Inkuru ndende

Igihe cyanjye kizagera: Agace ka 5

Yaranyitegereje kuva hasi kugera hejuru arongera aturuka hejuru ageza hasi nuko arambwira ati:

– Umva Joanna, iyi ni inzu y’umwana wanjye kandi uko wayinjiyemo umenye ko n’undi yayinjiramo rero reka kumbaza ibyo bibazo bidafite cumi na kabiri.

Yabivuze ahita ansunika akubitaho urugi rw’icyumba nuko nsohoka mu nzu.

Najimije terefoni ngo hatagira unampamagara nuko ntangira kugendagenda mu busitani mu rugo niyumvira akayaga ariko mu mutwe ibibazo byari uruhuri.
Ese mfite mucyeba ? Nkurikije ibyo mabukwe ambwiye n’ukuntu bari gutunganya icyumba ntibiri ku busa.

None se Didi yaba yarahuriye he na we? Nubwo amategeko yemera gushyingirwa hagati y’umugabo n’umugore umwe ariko ubuharike buracyakorwa. Ariko se kugeza aho twabana mu nzu imwe koko?
Cyangwa ni uburyo bwo kunyirukana ahubwo nkaba ntarabisobanukirwa?
Icyo nzi ni uko Didi twumvikanye ko tuzasezerana mu rusengero tumaze kubyara, ariko yarankoye tunasezerana imbere y’amategeko bivuze ko ari jye mugore we wemewe.
Ese koko ubu ndaharitswe? Mfite mucyeba?
Oya ubanza atari byo kuko Didi ntiyamparika.
Ese bwo yabikora, ntiyanabimenyesha ? Ngo kuko ntabyara? Kuva twabana ndamwubaha ndanamukunda nawe arabizi.

Nubaha umuryango we kandi inshingano zanjye nk’umugore zose ngerageza kuzubahiriza.
Sindamugaburira impitagihe, isuku ni yose mu rugo, yewe no mu buriri ambwira ko bimeze neza. Ndamugandukira kandi nca bugufi imbere ye.
None koko imyaka itanu ishyize akadomo kuri ibi byose ngo kuko nta rubyaro?

Oya ubanza mabukwe ari kumbeshya ashaka kureba uko mbyitwaramo.
Ariko se nanone byaba ari ukuri? Nabigira nte? Mama ntahari ngo ampe inama. Kandi na Esta nubwo turi inshuti simba nshaka kumubwira byose. Nubwo benshi bavuga ko inshuti uyibwira byose jyewe nshyiraho umupaka rimwe na rimwe.

Mama atarapfa yambwiraga ko inshuti ubwira byose ari yayindi muhuje byinshi mu buzima. None simbyara nyamara Esta we yarabyaye. Ikindi ahora ambwira ko nkabya kubaha Didi none nkaba meze nk’umucakara we.
Ibi birahagije kuba ntakomeza kumubwira byose kuko no kujya mu bapfumu ntacyo byamariye. Anahora ambwira ngo njye nyuzamo mbwire nabi Didi cyane cyane igihe anyitwayeho nabi, dore ko nawe ari ko agira umugabo we. Gusa jye sinabibasha. Turi inshuti ariko hari imico tudahuje.
Niba koko hivanzemo ibyo guharikwa mfite indi nshuti nagisha inama.

Hilda nubwo tubonana gacye ariko nanone mubonamo ubuhanga n’ubupfura. Twamenyaniye ku rusengero tukajya tuganira kandi niwe muntu wundi najyaga ngisha inama na mama akiriho.
Anita nawe ni umuturanyi kandi ajya anansigira umwana iyo agiye guhaha ariko ntituri inshuti cyane ku buryo namubwira buri kimwe cyose.
Ntabwo nkunda kubwira benshi ibyanjye kuko bamvuze sinazamenya uwo byaturutseho ariko mbibwiye umwe mba nizeye ko nimbyumva hanze nawe ntazongera kumwizera.
Nahisemo guceceka ngatuza nkategereza umunsi Didi azazira nkamwibariza we nyirubwite.

Gusa nanone sindahamya koko ko naharitswe ni ibyo ndi kwitekerereza ariko ibimenyetso simusiga ndi kubibona.

Ariko se ko nshimye mabukwe, muramukazi Chantal we abijemo ate?
Niwe mfura iwabo abyaye kabiri ariko yatandukanye n’umugabo. Gusa kuva nagera muri uru rugo ntiyigeze ankunda ngo anyishimire. Nubwo atantutse cyangwa ngo ambwire nabi ariko ijisho rikwanze n’irigukunze ntuyayoberwa

Gusa disi murumuna we Rita na musaza we Arnaud ni inshuti zanjye pee. Turaganira tukisekera nta ribi ryabo.
Ariko se kuki nabo batambwiye ko Didi agiye kumparika?
Nshobora kuba narashatse mu muryango w’indyarya mpereye ku mugabo wanjye kuko nawe ari kumpinduka uko ntabikekaga.

Ikibabaje ni uko nta muryango ngira uretse musaza wanjye Marc na Lyne murumuna wanjye akanaba bucura iwacu.
Mama yavukaga wenyine iwabo kandi papa amaze gupfa umuryango waratwanze baratwirukana kuko mama atari yarasezeranye na papa.
Gusa nanone ntacyo nabwira Marc na Lyne kuko ndabazi ni abanyamujinya bamenye ko Didi yamparitse induru zavuga.

Ariko ubundi ndigorera iki nibaza byinshi? Icyo nzi cyo niba bagiye no gushakira Didi undi mugore ntazamwemera. Aha nahise nirema agatima nuko nsubira mu nzu.
Nasanze mabukwe yicaye muri salon mubwira mwiriwe nkomeza ngana mu cyumba. Ahita ampamagara ntararenga imbere ye.

-Joanna, icara hano
Ndaza ndicara

– Urajya guhaha ryari? Uzateka se iki ejo
Naramwihoreye mureba mu maso gusa

– Si wowe mbaza ko ndeba wavuniye ibiti mu matwi?

Nabwo nkomeza guceceka

Iyo umwanzi wawe umwihoreye uba umuteye kwibaza byinshi gusa nanone kwihorera nyokobukwe ni umwanzuro nanjye nari mfashe bwa mbere mu buzima bwanjye.
Iyo umuntu umwihoreye abura aho ahera aguhinja kumutuka cyangwa kumukomeretsa.
Niba ushaka ko umuntu aceceka, banza wowe uceceke. Igihe cyose udafite amagambo nyayo yo gusubiza icecekere wihorere umuntu. Biramurya bikamukorogoshora kandi ntibibyara impaka za ngo turwane

Mabukwe yahise arakara arahaguruka ansiga muri salon nanjye mpita mpaguruka njya mu cyumba cyanjye ndirambika agatotsi sinzi igihe kantwariye

Nakangutse izuba ryarashe ndebye ku isaha nsanga ni saa tatu za mu gitondo.
Ubanza ari uko nari maze igihe ntasinzira neza bihagije nyuma y’urupfu rwa mama no guteshwa umutwe na mabukwe.
Narabyutse ndasenga nuko njya gukaraba.

Nagiye mu gikoni gutegura ibya mu gitondo ngo ndye nsanga bamaze guhaha. Niho nahise mbona ko koko hari umuntu uri buze muri uru rugo kandi akaba ari mukeba wanjye.
Nahise mvugisha wa mukozi bazanye kuko namusanze mu gikoni.

-Afi, waramutse
-Waramutse tantine Joanna. Sinari nakubonye
-Ni nde se wahashye
– Ni tantine Chantal wahashye

Naracecetse nikorera agakawa ndanywa. Uyu ni umukozi ntabwo azi intambara ndimo nta n’impamvu yo kumwereka ko mfite ikibazo.
Nahise ntegura ibyo kurya bya mu gitondo ubwo ntegurira mabukwe, muramukazi wanjye na wa mukozi kuko yari atarategura ameza.

Ndangije njya ku rubaraza niho mabukwe na Chantal bari bicaye.

– Mwaramutse mama. Waramutse Chantal. Icyayi cyatunganye nari mbwiye Afi (wa mukozi) ngo abashyirire ku meza. Ni karibu.
Ibi kubikora si ubugoryi ahubwo nabikoze kuko sinashakaga ko yazandega ku muhungu we ko namwicishije inzara.

Mabukwe yahise ankankamira arambwira ati:

Ntuzacikwe ubutaha.

Ese yamubwiye ate ?

1 comment

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s