Inkuru ndende

Igihe cyanjye kizagera: Agace ka 4

Uko nakicaye ntekereza nibwo igitekerezo kindi cyanjyemo nuko mfata telefoni yanjye ndahamagara.

– Esta, noneho ndumva navuye ku izima. Vuba na bwangu mfasha tujye kwa wa mupfumu wambwiye ko arenze kuri wawundi twari twavuyeho kuko ndabona nta yandi mahitamo. Gusa nizere ko we abashije koko atari amagambo gusa.

Ntiyatindiganyije nawe kuko yari ahangayikishijwe no kuba ntarabyara nuko dufata inzira turagenda.

Hari ahantu mu cyaro hari utuzu tw’ibyatsi ducucitse, nuko tumaze gusuhuza batubwira gukuramo inkweto tukabona kwinjira.

Tugezemo twasanzemo umugabo ukuze wicaye ku kirago atubwira natwe kwicara.

Tugiye kumuhereza umukono tumusuhuza yajunguje umutwe ahubwo aduha uruho rwuzuye amazi adusaba kuyanywa twembi.

Ibyo birangiye yampaye ikintu kimeze nk’igiceri ansaba kukivugiraho amagambo yerekeye ibyo nifuza ariko nkavuga nongorera ku buryo nta numwe uri aho uri bubashe kubyumva.

 

Maze kubikora ndakimusubiza nuko nawe akivugiraho amagambo mu rurimi ntabashije kumva akurikizaho iitongero myinshi ahamagara abakurambere.

Yahise ahaguruka yinjira mu kindi cyumba ahamara iminota igera kuri 15.

Mu by’ukuri rwose ibijyanye n’abapfumu no kuraguza simbyizera ariko se ko n’Imana nizera mbona imeze nk’iyantereranye nabigira nte? Ngo uhiriye mu nzu ntaho adapfunda imitwe reka na hano ngerageze wenda hari icyo byatanga, ntawamenya.

Umupfumu agarutse yarongeye yicara hahandi yari yicaye nuko arambwira ati

– Madamu ndabona wazanywe n’ikibazo cyo kubura urubyaro

Nahise numva bntunguwe. Ko ntigeze mubwira ikingenza se yabwiwe n’iki ikibazo mfite koko? Gusa nahise numva ngie ibyiringiro nuko ndikiriza nti yego mubyeyi nibyo byanzanye.

– Madamu rero rwose singiye kukubeshya ikibazo cyawe ntacyo nagikoraho.

Nahise ngwa mu kantu nuko Esta ahita avuga

– Gute se koko ntacyo wagikoraho ari wowe muganga rurangiranwa twari twizeye (iyo wasuye umupfumu iwacu umwita umubyeyi cyangwa umuganga)

– Mwa bana mwe hari ibyo umuntu aba atashobora kubasobanurira. Gusa ubu mbabwije ukuri nta cyo nakora. Icyakora nihashira umwaka utarasama uzagaruke ndebe ko hari icyo nagufasha ahari wenda noneho bizaba bishoboka.

 

Nahise njya mu kayubi nibaza byinshi. Niba umupfumu yabashije kumenya ko nazanywe no kuba ntabyara ni gute atabashije kumfasha kubona urubyaro koko? None se ubwo ni gute wasuzuma indwara ariko ntumenye umuti wayivura. Nahise nicuza icyatumye nza dore ko n’ubundi nta cyizere nari mfite byari ugupfunda imitwe gusa. Nuko turasohoka turagenda

-Ariko sigaho gucika intege. Niko Esta yahise ambwira.

– Si wowe se wanzanye unyizeza ko ashoboye? None se ubu amariye iki?

-Nukuri arashoboye n’ikimenyimenyi yamenye ikikugenza utiriwe ubivuga. Uyu mupfumu niwe wafashije mukuru wanjye cya gihe yari afitanye ibibazo n’umugabo we. Gusa nkuko abivuze nyine hari ibyo twe tutamenya.

-Esta, ubu koko noneho nkore iki ko mabukwe amereye nabi?

-Ngo? Yakubwiye ate se kandi?

-Nubwo nari narabiguhishe ariko mabukwe yambwiye ko niba ntabashije gusama muri aya mezi atatu nzava mu rugo rw’umwana we

-Joanna noneho dusubire kureba umupfumu tumusabe atume nyokobukwe aguha agahenge basi

 

Twasubiye inyuma tujya kureba umupfumu ngo adufashe ku kibazo cya mabukwe noneho.

Imihango yagenze nk’ubwa mbere uko byagenze nuko umupfumu ati:

-Madamu ndabona nta cyatuma nyokobukwe atuza uretse ibintu bibiri gusa.

-Ibihe se mubyeyi mukuru?

-Kubyara cyangwa urupfu.

-Eeeeh! Ngo urupfu? Reka reka aho sindahagera shwiii. Esta twigendere

 

Umupfumu yahise anca mu ijambo:

-Madamu sinavuze ko ngiye kwica nyokobukwe. Navuze ko kugirango arekere kugutesha umutwe waba wabyaye cyangwa se umwe muri mwe akaba atakiriho. Simbereyeho kwica abantu jyewe mbereyeho kubakiza no kubavura no kubarinda iyo bishoboka.

Aho nahise ncururuka kuko numvaga uburakari bwazamutse. Yego mabukwe ari kunzonga ariko sinagera aho kumwicisha ngo mbone amahoro. Gusa n’ubundi umupfumu nta ntsinzi ifatika ampaye. None se ko ntabasha kwicisha, bivuze ko ari jyewe ngomba gupfa niba ntabyaye?

 

Twaratashye nuko ngeze mu rugo ndambarara ku buriri ntangira kurira. Imana yananiwe kunsubiza, none n’umupfumu ambwiye ko ntacyo yamarira. Nubwo kwa muganga basanze turi bazima nabo imiti baduhaye ntacyo iri kutumarira. Ubu koko nacumuye iki gituma ntaba nk’abandi koko? Nyuma yo kurira narihanaguye nuko ibyanjye mbitura Imana gusa niyemeza kuza kubwira umugabo wanjye Didi ibyo nyina yambwiye nkumva icyo abivugaho

Ntiyatinze gutaha nawe, nuko mutekerereza uko nyina yambwiye maze aravuga ati:

– Joana, ibyo mama yakubwiye wibyitaho. Biriya ni iterabwoba gusa. Hari ubwo se ari we ugutunze cyangwa ari we wakurongoye? Ntaho uzajya humura

 

Nahise numva byibuze ntuje kuko wa mugani niwe wandongoye ntabwo ari mabukwe.

Ibyumweru byarahise ibindi birataha mabukwe atakintesha umutwe ariko ubwo ya mezi atatu yambwiye yari ashize yaje mu rugo kandi acunga Didi adahari.

-Ni karibu mama

-Murakoze

-Reka nkuzanire amazi ndaje (iwacu umushyitsi wese tubanza kumuha amazi tukabona kumuha ibindi byo kumwakira)

– Oya si ngombwa mwana wa. Wikigora sindi umushyitsi.

Nuko antega ikiganza nk’aho hari icyo ari kunsaba.

-Mama sinsobanukiwe icyo ushaka kuvuga

– Ndashaka ibisubizo

-Ibihe bisubizo mama?

-Amezi atatu arashize. Ntiwagiye kwipimisha se?

 

Nabuze ayo ncira n’ayo mira ndamureba mu maso numiwe, nawe yahise abibona ko nta byabaye.

Yahise ahigima asa n’usekera ku mutsi w’iryinyo nuko ahita ambwira:

-Wanze kunyumva, noneho hama hamwe nkwereke ko Didi ari umwana wanjye

Yahise ahaguruka arikubura aragenda atanasezeye

Ibyumweru byakurikiyeho nahise ntangira kubona impinduka mu myitwarire ya Didi. Gutaha atinze, kwanga kurya rimwe na rimwe cyangwa akarya ducye cyane byo kunyikiza akitwaza ngo arumva ananiwe, ngo nta appetit afite n’ibindi.

Iyo namubazaga impamvu atakiboneka mu rugo nka mbere dore ko impera z’icyumweru kenshi atatahaga, yaransubizaga ati iyi minsi ndi gukora cyane ngo nshake uko twazamuka mu mibereho.

Kenshi nibazaga ko yaba yarigiriye ahandi ariko Didi ndamwizera mba numva atambeshya cyangwa ngo ampishe.

Ibyo bimaze nk’amezi atatu bibaho, Didi yambwiye ko afite urugendo hanze kubera akazi kandi azamarayo icyumweru.

Hashize iminsi ibiri agiye, mu gitondo kare mabukwe, muramukazi wanjye mukuru n’umukozi wabo baje mu rugo.

Narabashuhuje ariko muramukazi wanjye ni we gusa wanyikirije.

Mabukwe yahise ancaho nuko yinjira mu cyumba kimwe mu bigize inzu yacu. Inzu yacu ifite ibyumba bitandatu, kuko Didi yashakaga kubyara abana benshi niyo mpamvu yari yarubatse inzu nini cyane.

Agezemo yahise ahamagara wa mukozi gusasa igitanda cyari kirimo, dore ko bari baje banitwaje amashuka meza atatse indabo ndetse n’imisego imeze neza.

 

Naguye mu kantu nibaza ibiri kumbaho ako kanya biranyobera. Mu mutwe nibajije byinshi. Ese mabukwe aje kuba hano? Sinabashaga no kubibaza Didi dore ko kuva yagenda twari tutaravugana.nuko mbaza mabukwe:

-Mama ndabibona ko muje kuba hano, ariko se kuki mutanteguje ngo icyumba mbe naragiteguye ubwanjye aho kuzana uwo kugitunganya?

 

Yaranyitegereje kuva hasi kugera hejuru arongera aturuka hejuru ageza hasi nuko arambwira ati:

 

 

Ntuzacikwe n’inkuru ikurikira

 

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s