Inkuru ndende

Igihe cyanjye kizagera: Agace ka 3

– Ese ubwo koko wabujijwe kuza nuko umuhanda ari mubi?

Kuri iri jambo yahise afasha ikiyiko hasi dore ko yari yakomeje kumvugisha ari no kurya nuko andeba mu maso ambwira ijambo ryantunguye ndetse rinambiza icyuya ako kanya.

Yahise ambwira ati:

– Umva neza nkubwire Joanna. Umaze imyaka itanu hano urya wicaye, nta n’inda byibuze yavuyemo ngo mbyite ibyago. Umugongo wawe urakomeye naho uwanjye watunutseyo mbyara umugabo wawe Didi none ngo ngerekeho no kujya kwihuhura mu mihanda yo mu majyaruguru?

Nabize icyuya numva mbuze aho nkwirwa ariko numva ntakwiye guceceka nuko ikiganiro kirakomeza.

– Mama wivuga utyo jyewe sindi Imana niyo itanga urubyaro. Ariko se koko kuba ntarabyaye nibyo byakubujije kuza gushyingura mama?

– Umva Joanna, sinabyanze. Nawe urabizi mu majyaruguru ni kure kandi rwose imihanda yaho ni mibi. Ubwo bwitange narabubuze. Byibuze iyo uba warambyariye akuzukuru nari kuba nzi ko ndi kwitangira umuntu dufitanye isano.

Ibi yabimbwiraga byose ashize amanga kandi ubona ko atitaye ku marangamutima yanjye. Amarira yabunze mu maso ariko nihagararaho nanga kuririra mu maso ye. Gusa nari maze kubona ko ikibazo cyo kuba nta mwana ndagira muri uwo muryango kimaze gufata indi ntera.

Ntarabana na Didi rwose nta kibazo nigeze ngirana na nyina ahubwo byatangiye guhinduka hashize imyaka ibiri tubana. Yabanje kumbaza niba naba mfite ikibazo kintera kutabyara mubwira ko ibizami byo kwa muganga byerekanye ko nta kibazo mfite. Ndetse niko byagenze no kuri Didi. Gusa kuri iyi nshuro nabonaga ko ari jye uri kugerekwaho ikibazo, dore ko mu muco wacu bavuga ko umugore utabyara aba aciye umuryango.

Naramusezeye ntiyanampereza ukuboko ndetse ntiyanavuga mpita mbona ko ibintu byakomeye

Nahise njya mu modoka ngana kwa Marc ngo njye kubiganyira mama ariko ngeze mu nzira nibuka ko hashize iminsi tumushyinguye nuko ndakata ndataha.

Ndi hafi kugera iwanjye nibwo nahuye na Esta ya nshuti yanjye ya bugufi yarwaje nyirarume kugirango babone amafaranga yo kwivuza bakabeshya ko yapfuye. Twari twarahuriye mu ishuri ariko na nyuma yaho ubucuti burakomeza.

– Joanna wari uri he ko naguhamagaye na terefoni nkumva idacamo?

– Sha Esta yashizemo umuriro. Nari nagiye kwa mabukwe

– Ese ko ataje gushyingura bamwana we aho ni ubuhoro?

– Sha nyine mvuye kumusura yari arwaye.

 

Nemeye guhisha Esta ukuri kuko ndamuzi. Ntaniganwa ijambo ariko sinamwishinga kuko we abyaye gatatu. Ubwo yari guhita anyita igicucu, ati ari jye namushishura…

– Esta ngwino rero tujyane mu rugo nshaka ko tuganira.

 

Tugeze mu rugo twiyicariye ku mukeka nuko ikiganiro kiratangira.

 

– Mbwira Esta kuki koko kwa muganga batubwira ko nta kibazo dufite twembi ariko nkaba ntaratwita koko?

– Ese Joanna igihe nakubwiriye kujya ku mupfumu si wowe wabyanze koko? Nyamara aho bigeze ukwiriye kubaza abakuru

Nabanje kwitsa umutima. Ni ukuri ibintu byo kuraguza simbyizera sinabyemera. Gusa aho bigeze ndabona naho nta kundi nzajyayo. Urushyize kera koko ruhinyuza intwari.

Esta yahise anyizeza ko hari uwo azi rurangiranwa yazanjyanayo.

 

Gusa iwacu mbona abapfumu bari mu bice bibiri. Hari abavuga ko bakoreshwa n’Imana hakaba n’abandi bakubwira ngo biyambaza abakurambere gusa bose bagahuriza ku kukubwira ko bakubonera intsinzi y’ikibazo cyawe ariko ukagira ituro ubanza gutanga.

 

Ako kanya twahise tujya kwa wa mupfumu kuko hatari kure kandi nari mfite imodoka nuko anyizeza ko mu kwezi kumwe nzaba ntwite rwose. Icyakora navuyeyo namupinze nuko Esta ambwira kunjyana ku wundi urenze ariko nanone akaba ahenda cyane.

-Esta ntabyo nshaka. Umutima wanjye rwose ndumva utabinyemerera.

Nubwo yakomeje kumpa amasomo no kunyinginga nakomeje kumuhakanira. Kua nashyingirwa nsenga buri munsi ndetse nyuzamo nkaniyiriza niringiye ko Imana izakora ibitangaza. Ntirabikora ariko nduma mfite icyizere

Twaratashye nuko ngeze mu rugo mpindura imyenda njya mu gikoni guteka kuko Didi yari hafi gutaha. Yaje ntarahisha nuko ngira vuba ngo mwakire. Maze kumwakira mubwira iby’uko nagiye kwa nyina.

– Didi, kare nagiye gusura mukecuru. Nasanze ari muzima kandi yambwiye ko kuba ataraje gushyingura ari ubushake kuko atari arwaye.

– Yatinyutse arabikubwira koko?

– Yego Didi kandi ni ikosa ryawe wowe warambeshye

– Umva cherie, wari wifitiye agahinda sinifuzaga kukongerera akandi pee.

– Ariko iyo umbwiza ukuri simba nagiye ngo nsebere imbere ye

– Cherie ihangane ndaza kubicyemura humura.

Hashize iminsi ibiri nganiriye na Didi, mabukwe yaje mu rugo noneho yabishe. Yabaye agikingura igipangu ahita atangira kumpamagara avugira hejuru.

 

– Joanna Joanna!!!

-Yego mama ni karibu

-Joanna. Dore hashize imyaka itanu upyatamye mu rugo rw’umwana wanjye. Urarya ukanywa gusaaa nta kindi ukora ntunabyishyura. Ufashwe neza dore ibuno ni ibuno itama ni itama. Nyine waratuje uterera agati mu ryinyo ibyo kwagura uuryango ntacyo ubyitayeho, mbese uratuje gusa. None aho kongera umuryango ahubwo utangiye kuwuzanamo amacakubiri.

 

Namurebye numiwe natangaye kuko numvaga ibyo ari kumbwira ntari kubyiyumvisha.

 

– Ayahe macakubiri nazanye mu muryango mama?

– Ubwo uratinyuka ukambaza icyo kibazo? Uvuye iwanjye wabwiye gute Didi?

– Namubajije impamvu yambeshye

– Noneho ndakubajije nsubiza. Uzatubyarira cyangwa ntabyo uzakora?

– Mama ariko urubyaro rutangwa n’Imana.

-None wowe upfa iki n’Imana gituma irukwima? Umva nkubwire ikintu rero Joanna, ubyumve ubyiteho uwo wita umugabo wawe Didi ubanze wibuke ko ari umuhungu wanjye. Narihanganye imyaka itanu irashize, ariko ndarambiwe. Iyo mba ntarabyaye Didi, ntuba waraje muri uyu muryango. Rero mbere yo kumugiraho uburenganzira umenye ko ari jye wa mbere.

Nguhaye amezi atatu ukaba usamye. Nashira ukaba utaratwita rwose utagoranye uzazinge utwawe umvire mu rugo rw’umwana azashaka undi ubyara abakobwa ntibabuze. Wirirwe ntunamperekeze

Namwitegereje agenda numva isi isa n’iyanyituyeho. Niko nteye nubundi sinkunda kuvuga noneho ubu bwo ni na mabukwe ntacyo nari kurenzaho.

 

Nasigaye nicaye nibaza byinshi. Ubu mama iyo aba akiriho ba ngiye kumuririra no kumuganyira. Nyamara ntahari

– Ariko se mama, niba koko uri imbere y’Imana wayimbwiriye koko ikampa umwana? Narasenze ntiyanyuva ahari wowe kuko yaguhamagaye wayimbwirira ikumva.

 

Uko mabukwe yanyitwayeho sinabimurenganyiriza nanone kuko biragoye ko umuryango wahatsemo ukwishimira iyo utarabyara. Ariko nanone kuba bigeze aho umbwira kuzinga ibyanjye ngasubira iwacu byo ndumva byafashe indi ntera. Noneho ndabizi Didi na nyina barahuza cyane, kubimwumvisha ngo anyirukane bizoroha. Ndabona urugamba rukomeye ngomba kururwana.

 

Uko nakicaye ntekereza nibwo igitekerezo kindi cyanjyemo nuko mfata telefoni yanjye ndahamagara.

 

 

Ntuzacikwe ubutaha.

 

Ese yahamagaye nde? Yamubwiye iki?

1 comment

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s