ziri hafi kugera. Ndacyeka uko byamera kose izi saha ubu umugore mushya wa Didi nako mukeba wanjye ubu yahageze

 

Ntangiye kwicuza ukuntu nakabije kumvira Didi bigatuma ndeka akazi kanjye kubera ifuha rye none dore ibyo anyituye. Nari nifitiye akazi keza rwose ariko kubera akabya gufuha ansaba kukareka kuko yacyekaga ko databuja antereta. Ibyago byanjye yakankuyeho nta minsi nkamazeho ngo byibuze mbe narizigamye n’udufaranga. Ariko kuko ntacyo nashakaga ngo nkibure numvaga ntacyo bimbwiye. Iri ni irindi kosa tujya dukora ngo kubera urukundo. Ndibuka ko mama ibyo yabyanze kenshi akansaba gusubira ku kazi ariko nkamunanira ngo sinshaka kubabaza umugabo. Yanyibutsaga ko iyo aba ataragize icyo akora tuba twarandagaye nyuma y’urupfu rwa papa no kwirukanwa n’umuryango yashatsemo. Yambwiraga ko nta kazi kaba gato gapfa kuba hari icyo kaguha niyo wacuruza inyanya. Ibi bituma mpora nibuka mama iteka kuko ni byinshi yambwiye nkabikerensa. Erega niyo umugabo yaba akorera amamiliyari hari igihe ubukene butungurana akagobokwa na ducye umugore yinjizaga

 

Ubu iyo mba naragumye ku kazi kanjye simba ndi kwibaza ngo bibaye ngombwa ko ngenda nabaho gute. Ariko ubu ndi hagati nk’ururimi ndi mu cyeragati. Ngiye sinabona ayo nishyura aho kuba ndetse n’ayo guhahisha ibintunga. Ariko reka ntuze byose maze kubyereka Imana, nizeye ko impa igisubizo

 

Navuye aho nari ndi nsubira mu rugo. Nkinjira numvise muri salon harimo abantu baganira bagera mu icumi nuko mpitamo kunyura mu gikari ngo hatanagira umbona cyangwa umbwira byinshi.

Nahise ninjira mu cyumba cyanjye bucece, nuko natsa terefoni nandikira Lyne nti “Niba watashye tuzavugana ejo. Niba ugihari ngwino ndi mu cyumba cyanje”

 

Hashize akanya nahise numva urugi rwanjye rukinguye nuko Lyne arinjira ambwira asakuza ababaye cyane ati: ….

 

 

Ntuzacikwe agace gakurikira

2 comments

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s