Inkuru ndende

Igihe cyanjye kizagera: Agace ka 6

Mabukwe yahise ankankamira arambwira ati:

– Wa nshinzi we ni jyewe uri kubwira utyo? Ndakubwira kujya guhaha ibyo kuzakira mukeba wawe ukansuzugura? Nako sinakurenganya ni kiriya kigoryi ngo ni Didi. Nari namubwiye kukwirukana arabyanga. Ubundi umugore utabyara agutunzemo iki? Ibiryo byawe simbishaka genda nawe ubirye.

 

Kugeza ubu ukuri kuragaragaye, hagiye kuza mukeba wanjye. Nahise mbona ko urugamba rukaze nuko njya mu gikoni ndarura ndarya kandi ndahaga ngo mbone imbaraga zo kureba ibiri bube uyu mugoroba.

Ariko se ni gute Didi bamuzanira undi mugore adahari we nyirubwite? Uko byamera kose ni mabukwe wapanze ibi bintu byose. Gusa ngomba gutuza ngategereza Didi akaza niwe nzasobanuza byose

Nakomeje kureba ibyaberaga mu rugo izo saha. Mabukwe, Chantal na Afi bari mu gufatanya bashyashyana bitegura mukeba wanjye. Nanjye sindi kubegera ahubwo ibiri kubera hano ndi kubikurikirana nk’ureba filimi.

Nuko numva umuntu akomanze ku gipangu, Afi ajya kumukingurira. Yooo!! Ni murumuna wanjye Lyne.

-Waramutse Joanna

-Bite Lyne? Kuki utabanje kumpamagara mbere yo kuza?

– Kuva ryari se mbanza kuguteguza mbere yo kuza? Ndabizi nta kazi ufite ikindi urabizi ko ngira imfunguzo za hano. Niyo nsanga udahari nakikingurira

 

Nibyo koko Lyne agira imfunguzo zo mu rugo kuko twahoze tubana mbere yuko asubira kwa Marc kurwaza mama. Yarangije kwiga ariko ntarabona akazi.

-Sha Lyne usanze nubundi nashakaga kujya guhaha ubwo reka ngutume ungireyo.

-Oya ndananiwe uzantume ejo nzajyayo

 

Mu kuri sinashakaga yuko amenya ibiri kubera hano. Kuko ni uguhita ahamagara Marc akabimubwira induru zikavuga.

Kandi rwose ubu sindashaka ko umuryango wanjye umenya ibyo ndi kunyuramo.

Hashize akanya gato Lyne ageze mu rugo, hahise hinjira batatu bo kwa mabukwe: nyirasenge wa Didi na ba se wabo babiri.

Nkuko ari umuco wacu nabahaye amazi yo kunywa mbere yuko mbaha ikindi cyo kunywa.

Nabyitwayemo kigabo nk’aho nta cyabaye. Nuko maze kubakira bansaba kwicara tukaganira. Mabukwe na we yahise aza, nuko nsaba Lyne kwiheza kuko bitamurebaga.

 

Nuko se wabo wa Didi mukuru (ubwo nawe ni databukwe) arambwira:

 

– Mwana wanjye nkuko ubibona cyangwa wabibwiwe, turi kwitegura kwakira mukeba wawe, azaba aje kugufasha mu byakunaniye muri uru rugo. Usabwa kumufata neza ukanamufasha. Uzamufate nka murumuna wawe, kandi ibyo atazi uzabimwigishe. Sinzi impamvu utanaje ubwo twajyaga kumusaba tukamukwa, kuko byose byarakozwe. Gusa usabwa kwakira ibi byose, byanakubabaza ukihangana kuko ntacyo wabihinduraho. Ese hari icyo ufite kurenzaho?

Iki kibazo yambajije ni cyiza cyane. Uyu databukwe ashaka kumenya niba ntacyo nongeraho. Bashyigikiye Didi, ashaka umugore wa kabiri batangishije inama nta n’icyo bambwiye none ngo ngire icyo ndenzaho?

Ikinshavuza ni uko kugeza ubu nari narishyizemo mabukwe ko ari we uri inyuma ya byose ndetse Didi nta kintu abiziho, naho byose byarapanzwe. Nkayoberwa ingendo za buri munsi, ngaho ngo ari mu kazi kenshi, naho yabaga yagiye kureba mukeba no gusaba no gukwa.

Nibeshyaga ko muzi ariko ubu mbonye ko umuntu ari mugari koko. Ese basi kuki atamushakiye indi nzu basi ngo babe kure yanjye? Kutabyara byiyongereyeho kubana na mukeba wanjye mu nzu imwe koko?

Ese ashaka mpite mfatwa n’umutima mpfe cyangwa ashaka ndakare mpite ngenda azaze asanga mukeba wanjye baryohane mu nzu twabanagamo?

Databukwe yankuye muri ibyo bitekerezo byari byantwaye.

-Joanna, turakumva tubwire

– Ndumva nta kintu mfite cyo kurenzaho

-Ni byiza noneho. Mukeba wawe ubwo aza kugera hano n’abamuherekeje, ubakire neza kandi wibuke wa muco wacu wo kubanza guha umushyitsi amazi. Kuva na kera wabaye umugore w’umutima, wubaha, ni nayo mpamvu twahisemo ko uguma hano aho kugirango Didi akwirukane.

 

Nasekeye mu mutima. Ese nibo bahitiramo Didi niba anyirukana cyangwa tugumana? Mbega umuryango mubi. Naracecetse nkomeza kumva inama kugeza barangije ibyabazanye bagataha.

Nahise nirukira mu cyumba niho hari harabaye urukuta rwanjye rw’amaganya nuko ndarira cyane. Ese ubu koko ndaharitswe birarangiye? Didi anabikora atambwiye kugeza ubwo ahitamo kujya hanze ngo bizabe byose adahari?

Numvise Lyne ampamagarira kure mubwira ko naniwe nshaka kuruhuka.

Gusa numvaga ntari bugume aho ngo mbashe kwakira mukeba wanjye pee.

Numvaga ibyiza yaza ntahari nkaza mpamusanga. Nabitekerejeho ndasohoka. Kuko Lyne yari mu rugo, numvaga ari buze kubikurikirana byose akambwira uko byagenze.

Nahise njya ahantu haba ubusitani rusange. Numvaga nshaka kuba ndi jyenyine akanya kugirango nitekerezeho neza. Ndumva ntiteguye kubana na mukeba wanjye mu nzu imwe. Umutima wanjye urashavuye kandi bikozwe na Didi nahaye urukundo rwanjye rwose. None amarangamutima yanjye yose abaye impfabusa arayasyonyoye ayagira ivu!

 

Ahisemo gushaka undi mugore kuko ntabashije kubyara. Nyamara ibi biba iwacu gusa, niho kutabyara bisenya ingo. Numva ahandi bitahaba ndetse hari n’abahitamo kutabyara bakibanira gusa cyangwa batabyara bagashake imfubyi barera bikrangira badashenye urwabo. Nta nyirabukwe wivanga mu rugo rw’umwana we ariko hano ho, ahaa. Nyokobukwe aravuga ukagirango ni we wagushatse neza neza.

Umuryango washatsemo wivanga mu byawe byose ndetse no ku mutungo n’uko ukoreshwa. Niyo mwaba mumaze imyaka 50 mubana ntibabura kwivanga mu byanyu.

Nongeye gutekereza amagambo ya databukwe. Yavugaga ashize amanga nk’aho ibyo didi ari ibintu rwose bizima. Anatinyuka kunshinja ko ntaje mu gusaba no gukwa bya mukeba nk’aho bantumiye nkanga. Gusa nubundi barakoze kumpisha nubundi sinari kujyayo.

Mbega umuryango w’indyarya. Nako bararegana ni Didi. Wagirango ni igiceri nicyo kigira impande ebyiri. Nawe anyereka urukundo nyamara ari indyarya kugeza naho angerekaho undi mugore.

Ubundi ni mu kihe gitabo handitse ko kubyara ari itegeko? Umwana ni umugisha uhabwa abashakanye ariko si ihame kubyara. Mba numva icyangombwa ari urukundo kuko ni ryo shingiro rya byose kandi aho ruri habaho kwihanganirana. Nyamara hano ho bimeze nk’aho utabyaye wirukanwa hakaza ubyara, ubwo umugabo agushaka kuko ashaka abana gusa, nta kindi?

 

Nkiri muri ibyo bitekerezo terefoni yanjye irasona. Nibutse ko ntari nayijimije, ndeba umpamagaye. Ndebye nsanga ni nimero yo mu mahanga kandi mbona imibare yerekana igihugu irerekana ko umpamagaye ari mu gihugu Didi yagiyemo. Ashobora kuba ari we umpamagaye. Ubu se ashaka kumbwira iki?

Ese mwitabe cyangwa mwihorere?

 

Ntuzacikwe n’inkuru itaha.

2 comments

  1. Reba ahanditse ibyiciro, ufungure aho ubona handitse inkuru ndende. Cyangwa urebe ahanditse \”shakisha\” wandikemo agace ka 1 gutyo gutyo.

    Like

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s