Inkuru ndende

Igihe cyanjye kizagera: Agace ka 2

Ubwo nkiri kwibaza niba koko amagambo numvise yavuzwe na mabukwe, hashize akanya arasezera nuko Didi aza mu cyumba mpita muvugisha ;

– Didi musaza wanjye Marc yansabye ko ejo najyayo kumureba tugapanga ibyo gushyingura.

– Ntacyo ubwo nzaguherekeza tuzajyana

– Ntuzajya ku kazi se?
– Ese wiyibagije ko ikigo ari icyanjye ntawe unkoresha?
– Urakoze kumba hafi mugabo mwiza. Ese wabwiye mukecuru ko tuzajya gushyingura mu majyaruguru?
– Yego namubwiye buriya arabwira abandi banyamuryango badufashe gutegura ibyo gushyingura

Didi yampishe ibyo nyina yavuze ariko nanjye nirinze kumwereka ko hari icyo mbiziho. Naratekereje nti reka ntegereze uko bizagenda.

Icyakora amagambo mabukwe yavuze yanshenguye umutima. Ndabizi ko ntaramubyarira akuzukuru ariko ubu ni mama wapfuye ntaho byari bikwiye guhurira no kuba ntabyara. Ndumva yarengereye

Bwarinze bucya ntahindukiye gusa bucyeye niho nongeye gutekereza ko mama ntazongera kumubona. Nubwo yari amaze amezi 3 arwaye kandi niteguye ko umunsi umwe azigendera ariko sinari nziko byaba vuba aka kageni.

Mama yari byose kuri twe abana be dore ko bucura Lyne papa yapfuye mama amutwite.
Ntiyigeze ashaka undi mugabo ahubwo akomeza kuturera wenyine muri ducye yabonaga. None igihe twigiye hejuru natww hari icyo twakamumariye, urupfu ruramutwaye.

Uko nibuka byinshi bye byiza niko ndushaho kubona ko yari ingenzi mu buzima bwanjye. Ndibuka uko namusuraga akantekera ari kuririmba, uko yahoraga ambwira ko igihe nikigera nanjye nzabyara, inama ze…
Ubu koko ni nde uzongera kumpa inama nk’iza mama wanjye ko yari byose kuri jye?
Aha niho nahise nsuka amarira menshi ndaboroga nkaho ariho nkimenya ko yatuvuyemo.

Didi yarampojeje nuko turitegura tujya kwa Marc kuko ni naho mama yabaga. Twasanze urugo rwuzuye abantu baje ku kiriyo no kwihanganisha umuryango wacu.
Gusa ikimbabaza iwacu usanga duha agaciro uwapfuye kurenza umurwayi.
Iyo umuntu apfuye usanga abantu bose bamuvugaho ndetsw banamuvuga ibigwi ariko iyo arwaye usanga no kumusura bikorwa na benewabo n’inshuti ze za hafi gusa. None dore urugo ruruzuye ntiwabona aho ukandagira.

Esta, akaba inshuti yanjye magara yigeze kumbwira uko nyirarume yarwaye bakabura amafaranga yo kumuvuza. Nyina akubita hirya no hino abura n’uwamuguriza.
Ubwo bimaze kuyoberana kandi agomba kubagwa abwira umugore we kujya ku ivuko akababwira ko yapfuye bityo hakenewe amafaranga azifashishwa mu kumushyingura n’ayo kwishyura ibitaro.
Ngo yarabikoze bahita baterateranya amafaranga ahagije ku buryo bavuje nyirarume bakanasagura. Nubwo bibabaje ariko abimbwira icyo gihe sinihanganiye kudaseka.

Na hano abantu bari hose ndetse bamwe bicaye hasi abandi baryamye mu mbuga. Nkomeje gutambuka nabonye mabukwe nawe yahageze na bamwe bo mu muryango nashatsemo. Ndabasuhuza bambwira kwihangana nkomeza njya kureba Marc na Lyne gusa we yari akiri kurira yahogoye.

Twafashe umwanzuro ko ku bucyeye tujya ku ivuko kumvikana na bo ibyo gushyingura mama.
Ku bw’amahirwe ntibatugoye ndetse twafatanyije gukusanya ibijyanye no gushyingura byose. Tunemeranya itariki yo gushyingura

Umugabo wanjye Didi afite bashiki be babiri n’umuvandimwe umwe. Ku munsi wo gushyingura nabonye mushiki we muto na wa muvandimwe we na bene wabo bandi bacye ariko sinabashije kubona mabukwe na muramukazi wanjye mukuru.

Ibyo gushyingura birangiye nasigaye ku kiriyo iminsi yagenwe nuko ishize nsubira iwanjye.
Ngezeyo numvise nifuza kubaza impamvu mabukwe atabashije kuza gushyingura.

– Ese Didi ko ntabonye mabukwe na mushiki wawe mukuru mu gushyingura baba bari amahoro?
– Sha mama ararwaye ubwo rero mushiki wanjye yagombaga kumuba hafi
– Ari mu bitaro se?
– Oya ari mu rugo ni uko gusa yumvaga atameze neza ku buryo yabasha gufata urugendo rurerure

Aha Didi ndamwumva ntashaka kumbwira ko nyina yabyanze. Yanze guteza ikibazo hagati yanjye na mabukwe.

Bucyeye, kuko nari nabwiwe ko mabukwe arwaye nafashe urugendo njya kumusura gusa ibyo twaganiriye byarantunguye.
Nasanze yiyicariye arimo kurya ubona ko ari muzima rwose.

– Mwaramutse mama. Didi yambwiye ngo wararembye niyo mpamvu utabashije kuza gushyingura.

– Jyewe ndemba ? Uwo mugabo wawe yakubeshye rwose

– None se kuki mutaje gushyingura?

– Mwana wa imihanda yanyu ni mibi pee.

– Ese ubwo koko wabujijwe kuza nuko umuhanda ari mubi?

Kuri iri jambo yahise afasha ikiyiko hasi dore ko yari yakomeje kumvugisha ari no kurya nuko andeba mu maso ambwira ijambo ryantunguye ndetse rinambiza icyuya ako kanya.

Yahise ambwira ati:…

Ntuzacikwe n’agace gakurikira.

1 comment

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s