Imibanire Ubuzima

Ibyatuma ubasha kubana neza n’abandi

Ugisoma uyu mutwe w’inkuru wahita wibaza uti ese ubundi kubana n’abandi birigwa? Igisubizo ni yego. Kubana n’abandi si ibintu umuntu avukana ahubwo ni ibintu umuntu yitoza akabyimenyereza nuko bikamubashisha kubana neza na buri wese, abagabo n’abagore, abana n’abakuru, abasore n’inkumi.
Tugiye kurebera hamwe ibiranga umuntu uzi kubana n’abandi turasoza twerekana ibyo wakora ngo nawe ubashe kubana n’abandi.

a. Ibimenyetso biranga umuntu uzi kubana neza

Abantu bazi kubana n’abandi bafite imyitwarire n’imico bahuriraho bibabashisha koko kubana n’abandi.

    • Kumva abandi

Umuntu uzi kubana n’abandi ntiyumva ngo asubize ahubwo atega amatwi yitonze ibyo ari kubwirwa. Uwamuganirizaga ahava anyuzwe kuko yamubonyemo umuntu udapfa gusubiza ahubwo usubizanya ubushishozi.

    • Kumenya kuganira

Wigeze ubona umuntu usanga aho ari abantu bose bamuteze amatwi? Uwo muntu aba afite ubumenyi bwo kubasha kuganira na buri wese no ku ngingo iyo ari yo yose. Gusa ushobora gusanga ingingo zirebana n’umwihariko hari izitamushishikaza (politike, imikino, amadini, …) ariko izireba ubuzima busanzwe zose ugasanga azibonamo kandi ikiganiro cye kigakundwa. Usanga avangamo gutebya, akibuka icyo abandi baganiriye bavuze, mbese ugasanga ikiganiro cyose aragifite kandi niwe ukiyoboye

    • Kuba icyitegererezo

Ibi si wowe ubyiha ahubwo abandi nibo baba bifuza kukwigiraho no kumera nkawe. Gusa kuko nta ntungane uba usanga nubwo uyu muntu azi kubana n’abandi atabura akamwisoba, gusa ugasanga ahanini atari ikintu cyamutesha ikuzo muri rubanda (icyaha ndengakamere).

    • Nta mpaka za ngo turwane

Kujya impaka kwabo usanga kurimo ubwenge kandi kugamije guhuza no gusobanukirwa. Ntibajya impaka bashaka kwerekana ko bari mu kuri buri gihe ahubwo baba bashaka gufatanya kureba aho ukuri kuri. Impaka zidafite ikizishyigikira ntibaziha umwanya kuko nizo usanga zisozwa n’imvururu cyangwa amakimbirane. Niba umubwiye ko runaka azi ubwenge kurusha kanaka ashaka umwereke ibibihamya, bitagendeye ku marangamutima.

 

b. NI GUTE WABASHA KUBANA N’ABANDI

Mu gihe bamwe usanga kurema inshuti nshya bitabagora, usanga abandi ahubwo n’izo bari bafite bazikuraho kubera kutamenya kubana n’abandi. Ariko hari ibyo wakitoza bikagufasha kumenya kubana n’abandi.

    • Genzurana ubwitonzi ibikuzengurutse

Abantu bazi kubana usanga bagenzura buri kimwe mu bibazengurutse, kandi bakabikorana ubwenge n’ubushishozi. Akenshi bagendera ku ihame rivuga ngo
Menya aho uri, igihe urimo, uwo uri we, abo muri kumwe.

    • Gerageza kumenya kugenzura amarangamutima yawe

Usanga kenshi amarangamutima ashobora kudukoresha ibitari ngombwa. Ugasanga urarakaye uranduye inzuzi, cyangwa ukishima ukagabira abantu ijuru. Aha uba wananiwe kugenzura amarangamutima yawe. Kenshi kutabasha kugenzura amarangamutima yawe bituma utabasha guha agaciro ay’abandi. Ntawe utagira amarangamutima ahubwo uburyo tuyagenzura nibyo bitandukana. Kubasha kuyagenzura bigufasha mu mibanire yawe n’abandi.

    • Ubaha abo mudahuje

Abo mudahuje idini, mudahuje uruhu, ururimi, imyumvire, imitekerereze, ubushobozi, amashuri, imyaka… abantu bihita bigaragara ko hagati yawe nabo harimo itandukaniro, bibubahire. Bashobora bo kutabikubahira ariko wowe kora uruhande rwawe, ubarekere urwabo. Niyo yaba umuyaya cyangwa umuboyi wawe, mwubahire akazi agukorera, nawe azakubahira umushahara umuha.

    • Gerageza gusabana

Mu gihe uri mu bandi, gira uruhare mu kiganiro ariko utari kugitoba ahubwo banza utege amatwi witonze ibyo abandi bavuga, nawe umenye aho uhera. Niba bari gusingiza ubuhangange bwa Arsenal, ukabona bose barabyumva kimwe wihita uzanamo Chelsea. Aho uba uhise ubyica. Aha uba wishe rya hamwe tubonye ku ngingo ya mbere, ntuba umenye abo muri kumwe. Wica abandi mu ijambo, tegereza uvuga arangize nawe utange igitekerezo cyawe kandi ugana mu cyerekezo kimwe n’abandi keretse niba ari ikiganiro mpaka niho ushobora kuvuga ibinyuranye n’iby’abandi.

    • Igira ku bakuzengurutse

Abazi kubana n’abandi bahera hafi yabo bikazagera ku bandi nyuma. Abo muvukana, abana bawe, uwo mwashakanye, abo mukorana n’abo muturanye banza umenye amarangamutima yabo, ubashe kuyagenzura no kuyaha agaciro. Ntiwaba ubana nabi n’uwo mwashakanye ngo rubanda mubane neza (keretse uwo mwashakanye ariwe ukunaniza).

Uko byamera kose kubasha kubana n’abandi si ikintu gihita cyizana nubwo kuri bamwe bishoboka ugasanga abantu bose baramukunda kandi bamwiyumvamo. Nyamara nawe wabishobora uramutse umenye ko umutungo wa mbere ari abantu. Nushyira imbere imibanire myiza ukareka kwikunda no kuba nyamwigendaho nta kabuza uzabigeraho.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s