Imibanire Ubuzima

Nkore iki ko umugabo atakinyikoza?

Umugabo ntakinyikoza, ataha yigira muri terefoni, ubundi akareba tereviziyo. Ubwo ni uko aba atigiriye mu kabari kuko iyo akagiyemo ataha bucyeye ndetse yanitwa ngo aravuze akavuga anshihura yaba atanshihuye akansubiza ibyo mubajije gusa ubundi akirebera abana.

Mugore niba umugabo wawe ariko ari kukumerera nicyo gihe ngo wongere umwigarurire. Hari impamvu zinyuranye zibimutera, si zo tugiye kuvugaho ahubwo tugiye kukwereka ibyo wakora akongera kuguha umwanya n’agaciro.

1. Reka kuba nyirabiyorero

Abagore bamwe usanga iyo ari mu rugo atiyitaho. Ugasanga wambaye nabi, bisa nabi, ntiwakarabye, mbese ntiwiyitayeho. Ibuka ko akurambagiza wahoraga ucyeye. Nicyo gihe rero ngo wongere wite ku buranga bwawe, imisatsi uyiteho, utwenda tw’imbere utugirire isuku kandi ujye unagura utundi.

Aho kwiyitaho gusa ugiye mu kazi, ibuka ko byose ubikorera urugo rwawe. Kwambara imyenda irangaza abagabo b’abandi wagera iwawe ugakenyera ibigera ku birenge cyangwa ugakubitamo itiriningi, burya uba watangiye kubicurika. Iyiteho, uhore ucyeye. Ibi bizatuma yongera kukurangamira abone bwa bwiza.

2. Inseko yawe ntigasaze

Si uguseka by’umurenzaho cyangwa urumenesha ahubwo ni inseko ikurura uwo uyisekeye akabona ibirenze kuri iyo nseko nuko akarushaho kukwiyumvamo. Wimwakiriza ibibazo avuye ku kazi, ahubwo mumwenyurire umuhe karibu.

Niba hari n’ikibazo kimubwire amaze gutuza naho kumubwira ko umunyu washize ataraninjira mu nzu, ni ukumwongerera stress n’ibibazo.

3. Ikunde wihe agaciro

Wikumva ko ubwo wabaye umugore wamaze guta agaciro. Oya. Ikiguha agaciro imbere ye ahubwo ni uko uri umugore, nyina w’abana be. Iyakire, mu mubyibuho udasanzwe wazanywe no kunywa ibikoma umenye uko wambara, wisiga, mbese wihe agaciro nawe azakaguha. Gira igihe cyo kuruhuka no gukora siporo bizagufasha kumubera mwiza buri gihe.

4. Menya igihe nyacyo cyo kumwitaho.

Kwita ku mugabo ntibigora burya. Niba muri kuruhuka, kumukorakora mu musatsi no mu bwanwa, kumuha agasomyo niyo haba ku itama, kumwibutsa uko yaguterese, bigarura ibyiyumviro. Gerageza guhora umubera mushya mu byiza. Guhindura uko usasa, kumubwira akantu ukumbuye, byose bituma arushaho kugutekereza.

5. Iby’akazi bisige ku kazi

Niba ufite akazi, ukigasoza menya ko ibyako byarangiye. Wigera mu rugo ngo utangire kumutekerereza ibyabereye ku kazi. Mu rugo muvuge iby’urugo. Ibi bizatuma arushaho kunezererwa urugo.

6. Mufashe mu bimushimisha

Buri wese agira imyidagaduro akunda. Ashobora kuba akunda kureba umupira, kubyina se, koga, n’ibindi. Niba utanabikunda aho kumuhozaho urutoto ngo uri mu biki ahubwo muherekeze umwereke ko umufana.

7. Gira mu rugo heza

Isuku yo mu rugo ntigarukira muri salon no mu cyumba gusa. Gerageza gusukura hose, gutegura, gutaka uko ushoboye. Niba unafite umukozi ibukako uwo ari umucanshuro naho wowe uri nyiri urugo. Ibyo we akora ni uko abihemberwa ariko wowe ibyo ukora ni uko ari inshingano.

8. Mumenyere ibyo akunda

Buri wese akunda kwerekwa ko yitaweho. Niba akunda icyo kurya runaka, kimutegurire. Niba akunda agacupa kamugurire asange gahari. Ikirenze byose ibuka kumusasira neza, kuko niyo nshingano yawe ya mbere mu rugo. Ibyo wakora byose iyo mu buriri bipfuye ntacyo uba waruhiye. Menya kumuryohereza abone ko nta mugore ukuruta. Niyo yaba avuye kuguca inyuma, muri we azicuza kuko azasanga ibyo ufite birenze iby’aho avuye.

Dusoza

Abagabo bose ntibakunda bimwe kandi ntibateye kimwe. Nyamara izi ngingo ugiye uzitaho mu buzima bwawe bwa buri munsi, nta kabuza umugabo wawe wakongera ukamwigarurira, ukamuca ku nshoreke, ukamuca ku kurara mu kabari no kutaguha umwanya mukongera mukishimira urugo rwanyu.

Urukundo iteka

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s